លោកជា ចំរើនបង្កើត «គណបក្សកម្ពុជា សេរីភាព» ដោយសាររងភាពអយុត្តិធម៌ច្រើនក្នុងសង្គម
លោកជា ចំរើនដែលជាអតីតតំណាងរាស្ត្ររបស់គណបក្សប្រជាជនកម្ពុជា បានប្រកាសបើកគណបក្សថ្មីមួយមានឈ្មោះថា «គណបក្សកម្ពុជា សេរីភាព» នៅរសៀលថ្ងៃទី ២៥ វិច្ឆិកានេះ នៅឯសណ្ឋាគារ សាន់វេក្នុងទីក្រុងភ្នំពេញ។ លោកជា ចំរើនបានបញ្ជាក់ថា លោកធ្លាប់បានជួបនូវរឿងអយុត្តិធម៌ជាច្រើននៅក្នុងសង្គមខ្មែរ ជាក់ស្តែងករណីប្តឹងផ្តល់នៅតុលាកាជាដើម។ លោកបានអះអាងថាមានគ្រប់ឯកសារដើម្បីគាំទ្រក្តីទាំងអស់ ប៉ុន្តែចុងក្រោយលោកនៅតែជាអ្នកចាញ់ហើយត្រូវបាត់បង់លុយកាក់ និងដីធ្លីអស់ជាច្រើន។
ចុះផ្សាយនៅថ្ងៃ៖
ស្តាប់ - ០១:៤៩
ដោយសារតែឃើញភាពអយុត្តិធម៌ក្នុងសង្គមច្រើន ហើយមិនអាចទ្រាំបានតទៅទៀត លោកជា ចំរើន អតីតតំណាងរាស្ត្ររបស់គណបក្សប្រជាជនកម្ពុជា បានសម្រេចចិត្តបង្កើតគណបក្សនយោបាយមួយថ្មី ក្រោមឈ្មោះថា គណបក្សកម្ពុជា សេរីភាព។ គណបក្សនេះត្រូវបានបង្កើតឡើងក្នុងគោលបំណងសំខាន់ៗដូចជាបង្កើតសិទ្ធិសេរីភាព និងមុខរបរការងារឲ្យយុវជន ស្វែងរកយុត្តិធម៌ឲ្យអ្នកដែលរងនូវអំពើអយុត្តិពីប្រព័ន្ធតុលាកា ជួយកសិករ និងស្វែងរកការតម្លើងប្រាក់ឈ្នួលជូនដល់កម្មករ។
លោកជា ចំរើនបានបញ្ជាក់ច្បាស់ៗ នៅមុខអ្នកសារព័ត៌មានជាច្រើនសិបនាក់ថា លោកបង្កើតគណបក្សនេះឡើងមិនមែនដើម្បីបំបែកសម្លេងគណបក្សប្រឆាំង ហើយក៏មិនមែនបង្កើតឡើងក្រោមការបង្គាប់បញ្ជារបស់គណបក្សកាន់អំណាចដែរ។ គឺលោកបង្កើតឡើងដោយឆន្ទនៈផ្ទាល់ ដោយលោកហានស្បថដាក់អាយុជីវិត ហើយប្រសិនបើត្រូវដើរចូលគុកនោះ លោកនឹងដើរចូលភ្លាម ដោយលោកនឹងមិនគេចវេសទៅក្រៅប្រទេសឡើយ។
នៅត្រង់ចំណុចនេះលោកក៏បានបង្ហាញពី ជោគជ័យរបស់លោកស្រីអ៊ុង សានស៊ូជីមេដឹកនាំបក្សប្រឆាំងនៅភូមា ដែលទើបតែទទួលបានជ័យជំនះយ៉ាងច្រើនពីការបោះឆ្នោតជាតិកាលពីពេលកន្លងទៅថ្មីនេះៗផងដែរ។ លោកជា ចំរើនបានបង្ហាញពីជំហរក្នុងការធ្វើនយោបាយនៅកម្ពុជាថា លោកមិនខ្លាចនិងសេចក្តីស្លាប់ទៀតនោះទេ ហើយលោកនឹងលះបង់ខ្លួនឯងដើម្បីនៅជាមួយប្រជាពលរដ្ឋកម្ពុជា បើទោះបីជាលោកត្រូវគេចាប់ដាក់គុកក៏ដោយ។
ក្នុងបទសម្ភាសន៍ជាមួយនិងវិទ្យុបារាំង លោកជា ចំរើនបានបង្ហើបឲ្យដឹងថា លោកបានចំណាយលុយផ្ទាល់ខ្លួនប្រមាណជា១លានទៅ៣លានដុល្លាអាមេរិកដើម្បីបង្កើតគណបក្សកម្ពុជា សេរីភាពនេះឡើង។ ហើយលោកសង្ឃឹមថាគណបក្សនេះនឹងទទួលបានសំលេងច្រើនក្នុងការបោះឆ្នោតជាតិនៅឆ្នាំ ២០២៣។
សូមបញ្ជាក់ផងដែរ រហូតមកទល់នឹងពេលនេះ គណបក្សកម្ពុជា សេរីភាពកំពុងតែស្ថិតក្នុងដំណាក់កាលស្ទង់មតិពីប្រជាពលរដ្ឋជាមុនសិន មុននឹងសម្រេចដាក់លិខិតសុំអនុញ្ញាតិបង្កើតគណបក្សថ្មីមួយនេះ នៅក្រសួងមហាផ្ទៃនៅថ្ងៃទី ២៥ ធ្នូ ឆ្នាំ ២០១៥ខាងមុខនេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ