យុទ្ធសាស្ត្រថ្មីរបស់ចិនក្នុងជម្លោះដែនកោះសមុទ្រចិនខាងត្បូង
ចុះផ្សាយនៅថ្ងៃ៖
ស្តាប់ - ០៤:៣៦
ទន្ទឹមនឹងការបញ្ចៀសសហគមន៍អន្តរជាតិមិនឲ្យលូកដៃចូលក្នុងជម្លោះដែនសមុទ្រចិនខាងត្បូង ទីក្រុងប៉េកាំងក៏បានបង្ហាញយុទ្ធសាស្ត្រថ្មីមួយទៀតក្នុងការហួងហែងដែនកោះដែលមានជម្លោះតាមរយៈការបោះពុម្ពផែនទីដែនកោះទាំងនោះនៅក្នុងលិខិតឆ្លងដែនរបស់ខ្លួន។ បញ្ហានេះបាននិងកំពុងធ្វើឲ្យរំជើបរំជួលជាថ្មីនៅក្នុងតំបន់អាស៊ី។ វៀតណាម និងហ្វីលីពីន ដែលមានជម្លោះខ្លាំងជាងគេជាមួយមហាយក្សចិន កំពុងរិះរកយុទ្ធសាស្ត្ររួមគ្នាដើម្បីទប់ទល់។ យុទ្ធសាស្ត្រថ្មីរបស់ចិនអាចនឹងធ្វើឲ្យកិច្ចពិភាក្សាអំពីក្រមប្រតិបត្តិស្តីពីសមុទ្រចិនខាងត្បូង (COC)រវាងចិននិងអាស៊ានជួបឧបសគ្គជាថ្មី។
ខណៈដែលកិច្ចពិភាក្សាអំពីក្រមប្រតិបត្តិស្តីពីសមុទ្រចិនខាងត្បូង (COC) រវាងចិននិងអាស៊ាន កំពុងដំណើរការ ស្រាប់តែចិនបានចេញលិខិតឆ្លងដែនអេឡិចត្រូនិកប្រភេទថ្មីដែលមានរំលេចដោយផែនទីដែនកោះដែលមានជម្លោះនៅក្នុងនោះផង។ យុទ្ធសាស្ត្រថ្មីរបស់ចិនបានបង្កើតឲ្យមានភាពរំជើបរំជួលជាថ្មីទៀតនៅក្នុងតំបន់អាស៊ី។ បណ្តាប្រទេសដែលមានជម្លោះដណ្តើម ដែនកោះជាមួយចិនក្នុងសមុទ្រចិនខាងត្បូងបានផ្ទុះកំហឹង និងសម្តែងប្រតិកម្មតវ៉ាយ៉ាងខ្លាំង។
ផែនទីដែលរំលេចនៅលើលិខិតឆ្លងដែនថ្មីរបស់ចិន មានរួមបញ្ចូលទាំងកោះមួយចំនួនដែលប្រទេសជិតខាងទាមទារផងដែរ។ តាមរយៈផែនទីថ្មីនេះ ប្រទេសចិនបានហួងហែងយកសមុទ្រចិនខាងត្បូងស្ទើរទាំងស្រុង ដោយកាត់បញ្ចូលស្ទើរតែដល់ឆ្នេរសមុទ្រហ្វ៊ីលីពីន និងម៉ាឡេស៊ី និងដែនកោះដែលវៀតណាមទាមទារ។ ចំណែកឯបន្ទាត់ព្រំដែនគោកវិញ ផែនទីនៅលើលិខិតឆ្លងដែនថ្មីនេះ ក៏បានរាប់បញ្ចូលដែនដីដែលឥណ្ឌាទាមទារផងដែរ។
ជាប្រតិកម្មឆ្លើយតប អាជ្ញាធរវៀតណាមបានសម្តែងការតវ៉ាយ៉ាងខ្លាំងក្លាដោយបានហៅគំនូរផែនទីនៅលើលិខិតឆ្លងដែនរបស់ចិនថាជា«ការរំលោភធ្ងន់» ទៅលើអធិបតេយ្យភាពរបស់វៀតណាម។ ទីក្រុងហាណូយបានបញ្ជូនលិខិតការទូតមួយច្បាប់ភ្លាមទៅស្ថានទូតចិនប្រចាំប្រទេសវៀតណាមដោយសុំឲ្យចិនលុបចោលលិខិតឆ្លងដែននេះទុកជាមោឃៈ ។ លើសពីនេះ វៀតណាមបានបដិសេធមិនបោះត្រាផ្តល់ទិដ្ឋាការឲ្យអ្នកទេសចរចិននៅលើលិខិតឆ្លងដែនដែលមានផែនទីសមុទ្រចិនខាងត្បូងនោះទេ។ ប៉ុន្តែ អាជ្ញាធរវៀតណាមក៏មិនបានរារាំងមិនឲ្យជនជាតិចិនចូលក្នុងទឹកដីរបស់ខ្លួននោះទេ ដោយគ្រាន់តែវៀតណាមផ្តល់ទិដ្ឋាការដោយឡែកមួយជូនជនជាតិចិន។
ប្រទេសហ្វីលីពីននិងកោះតៃវ៉ាន់ក៏មិនបាននៅស្ងៀមដែរ ដោយពួកគេបានប្រឆាំងជំទាស់យ៉ាងខ្លាំងក្លាទៅនឹងរដ្ឋាភិបាលក្រុងប៉េកាំង។ រដ្ឋាភិបាលទីក្រុងម៉ានីលអះអាងថា ខ្លួនកំពុងតែពិចារណាអំពីជម្រើសផ្សេងៗដើម្បីធ្វើសកម្មភាពឆ្លើយតបទៅការហួងហែងរបស់ទីក្រុងប៉េកាំង។ ចំណែកឯប្រទេសឥណ្ឌាវិញ ក៏បានចាត់វិធានការឆ្លើយតបភ្លាមៗទៅនឹងមហាយក្សចិនដែរតាមរយៈយុទ្ធសាស្ត្រផ្ចាញ់ផ្ចាលបែបការទូត។ ទីក្រុងញូវដេលីបានផ្តល់ទិដ្ឋាការឲ្យជនជាតិចិនដោយបោះត្រាដែលមានរូបផែនទីផ្ទាល់មួយរបស់ខ្លួននៅពីលើលិខិតឆ្លងដែនចិនដែលមានរំលេចផែនទីក្តោបយកដែនដីដែលឥណ្ឌាទាមទារ។
គួរបញ្ជាក់ថា ចិនទើបតែបានបោះពុម្ពផែនទីជាផ្លូវការលើកដំបូងនៃទីក្រុងសានសា (Sansha) ដែលទើបតែបង្កើតថ្មីស្ថិតនៅក្នុងសមុទ្រចិនខាងត្បូង។ អ្នកបោះពុម្ពផែនទីនោះបានបញ្ជាក់ថា នេះជាផែនទីលើកដំបូងដែលឆ្លុះបញ្ចាំងអំពីភូគព្ភសាស្ត្រនៃទីក្រុង សានសារបស់ចិន និងដែនកោះក្នុងសមុទ្រចិនខាងត្បូងក្នុងលក្ខណៈទូលំទូលាយ ត្រឹមត្រូវ និងច្បាស់លាស់។ ក្រុមប្រឹក្សារដ្ឋ និងគណៈរដ្ឋមន្ត្រីចិនបានយល់ព្រមកាលពីខែមិថុនាកន្លងទៅឲ្យបង្កើតទីក្រុងសានសានេះឡើងក្នុងខេត្តហៃណាន ដើម្បីគ្រប់គ្រងកោះនិងដែនទឹកជុំវិញនៅក្នុងសមុទ្រចិនខាងត្បូង។
ការបោះពុម្ពផែនទីដែនដី និងដែនកោះដែលមានជម្លោះជាមួយប្រទេសជិតខាងនៅលើលិខិតឆ្លងដែនរបស់ចិននេះគឺជាអធិករណ៍ថ្មីមួយទៀតដែលនឹងដុតរោលជម្លោះក្នុងដែនសមុទ្រចិនខាងត្បូង។ ស្ថានភាពនេះអាចនឹងធ្វើឲ្យកិច្ចពិភាក្សាស្តីពីក្រមប្រតិបត្តិសមុទ្រចិនខាងត្បូងតានតឹងដោយហេតុថា បណ្តាប្រទេសដែលមានជម្លោះជាពិសេសវៀតណាម និងហ្វីលីពីន ដែលជាអ្នកប្រឆាំងចិនយ៉ាងខ្លាំងស្រាប់ផងនោះ អាចនឹងបង្កើនការប្រឆាំងកាន់តែខ្លាំងថែមទៀត។
ជការពិតណាស់ ការបោះពុម្ពផែនទីតំបន់ជម្លោះនៅក្នុងលិខិតឆ្លងដែនរបស់ចិនអាចមានន័យពីរយ៉ាង៖ ទី១ ចិនចង់បញ្ជាក់ថា ដែនដីដែលប្រទេសជិតខាងកំពុងទាមទារនោះជាកម្មសិទ្ធិផ្តាច់មុខ និងស្របច្បាប់របស់ខ្លួនដែលគ្មានអ្នកណាអាចតវ៉ាបាន។ និងទី២ បញ្ហានេះបានធ្វើឲ្យមតិខ្លះយល់ថា ជាការបញ្ឈឺផ្នែកការទូតមួយក៏ថាបាន ពីព្រោះថា បើគ្រាន់តែគូសដែនកោះទាំងនោះទៅក្នុងផែនទីរបស់ខ្លួនអាចមិនមែនជារឿងចម្លែកទេដោយសារតែវាជាដែនដីដែលភាគីមីមួយៗទាមទារ ប៉ុន្តែ ការដាក់ផែនទីនោះក្នុងលិខិតឆ្លងដែនគឺជាយុទ្ធសាស្ត្រដណ្តើមប្រៀបឈ្នះដ៏យ៉ាងច្បាស់ក្រឡែត។ នេះមានន័យថា ចិនកំពុងប្រើយុទ្ធសាស្ត្រចរចាផង និងការដាក់គំនាបផងទៅលើគូទំនាស់។ គឺជាយុទ្ធសាស្ត្រដែលបង្ហាញថាបញ្ហាសមុទ្រចិនខាងត្បូងរឹតតែពិបាកដោះស្រាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ