លីប៊ីជាសំណុំរឿងធំនៃជំនួបកំពូលអឺរ៉ុបថ្ងៃនេះ
ប្រមុខរដ្ឋនិងប្រមុខរដ្ឋាភិបាលនៃសមាជិកសហភាពអឺរ៉ុបទាំង២៧ រួមប្រជុំគ្នានៅថ្ងៃព្រហស្បតិ៍ទី២៣មីនានេះ និងថ្ងៃសុក្រទី២៤មីនាស្អែកនៅទីក្រុងព្រុចសែលប្រទេសបែលហ្ស៊ិក។ អឺរ៉ុបទាំង២៧ប្រទេស ត្រូវពិនិត្យមើលទៅលើស្ថានភាពនៃពិភពអារ៉ាប់ ជាពិសេស ស្ថានភាពនៃប្រទេសលីប៊ី។ ជំនួបកំពូលនេះ ក៏ជាឱកាសមួយ ដើម្បីសាកល្បងពង្រឹងឲ្យមាំឡើងវិញដែរ ជំហររួមរបស់អឺរ៉ុបនៅក្នុងវិបត្តិលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស័រ
ជំនួបកំពូលអឺរុបនេះប្រព្រឹត្តទៅនៅក្នុងបរិបទមួយតានតឹង ដោយហេតុតែអន្តរាគមន៍យោធានៅលីប៊ី។ គួររំឭកឡើងវិញថា បារាំងនិងអង់គ្លេសមិនត្រឹមតែបានបោះឆ្នោតគាំទ្រអន្តរាគមន៍នៅលីប៊ីប៉ុណ្ណោះទេ តែជាអ្នកដឹកនាំប្រតិបត្តិការយោធាទៅទៀត។ អាល្លឺម៉ង់បានបោះឆ្នោតអនុបវាទ រីឯអ៊ីតាលីវិញចង់ឃើញបញ្ជាការនៃអន្តរាគមន៍យោធារបូតចេញពីដៃរបស់បារាំងនិងអង់គ្លេស ហើយធ្លាក់មកនៅក្រោមការដឹកនាំរបស់អង្គការអូតង់(OTAN)។
ម្យ៉ាងវិញទៀត សំណុំរឿងអន្តរាគមន៍យោធានៅលីប៊ីនេះ ក៏ស្តែងឲ្យឃើញនូវអវត្តមាននិងកង្វះភាពជាក់លាក់នៃនយោបាយបរទេសរួមគ្នាមួយរបស់សហភាពអឺរ៉ុបដែរ។ ត្រង់ចំណុចនេះ លោកស្រីឧត្តមតំណាងកិច្ចការបរទេសរបស់សហភាពអឺរ៉ុប Catherine Ashton បានពោលរអ៊ូរទាំកាលពីដើមសប្តាហ៍ថា «បញ្ហាធំ គឺមកពីបណ្តាប្រទេសអឺរ៉ុបទាំង២៧ដែលការពារអធិបតេយ្យរបស់ពួកគេរៀងៗខ្លួន ជាពិសេសនៅក្នុងវិស័យយោធានិងការពារជាតិ មានមតិខុសៗគ្នា»។
នៅក្នុងបរិបទបែបនេះ ជំនួបកំពូលក្នុងថ្ងៃនេះ និងថ្ងៃស្អែកនៅទីក្រុងព្រុចសែល ចាំបាច់ត្រូវតែរិះរកតួនាទីរួមគ្នាមួយច្បាស់ សម្រាប់សហភាពអឺរ៉ុប នៅក្នុងសំណុំរឿងលីប៊ី។ ពីព្រោះមកទល់ពេលនេះ អ្វីដែលអឺរ៉ុបបានសម្រេចធ្វើចំពោះករណីប្រទេសលីប៊ីមានលក្ខណៈតិចតួចស្តួចស្តើងណាស់ ដូចជាវិធានការទណ្ឌកម្មសេដ្ឋកិច្ចទៅលើវិស័យប្រេងកាតនៃរបបKadhafi និងការគ្រោងជួយដោះស្រាយវិបត្តិមនុស្សធម៌ជាដើម។
យ៉ាងណាក៏ដោយ ជំនួបកំពូលអឺរ៉ុបលើកនេះ អាចជាឱកាសល្អមួយ សម្រាប់ឲ្យបណ្តាប្រទេសសមាជិកទាំង២៧ សម្រេចផ្តល់ជំនួយថវិកាដល់បណ្តាប្រទេសអារ៉ាប់ ពិសេសអេហ្ស៊ីបនិងទុយនីស៊ី ក្នុងគោលដៅជំរុញប្រទេសទាំងនេះឲ្យប្រញាប់ធ្វើកំណែទម្រង់ប្រជាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ