ប្រតិបត្តិការយោធានៅលីប៊ីនឹងត្រូវផ្ទេរទៅឲ្យអូតង់ទទួលខុសត្រូវ
នៅយប់ថ្ងៃព្រហស្បតិ៍ ២៤ មីនា ២០១១នេះ ប្រទេសសមាជិកអូតង់បានព្រមព្រៀងគ្នាឲ្យអូតង់ទទួលខុសត្រូវ ក្នុងការចាត់ចែងប្រតិបត្តិការល្បាតដែនអាកាសលីប៊ី។ ការផ្ទេរអំណាចទៅឲ្យអូតង់អាចនឹងត្រូវធ្វើ នៅដើមសប្តាហ៍ក្រោយ។ ក៏ប៉ុន្តែ អូតង់នឹងទទួលបន្ទុកតែប្រតិបត្តិការយោធាប៉ុណ្ណោះ។ រាល់ការសម្រេចផ្នែកនយោបាយទាក់ទងនឹងប្រតិបត្តិការនៅលីប៊ី នឹងត្រូវធ្វើឡើងដោយក្រុមការងារដោយឡែកមួយ ដែលត្រូវបានបង្កើតឡើង តាមសំណើរបស់បារាំង។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
អស់រយៈពេលជាច្រើនថ្ងៃមកហើយ ដែលភាពចម្រូងចម្រាស់គ្នាបានកើតមានឡើង ក្នុងចំណោមប្រទេសសមាជិកអង្គការអូតង់ ជុំវិញសំណួរថា តើអ្នកណាត្រូវដឹកនាំប្រតិបត្តិការយោធានៅលីប៊ី?
រហូតមកទល់ពេលនេះ ប្រតិបត្តិការនៅលីប៊ី ត្រូវស្ថិតក្រោមការដឹកនាំរបស់អាមេរិក ដោយមានការសម្របសម្រួលជាមួយបារាំង និងអង់គ្លេស។ ក៏ប៉ុន្តែ អាមេរិក ដែលកំពុងមានសង្រ្គាមពីរនៅក្នុងដៃស្រាប់នោះ (អាហ្វហ្កានីស្ថាន និងអ៊ីរ៉ាក់) មិនចង់ចេញមុខដឹកនាំប្រតិបត្តិការយោធានៅក្នុងប្រទេសអ៊ីស្លាម មួយទៀតទេ។ អាមេរិកចង់ផ្ទេរតួនាទីបញ្ជាទ័ពទៅឲ្យអង្គការអូតង់វិញ។ អង់គ្លេសបានគាំទ្រសំណើរបស់អាមេរិក។ ក៏ប៉ុន្តែ បារាំងបានជំទាស់។
រដ្ឋាភិបាលបារាំងបានលើកហេតុផលថា អូតង់ត្រូវបានគេចាត់ទុកថាជាបក្សសម្ព័ន្ធរបស់លោកខាងលិច។ ដូច្នេះ ប្រសិនបើឲ្យអូតង់ចេញមុខដឹកនាំប្រតិបត្តិការយោធានៅលីប៊ី គេនឹងអាចចោទថា លោកខាងលិចកំពុងឈ្លានពានប្រទេសអ៊ីស្លាម។ ម្យ៉ាងទៀត បើសិនជាប្រតិបត្តិការយោធានៅលីប៊ី ត្រូវដាក់ឲ្យស្ថិតក្រោមបញ្ជារបស់អូតង់នោះ ប្រទេសអារ៉ាប់ដែលចង់មកចូលរួមក្នុងប្រតិបត្តិការនេះ អាចនឹងផ្លាស់ប្តូរចិត្តវិញ។
គួរបញ្ជាក់ថា រហូតមកទល់ពេលនេះ មានប្រទេសអារ៉ាប់ពីរបានព្រមព្រៀងបញ្ជូនយន្តហោះចម្បាំងមកចូលរួម ក្នុងប្រតិបត្តិការយោធានៅលីប៊ី គឺ កាតារ (យន្តហោះ ៤គ្រឿង) និងអេមីរ៉ាតអារ៉ាប់រួម (យន្តហោះ ១២គ្រឿង)។ ការចូលរួមពីសំណាក់ប្រទេសអារ៉ាប់ គឺជារឿងសំខាន់ ដើម្បីចៀសវាងកុំឲ្យគេចោទថា ប្រតិបត្តិការនៅលីប៊ី គឺជាប្រតិបត្តិការរបស់លោកខាងលិច ឈ្លានពានទៅលើប្រទេសអារ៉ាប់។
ក្រោយពីបានតស៊ូមតិគ្នាយ៉ាងស្វិតស្វាញអស់រយៈពេលជាច្រើនថ្ងៃ ប្រទេសសមាជិកអូតង់ទាំង ២៨ (ក្នុងនោះក៏មានប្រទេសបារាំងផងដែរ) បានព្រមព្រៀងគ្នាផ្ទេរប្រតិបត្តិការយោធានៅលីប៊ី ទៅឲ្យអូតង់ជាអ្នកទទួលខុសត្រូវវិញ។ ក៏ប៉ុន្តែ អូតង់ទទួលយកត្រឹមតែប្រតិបត្តិការល្បាតដែនអាកាស ដើម្បីពង្រឹង "តំបន់ហាមឃាត់ការហោះហើរ" តែប៉ុណ្ណោះ។ រីឯប្រតិបត្តិការវាយប្រហារតាមផ្លូវអាកាសទៅលើកងទ័ពជើងគោករបស់លោក កាដាហ្វ៊ីវិញ ប្រទេសជាសមាជិកអូតង់ នៅតែមានការខ្វែងគំនិតគ្នានៅឡើយ។
ដើម្បីជាការសម្រុះសម្រួលជាមួយបារាំង ក្រុមការងារមួយត្រូវបានបង្កើតឡើងដាច់ដោយឡែកពីអូតង់។ ក្រុមការងារនេះមានការចូលរួមពីគ្រប់ប្រទេស ដែលចូលរួមក្នុងប្រតិបត្តិការយោធានៅលីប៊ី ក្នុងនោះ ក៏មានប្រទេសកាតារ អេមីរ៉ាតអារ៉ាប់រួម និងសហព័ន្ធអារ៉ាប់ផងដែរ។ ក្រុមការងារនេះ គឺជាអ្នកមានសិទ្ធិធ្វើការសម្រេចផ្នែកនយោបាយ។ កិច្ចប្រជុំរបស់ក្រុមការងារនេះ នឹងចាប់បើកធ្វើជាលើកទីមួយ នៅថ្ងៃអង្គារ ទី២៩ មីនា ២០១១ សប្តាហ៍ក្រោយនេះ នៅក្នុងប្រទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ