កម្ពុជាមានជំហររឹងមាំ និងសង្ឃឹមមានប្រៀបជាងវៀតណាមលើបញ្ហាដាក់ដាំ
មន្ត្រីកិច្ចការព្រំដែនកម្ពុជាថាមិនទាន់មានការកំណត់ជជែកគ្នាជាមួយភាគីវៀតណាមជាថ្មីទេ លើតំបន់ដាក់ដាំ ខណៈដែលបញ្ហានេះបានកក្រើកជាថ្មីតាមរយៈការអះអាងរបស់ក្រសួងការបរទេសវៀតណាមនៅដើមសប្តាហ៍នេះថាជាទឹកដីរបស់វៀតណាម។ ការលើកឡើងនេះជាការឆ្លើយតបទៅនឹងសុន្ទរកថារបស់លោកនាយករដ្ឋមន្ត្រី ហ៊ុន សែន កាលពីខែតុលានៅប្រទេសបារាំង។ ទោះយ៉ាងនេះក្តី មន្ត្រីព្រំដែនកម្ពុជាបញ្ជាក់ថាកម្ពុជាមានជំហររឹងមាំលើការចរចាស្តីពីទឹកដីដាក់ដាំ បើទោះណាកន្លងមកភាគីទាំងពីរបានប្រកាន់យករៀងៗខ្លួនក៏ដោយ។
ចុះផ្សាយនៅថ្ងៃ៖
ស្តាប់ - ០២:១៤
បន្ទាប់ពីស្ងាត់អស់មួយរយៈ នៅផ្នែកខាងក្នុងប្រទេសកម្ពុជា បញ្ហាព្រំដែនកម្ពុជា-វៀតណាម ត្រូវបានបង្ហើបចេញពីក្រុងហាណូយមកវិញ នៅដើមសប្តាហ៍នេះ។ បើទោះណាជាបញ្ហាទឹកដីតំបន់ដាក់ដាំនេះទទួលបានការចាប់អារម្មណ៍ថ្មីឡើងវិញ ក៏ប៉ុន្តែរវាងអ្នកជំនាញព្រំដែន កម្ពុជា-វៀតណាម ធ្លាប់បានជជែកគ្នាច្រើនដងហើយ តែមានជំហររៀងៗខ្លួន។ នេះបើតាមការបញ្ជាក់របស់លោកស្រី កុយ ពិសី អនុប្រធានគណៈកម្មការព្រំដែនកម្ពុជា។ ព្រមទាំងបញ្ជាក់ថានៅមិនទាន់មានគម្រោងជជែកគ្នាជាថ្មីនៅពេលណាទេ ខណៈដែល គណៈកម្មការព្រំដែនកម្ពុជា សង្ឃឹមទៅលើឯកសារសម្រាប់អះអាងដែលថា កម្ពុជាមានសេចក្តីសម្រេចរបស់អគ្គទេសាភិបាលបារាំងនៅឆ្នាំ១៩១៤ ខ្សែព្រំដែនតាមព្រែកដាក់ហ៊ូត។
ការលើកឡើងរបស់អនុប្រធានគណៈកម្មការព្រំដែនកម្ពុជានៅពេលនេះ បានធ្វើឡើងបន្ទាប់ពីប្រព័ន្ធផ្សព្វផ្សាយOnline វៀតណាមផ្សាយជា៥ភាសាឈ្មោះ Vietnamplus កាលពីថ្ងៃទី២វិច្ឆិកា ដែលបានដកស្រង់សំដីអ្នកនាំពាក្យក្រសួងការបរទេសវៀតណាមលោក Le Hai Binh ថា វៀតណាមមានអធិបតីភាពពេញលេញទៅលើទឹកដីនៅតំបន់ព្រំដែនដាក់ដាំនៃខេត្តដាក់ណុងប្រទេសវៀតណាម ឈមគ្នានឹងខេត្តរតនគីរីប្រទេសកម្ពុជា។
សេចក្តីថ្លែងការណ៍របស់ក្រសួងការបរទេសវៀតណាមបញ្ជាក់ថា វៀតណាមមានមូលដ្ឋានច្បាប់ប្រវត្តិសាស្ត្រគ្រប់គ្រាន់ ក្នុងការបង្ហាញថាតំបន់ដាក់ដាំស្ថិតក្នុងបូរណភាពទឹកដីពេញលេញរបស់វៀតណាម។
ប្រតិកម្មរបស់ក្រសួងការបរទេសវៀតណាមគឺឆ្លើយតបទៅនឹងការលើកឡើងរបស់លោកនាយករដ្ឋមន្ត្រី ហ៊ុន សែន ដែលបានថ្លែងនៅក្នុងជំនួបជាមួយពលរដ្ឋខ្មែរនិងនិស្សិត ឯប្រទេសបារាំងកាលពីចុងខែតុលាកន្លងទៅ ដែលថាវៀតណាមបានចរចាក្រៅផ្លូវការជាមួយលោក ដោយភាគីវៀតណាម យកតំបន់ដាក់ដាំ៦០% ហើយឲ្យកម្ពុជា៤០% ប៉ុន្តែលោកនាយករដ្ឋមន្ត្រីមិនព្រម ព្រមទាំងចាត់ទុកថាទីតាំងនោះជាដែនដីអធិបតីរបស់កម្ពុជា។
ជាមួយគ្នានេះ គណៈកម្មការព្រំដែនកម្ពុជាអះអាងថា រាល់ការចរចាកម្ពុជាតែងប្រកាន់យកជំហរដូចអ្វីដែលប្រមុខរដ្ឋាភិបាលបានលើកឡើង ហើយថាវាជាជំហរដ៏រឹងមាំនិងមានប្រៀបផងដែរលើបញ្ហាព្រំដែនរវាងកម្ពុជានិងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ