ចិន៖ប្រមុខចារកិច្ចបានខ្ទាតពីអំណាច និងឃុំខ្លួនពីបទពុករលួយ
នៅប្រទេសចិន រដ្ឋអំណាចបានប្រកាសឲ្យដឹងនៅថ្ងៃសុក្រ ទី១៦ មករាពីការឃុំខ្លួនលោក ម៉ា ចៀន ប្រមុខចារកិច្ច និងជាអនុរដ្ឋមន្រ្តីក្រសួងសន្តិសុខរដ្ឋក្នុងបទចោទប្រកាន់រឿងពុករលួយ។ លោកម៉ា ចៀនដែលត្រូវបានគេដាក់ងារឲ្យថា ជា KGB ចិន គឺជាឥស្សរជនដ៏មានឥទ្ធិពលម្នាក់នៅក្នុងសេវាចារកិច្ច និងប្រឆំាងចារកិច្ចរបស់ប្រទេសចិនអស់ជាច្រើនឆ្នំាមកហើយ។ យ៉ាងណាក៏ដោយ ការឃុំខ្លួនលោកម៉ា ចៀនពេលនេះជាសក្ខីកម្មថ្មីដែលបញ្ជាក់ពីយុទ្ធនាការប្រឆំាងអំពើពុករលួយរបស់លោកប្រធានាធិបតីស៊ី ជីនពីង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
រដ្ឋអំណាចចិនបានចាប់ឃុំលោកម៉ា ចៀនក្រោមបទចោទប្រកាន់ថា លោកបានរំលោភបំពានលើវិន័យរបស់បក្ស តែនេះគ្រាន់តែជាភាសាផ្លូវការមួយដែលរបបកុម្មុយនិស្តបានយកមកប្រើប៉ុណ្ណោះ ព្រោះតាមពិតទៅនោះ គឺគេចង់និយាយសំដៅរឿងពុករលួយតែម្តង។ គួររម្លឹកជូនថា នៅក្នុងជួរថ្នាក់ដឹកនំាក្រសួងសន្តិសុខរដ្ឋនេះដែរ រដ្ឋអំណាចក៏ធា្លប់បានកំចាត់ឥស្សរជនជាន់ខ្ពស់ចេញពីអំណាចក្នុងរឿងពុករលួយដូចគ្នា។ ជាក់ស្តែងថ្មីៗនេះ លោកហ្ស៊ូ យ៉ុងកងដែលជាប្រធានសន្តិសុខផ្ទែក្នុង និងធ្លាប់ជាសមាជិកនៃគណៈកម្មការអចិន្រ្តៃយ៍របស់បក្សត្រូវបានចាប់ខ្លួន និងបណ្តេញចេញពីបក្សក៏ដោយសាររឿងអាស្រូវពុករលួយ។ ខណៈនេះ លោកយ៉ុងកងកំពុងរង់ចំាថ្ងៃកាត់ទោស។
និយាយពីមុខងាររបស់លោកម៉ា ចៀនវិញ ក្នុងនាមជាប្រមុខចារកិច្ច លោកមានតួនាទីជាអ្នករៀបចំយុទ្ធសាស្រ្តក្នុងការប្រឈមទប់នឹងក្រុមប្រឆំាង ដោយប្រមែប្រមូលរាល់ព័ត៌មានដែលមាននៅក្នុងប្រទេសចិន និងពីបរទេស។ ទស្សនាវដ្តីសេដ្ឋកិច្ចប្រចំាសប្តាហ៍របស់ចិនមួយឈ្មោះ Caixin ឲ្យដឹងថា រូបលោកម៉ា ចៀនធ្លាប់បានបម្រើការងារនៅក្នុងក្រសួងសន្តិសុខរដ្ឋអស់ជាច្រើនទសវត្សតំាងពីលោកបានបញ្ចប់ការសិក្សានៅមហាវិទ្យាល័យក្នុងទសវត្សឆ្នំា ៨០។ ទន្ទឹមគ្នានេះ និងបើយោងតាមសារព័ត៌មានចិន លោកម៉ា ចៀនក៏មានជាប់ពាក់ព័ន្ធនឹងជម្លោះនៅក្នុងក្រុមហ៊ុន Founder Group ដែលថ្នាក់ដឹកនំារបស់ក្រុមហ៊ុនមួយនេះទើបបានចាប់ខ្លួនកាលពីខែធ្នូ ឆ្នំា ២០១៤ ពីបទលួចបង្វែរលុយរាប់សិបលានយ័ន។
ក្នុងសប្តាហ៍នេះដែរ កាសែតចេញផ្សាយនៅហុងកុងឈ្មោះ South China Morning Post បានបញ្ជាក់ពីទំនាក់ទំនងជិតស្និទ្ធិរវាងលោកម៉ា ចៀន និងលោកលីង ជីហួរ អតីតប្រធានខុទ្ទកាល័យរបស់លោកអតីតប្រធានាធិបតីចិនហូ ជិនតាវ និងដែលរូបលោកលីង ជីហួរក៏កំពុងជាប់ឃុំពីរឿងអាស្រូវពុករលួយដែរ។ ដូច្នេះឃើញថា តាមរយៈការចាប់ខ្លួនលោកម៉ា ចៀនពេលនេះជាសក្ខីកម្មថ្មីដែលបញ្ជាក់ពីយុទ្ធនាការប្រឆំាងអំពើពុករលួយប្រកាសដោយលោកប្រធានាធិបតីស៊ី ជីនពីង។ លោកស៊ីដែលបានប្តេជ្ញាកំចាត់អំពើពុករលួយនៅគ្រប់ស្ថានប័ន និងគ្រប់ជាន់ថ្នាក់ តំាងពីសត្វខ្លា ដល់សត្វមូស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ