អាមេរិកនឹងលុបជំនួយសេដ្ឋកិច្ចទាំងស្រុងឆ្នាំ ២០១៨ និងកាត់បន្ថយផ្នែកសុខាភិបាល
ឯកសារនៃក្រសួងការបរទេសសហរដ្ឋអាមេរិកបានបង្ហាញពីជំនួយរបស់សហរដ្ឋអាមេរិកទៅលើបណ្តាប្រទេសនានាក្នុងសកលលោក។ នៅក្នុងនោះ សហរដ្ឋអាមេរិក បានលុបជំនួយពីរផ្នែកក្នុងចំណោមជំនួយទាំង ៤ផ្នែកមកកម្ពុជាផងដែរ។ នោះគឺជំនួយអភិវឌ្ឍន៍ និងជំនួយគាំទ្រសេដ្ឋកិច្ច ដោយឡែកជំនួយខាងផ្នែកសុខាភិបាលវិញ ក៏ត្រូវកាត់បន្ថយពីប្រមាណ ១៨% ទៅ ៣៧%ផងដែរ។
ចុះផ្សាយនៅថ្ងៃ៖
ស្តាប់ - ០២:១៧
សហរដ្ឋអាមេរិកនឹងទម្លាក់ជំនួយផ្នែកអភិវឌ្ឍន៍ និងសេដ្ឋកិច្ចដល់កម្រិតសូន្យតែម្តងនៅឆ្នាំ ២០១៨ និងកាត់បន្ថយជំនួយជាអតិបរមាខណៈដែលមន្ត្រីរដ្ឋាភិបាលបានមើលឃើញថាជានិន្នាការសម្រាប់ប្រទេសដែលមានសេដ្ឋកិច្ចរឹងមាំ។ ចំពោះកម្ពុជា ជំនួយអភិវឌ្ឍន៍ពីសហរដ្ឋអាមេរិកសម្រាប់ឆ្នាំ ២០១៨លែងមានទៀតហើយ ខណៈដែលឆ្នាំ ២០១៦ មាន ៣៤,៧៥លានដុល្លារ ទន្ទឹមនឹងនេះជំនួយគាំទ្រសេដ្ឋកិច្ចក៏ត្រូវលុបចោលផងដែរ ខណៈដែលឆ្នាំ ២០១៦មានចំនួន ៨លានដុល្លារ។ ដោយឡែកជំនួយសុខភាពពិភពលោករបស់រដ្ឋាភិបាល ត្រូវបានកាត់បន្ថយមកត្រឹម ៥លានដុល្លារ ដែលត្រូវកាត់បន្ថយ ១៨.៣%។ ចំណែកឯគម្រោងសុខភាពដែលអនុវត្តដោយទីភ្នាក់ងារ USAID ក៏ត្រូវបានបន្ថយមកត្រឹម ១៧,៨៥លានដុល្លារដែលត្រូវកាត់បន្ថយ ៣៧,៤ %។
ចំពោះការកាត់បន្ថយនេះ រដ្ឋាភិបាលកម្ពុជាដែលតែងតែរិះគន់អាមេរិកាំងថាចូលចិត្តលូកលាន់កិច្ចការផ្ទៃក្នុងខ្លួននោះ បានអះអាងថាការកាត់បន្ថយនេះ គឺជានិន្នាការនៃការរីកចម្រើនសេដ្ឋកិច្ចកម្ពុជាដែលប្រទេសមួយនេះមានកំណើនក្នុងរង្វង់ប្រមាណ ៧%សឹងជារៀងរាល់ឆ្នាំ។ លោកផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី្ បានបន្តថា ការកាត់បន្ថយនេះគឺដោយសារគោលនយោបាយថ្មីរបស់អាមេរិកាំង និងបញ្ហាប្រឈមផ្នែកថវិកានៃរដ្ឋបាលអាមេរិកខ្លួនឯងដែរ។ ទន្ទឹមនឹងនេះ សង្គមស៊ីវិលដែលពឹងពាក់ជំនួយពីបរទេសក៏ត្រូវចេះរកមូលនិធិ និងត្រៀមខ្លួនបណ្តើរសម្រាប់និន្នាការយ៉ាងដូច្នេះផងដែរ។
ជាអង្គការដែលទទួលជំនួយពីសហរដ្ឋអាមេរិក លោកសន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា បានបង្ហាញពីក្តីព្រួយបារម្ភបំផុតព្រោះថាវានឹងប៉ះពាល់ទៅដល់ដំណើរការនៃសេវាសង្គម និងដំណើរការក្នុងរដ្ឋបាលសាធារណៈផងដែរ។ ជាពិសេស លោក សន ជ័យ បានព្រួយបារម្ភចំពោះក្រុមអង្គការសង្គមស៊ីវិលណាដែលធ្វើការស្តីពីសិទ្ធិមនុស្ស និងការគោរពប្រជាធិបតេយ្យខ្លាំងជាងគេ។
ទន្ទឹមនឹងនេះ ក្រុមអ្នកវិភាគបានលើកឡើងថា ការកាត់បន្ថយកម្រិតធំរបស់អាមេរិកាំងនេះនឹងធ្វើឱ្យឥទ្ធិពលនយោបាយចុះខ្សោយ ប្រឈមនឹងការកើនឡើងឥទ្ធិពលមហាយក្សចិននៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ