ក្រសួងកិច្ចការនារី៖ អំពើហិង្សាលើស្រ្តីនៅកន្លែងធ្វើការមានការថយចុះ
យុទ្ធនាការគ្មានអំពើហិង្សាលើស្រ្តីនៅកន្លែងធ្វើការ ត្រូវបានក្រសួងកិច្ចការនារី អះអាងថា មានការថយចុះគួរឲ្យកត់សម្គាល់។ ទោះបីជារបាយការណ៍ផ្លូវការមិនទាន់បានចេញផ្សាយយ៉ាងណាក៏ដោយ មន្រ្តីទទួលបន្ទុកគម្រោងនេះ បានបញ្ជាក់ថា ម្ចាស់ហាងគ្រឹះស្ថានកម្សាន្ត បានចុះហត្ថលេខាធ្វើការក្នុងភាពជាដៃគូលើកម្មវិធីកន្លែងធ្វើការគ្មានអំពើហិង្សា ចំនួន ២៥៦ ហាង និងផ្តល់សម្ភារៈសម្រាប់តាំងបង្ហាញចំនួន ៩៦ ហាង។ សង្គមស៊ីវិលដែលធ្វើការពាក់ព័ន្ធនឹងស្រ្តី បានសាទរចំពោះការថយចុះនេះ។
ចុះផ្សាយនៅថ្ងៃ៖
ស្តាប់ - ០១:៤៧
តាមរបាយការណ៍របស់ក្រសួងកិច្ចការនារី បើប្រៀបធៀបនឹងយុទ្ធនាការកាលពីពេលកន្លងទៅ នៅឆ្នាំ ២០១៤ ស្រ្តីធ្វើការនៅកន្លែងកម្សាន្ត រងការបៀតបៀន និងប្រើប្រាស់អំពើហិង្សា មានរហូតទៅដល់ ៨៣ ភាគរយ ក៏ប៉ុន្តែនៅក្នុងឆ្នាំ ២០១៦ នេះ ស្រ្តីដែលរងការបៀតបៀន និងអំពើហិង្សា មានចំនួន ៥៣%។
មិនត្រឹមតែប៉ុណ្ណោះ ក្រសួងកិច្ចការនារី និងស្ថាប័នពាក់ព័ន្ធ ក៏បានបញ្ជ្រាបការយល់ដឹងទៅដល់ប្រជាពលរដ្ឋ ដែលជាក្រុមគោលដៅមួយចំនួន រួមមាន អ្នករត់ម៉ូតូកង់បី បានចំនួន ១៤០នាក់ និងអ្នករត់ម៉ូតូឌុបជាដើម ព្រោះថា ពួកគេអាចជាភ្នាក់ងាររាយការណ៍ពី អំពើហិង្សាលើស្រ្តីនៅតាមទីតាំងនានា យ៉ាងឆាប់រហ័ស។ ជាមួយគ្នានេះ ប្រជាពលរដ្ឋទូទៅ អាចរាយការណ៍ពាក់ព័ន្ធនឹងអំពើហិង្សាលើស្រ្តីគ្រប់រូបភាព តាមលេខទូរស័ព្ទ ១២៨៨ ដោយពុំគិតថ្លៃ ដើម្បីផ្តល់ដំណឹងទៅកាន់អាជ្ញាធរ ឲ្យចុះអន្តរាគមន៍។
សូមបញ្ជាក់ថា នៅក្នុងសិក្ខាសាលាបូកសរុបលទ្ធផលការអនុវត្តគម្រោងកន្លែងធ្វើការមានសុវត្ថិភាព សហគមមានសុវត្ថិភាព ដែលមានរយៈពេលបីឆ្នាំ ក្រសួងកិច្ចការនារី បានបង្ហាញពីភាពវិជ្ជមាននៃការកាត់បន្ថយអំពើហិង្សាលើស្រ្តីនៅកន្លែង ដូចជា ក្លឹបកម្សាន្តរាត្រី បៀរហ្គាឌិន និងរោងចក្រ ជាដើម។ យុទ្ធនាការនេះ គឺកិច្ចសហការណ៍រវាងក្រសួងកិច្ចការនារី និងអង្គការ Care។ យុទ្ធនាការនេះ ធ្វើឡើងក្នុងគោលបំណងលើកកម្ពស់សិទ្ធិ និងសេចក្តីថ្លៃថ្នូរ របស់ស្រ្តីដែលបម្រើការងារក្នុងវិស័យកាត់ដេរ វិស័យសណ្ឋាគារ និងបដិសណ្ឋារកិច្ចក្នុងទីក្រុងភ្នំពេញ ឲ្យកាន់តែមានសុវត្ថិភាព ជៀសផុតពីអំពើហិង្សា ជាពិសេសការបៀតបៀនផ្លូវភេទនៅកន្លែងធ្វើការ។ ក៏ប៉ុន្តែបន្ទាប់ពីបញ្ចប់គម្រោងនេះ អង្គការCare ដែលជាអ្នកផ្តល់ជំនួយហិរញ្ញវត្ថុនៃគម្រោងនេះ បានប្រកាសថា នឹងបង្វែរថវិកាទៅជួយដល់គម្រោងផ្សេងវិញ។
ជុំវិញយុទ្ធនាការកាត់បន្ថយនៃការប្រើប្រាស់អំពើហិង្សាលើស្រ្តីនៅកន្លែងធ្វើការនេះ លោក អ៊ូ រតនៈ នាយកប្រតិបត្តិ សមាគមសុខភាពប្រជាជន និងជាសមាជិកបណ្តាញបុរស សាទរចំពោះកិច្ចខិតខំប្រឹងប្រែងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ