ប៉េកាំងបើកអង្កេតស្វែងរកយន្តហោះម៉ាឡេស៊ីបាត់លើទឹកដីចិន
ចុះផ្សាយនៅថ្ងៃ៖
ស្តាប់ - ០៧:៣៨
១០ថ្ងៃមកហើយ ដែលយន្តហោះម៉ាឡេស៊ីអ៊ែរឡាញ បានបាត់ស្រមោល ពីកញ្ចក់រ៉ាដា។ ការស៊ើបអង្កេត កំពុងផ្តោតទៅលើអ្នកបើកបរទាំងពីររូប និងអ្នកដំណើរទាំងជាងពីររយនាក់។ ក៏ប៉ុន្តែ ចិនទើបនឹងបានប្រកាសឲ្យដឹងថា ខ្លួនមិនឃើញមានអ្នកដំណើរជនជាតិចិនណាម្នាក់ មានប្រវត្តិជាប់ពាក់ព័ន្ធនឹងក្រុមភេរវជនទេ។ ក្នុងពេលជាមួយគ្នានេះ ចិនក៏បានឲ្យដឹងផងដែរថា នឹងចាប់ផ្តើមបើកប្រតិបត្តិការរុករកយន្តហោះ នៅលើដីគោក ក្នុងទឹកដីរបស់ចិន។ ឯការរិះគន់អំពីចំណាត់ការយឺតយ៉ាវ និងលាក់ព័ត៌មាន មានកាន់តែច្រើនឡើងៗ ពីសំណាក់សហគមន៍អន្តរជាតិ និងពីសំណាក់អ្នកនយោបាយក្នុងស្រុករបស់ម៉ាឡេស៊ីផ្ទាល់។ គ្រួសារអ្នកដំណើរក្នុងយន្តហោះដែលភាគច្រើនជាជនជាតិ បានគំរាមថានឹងធ្វើកូដកម្មបង្អត់អាហារខ្លួនឯងផង។
កាលពីថ្ងៃសៅរ៍ នាយករដ្ឋមន្ត្រីម៉ាឡេស៊ី បានធ្វើសន្និសីទកាសែត ផ្តល់ព័ត៌មានចុងក្រោយថ្មីទាក់ទងនឹងការបាត់យន្តហោះ ! គឺចាប់ពេលនោះហើយដែលគេបានដឹងជាផ្លូវការថា យន្តហោះហោះចេញពីក្រុងកូឡាឡាំពួ ទៅកាន់ក្រុងប៉េកាំង បាន បកក្រោយ បញ្ច្រាសទិស បន្ទាប់ពីហោះចេញបានមួយម៉ោង។
ប៉េកាំង បើកប្រតិបត្តិការរុករកយន្តហោះនៅលើទឹកដីចិន
តាមរយៈសេណារីយោថ្មីនោះ ក្រុមអ្នកអង្កេតបានមើលឃើញ គន្លងផ្លូវជាអាទិភាពពីរសំខាន់ៗ ដែលយន្តហោះMH៣៧០ អាចជ្រើសរើសជាទិសដៅ គឺគន្លងខាងត្បូង ចេញពីឥណ្ឌូណេស៊ី ចុះទៅមហាសមុទ្ទឥណ្ឌា និងគន្លងខាងជើង ពីថៃទៅកាហ្សាក់ស្ថាន ទួគ្មេគីស្ថាន។ គឺគន្លងខាងជើងនេះហើយ ដែលទិសដៅនៃប្រតិបត្តិការរុករករបស់ចិន ព្រោះគន្លងនេះស្ថិតនៅចំតំបន់ស្វ័យតទីបេ និងតំបន់ស៊ីងជាំង។
ម៉ាឡេស៊ីធ្លាប់បានស្នើសុំពីគ្រប់ប្រទេសដែលមានពាក់ព័ន្ធ ជួយ និងម្យ៉ាងទៀតអ្នកដំណើរភាគច្រើនជាងជនជាតិចិន បើទោះបីជាចិនខឹងសម្បារនឹងម៉ាឡេស៊ីយ៉ាងណាក៏ត្រូវតែប្រឹងស្វែងរកយន្តហោះនោះដែរ។ ប៉ុន្តែ ចិនខ្លួនឯងក៏ត្រូវការចង់បាន ចង់ដឹងហេតុផលនៃគ្រោះថ្នាក់នេះដែរ ចិនដំបូងឡើយព្រួយបារម្ភខ្លាចថាជាអំពើភេរវកម្មប្រឆាំងនឹងខ្លួនផង បើយោលទៅលើបរិបទនយោបាយបច្ចុប្បន្ន និងយោលទៅលើសេចក្តីសន្និដ្ឋានថាការបាត់យន្តហោះនេះ ជាសា្នដៃ ប៉ុនប៉ងធ្វើដោយមានចេតនាពីបុគ្គលណាម្នាក់ជិះក្នុងយន្តហោះ។
ម៉ាឡេស៊ីប្រឈមនឹងការរិះគន់ ចំពោះចំណាត់ការយឺតយ៉ាវ និងលាក់ព័ត៌មាន
អ្នកដែលស្រែកព្រមានប្រើពាក្យធ្ងន់ៗខ្លាំងជាងគេ គឺវៀតណាម។ វៀតណាមគំរាមថានឹងឈប់ជួយ ប្រសិនប្រើម៉ាឡេស៊ី មិនព្រមផ្តល់ព័ត៌មានឱ្យអស់សេចក្តី ទាន់ពេលវេលា។ ឥណ្ឌាដែលបានចូលរួមរុករកយន្តហោះដែរ នៅតែមិនអស់មិនហើយ មិនជឿលើសម្មតិកម្មដែលថា យន្តហោះMH៣៧០ អាចហោះហើរលើគន្លងដែនអាកាសខាងជើង ឆ្លងប្រទេសមួយទៅមួយ ឆ្លងព្រំដែនប៉ាគីស្ថាន ដោយគ្មាននរណាចាប់អារម្មណ៍សោះ ព្រោះកាលពីខែមុន គ្រាន់តែបាល់វាស់សីតុណ្ហភាព ហោះលើអាកាសក៏រ៉ាដាចាប់បាន។
ចិន សម្តែងការក្រេវក្រោធខ្លាំង ឆ្ងល់ថាហេតុអ្វីបានជាម៉ាឡេស៊ី លាក់ព័ត៌មាន ? ហេតុអ្វីបានជារដ្ឋាភិបាលគ្មានតម្លាភាព ? គ្មានតម្លាភាព អសមត្ថភាព ដែលនេះសបញ្ចាក់យ៉ាងច្បាស់ឥរិយាបថរបស់រដ្ឋាភិបាលម៉ាឡេស៊ី ! នេះបើតាមការចោទប្រកាន់របស់ប្រមុខបក្សប្រឆាំងម៉ាឡេស៊ី លោកអាន់វា អ៊ីប្រាហ៊ីម ដែលវិទ្យុបារាំងអន្តរជាតិជាភាសាបារាំងនឹងអញ្ជើញមកធ្វើជាភ្ញៀវនៅថ្ងៃនេះ។
ចំណែកសហរដ្ឋអាមេរិក ដែលបានចូលជួយម៉ាឡេស៊ីតាំងពីដំបូងភ្លាម ពេលនេះបានប្រកាសដកនាវាចម្បាំងចេញពីប្រតិបត្តិការរុករកក្នុងសមុទ្ទឥណ្ឌា មិនដឹងថាមកពីខឹងម៉ាឡេស៊ីឬយ៉ាងណាទេ ប៉ុន្តែបើតាមហេតុផលផ្លូវការ គឺមកពីនាវាប្រភេទនេះ មិនឆ្លើយតបទៅនឹងប្រតិបត្តិការស្វែងរកក្នុងមហាសាគរដ៏ធំធេង គ្មានកោះគ្មានត្រើយ ដោយទុកតែយន្តហោះប៉ុន្មានគ្រឿងប៉ុណ្ណោះ។
ហេតុអ្វី គ្មានសញ្ញា និងប្រតិកម្មអ្វីសោះ អ្នកដំណើរ ជិះ ក្នុងយន្តហោះ ?
ការស្រាវជ្រាវរុករកគ្មានភាពជឿនលឿន ជាហេតុធ្វើការបំប៉ោងព័ត៌មាន មានគ្រប់យ៉ាង ! ចម្ងល់មានកាន់តែច្រើន ! អ្នកអង្កេតបានដឹងថា យន្តហោះបន្ទាប់ពីបាត់ខ្លួន នៅបន្តហោះហើរ ពី៦ទៅ៧ម៉ោងទៀត ការស្រាវជ្រាវ ចិន អឺរ៉ុបអាមេរិក សុទ្ធតែបង្ហាញថាអ្នកដំណើរ និងអ្នកបំរើការក្នុងយន្តហោះ គ្មានប្រវត្តិពាក់ព័ន្ធនឹងពួកភេរវជនទេ ប៉ុន្តែហេតុអ្វីបានជាគ្មានអ្នកដំនើរណាម្នាក់ សាកល្បងផ្តល់សារមកដី តាមរយៈប្រព័ន្ធសង្គម ទ្វីតទ័រ ឬទម្រង់ទូរគមនាគមន៍អ្វីផ្សេងទៀតសោះដូច្នេះ ? ចម្ងល់នេះមិនប្លែកឡើយ ព្រោះកាលពីឆ្នាំ២០០១ ដែលពួកចោរសមុទ្ទបានបង្វែរដានយន្តហោះអាមេរិក អ្នកដំណើរអាចបញ្ជូនដំណឹងមកឱ្យក្រុមគ្រួសារតាមទូរស័ព្ទបាន ហើយកាលពីរដូវក្តៅឆ្នាំ២០១៣ ក្នុងពេលធ្លាក់យន្តហោះ នៅសាន់ហ្វាន់ស៊ីហ្កូ អ្នករួចពីស្លាប់ម្នាក់ បានបញ្ជូនសារនិងរូបថតតាមទ្វីតទ័រមក តែក្នុងករណីអ្នកដំណើរក្នុងយន្តហោះម៉ាឡេស៊ីអ៊ែរឡាញនេះ គឺគ្មានអ្វីទាល់តែសោះ ស្ងាត់ឈឹងយ៉ាងចម្លែកបំផុតតែម្តង។
អ្នកឯកទេសយល់ថាទំនងមកពីអ្នកដំណើរមិនចាប់អារម្មណ៍ថាមានការបង្វែរទិស ឬត្រូវបំពុលឱ្យដេកលក់អស់ ដោយយន្តហោះឡើងខ្ពស់ពេក នាំខ្វះខ្សល់អ៊ុកស៊ីហ្សែន និងធ្វើឱ្យអស់សេវា ទូរស័ព្ទបិទ ឬប្រើមូដជិះយន្តហោះ។ ចុះសេវា សម្រាប់អ្នកដំណើរថ្នាក់លេខមួយ ?! សេវាទូរគមនាគមន៍ផ្ទៃក្នុងក៏ទំនងជាត្រូវបិទទៀត។ នៅក្នុងពិភពលោកបច្ចុប្បន្ន ទូរស័ព្ទមានវត្តមានជាប្រចាំទៅហើយបែរគ្មានឃើញសញ្ញាសាកល្បងណាមួយសោះ ស្ងាត់ឈឹងទៅវិញ ! ដូច្នេះវាជារឿងធម្មតាទេ ដែលក្រុមអ្នកអង្កេត អ្នកបើកបរ និងអ្នកឯកទេសនោះ ត្រូវចោទសួរពិចារណាគ្នាជុំវិញបញ្ហានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ