អ៊ីស្រាអែល និងប៉ាឡេស្ទីនបានបន្តប្រើអាវុធជម្រះបញ្ជីគ្នា ជាជាងជ្រើសយកបទឈប់បាញ់
ចុះផ្សាយនៅថ្ងៃ៖
ស្តាប់ - ០៦:២៦
នៅទីបំផុត និងបន្ទាប់ពីបានស្ងប់ស្ងាត់តែប៉ុន្មានម៉ោងមក ស្នូរអាវុធបានផ្តើមឮជាថ្មីនៅតំបន់ដើមបូព៌ា។ ពួកប៉ាឡេស្ទីនហាម៉ាស់បានបន្តបាញ់ផ្លោងគ្រាប់រ៉ូកែតចូលក្នុងទឹកដីអ៊ីស្រាអែល។ ចំណែកទាហានអ៊ីស្រាអែលក៏បានផ្តើមប្រតិបត្តិការផ្លូវអាកាសជាថ្មីលើតំបន់ហ្កាហ្សា។ ជម្លោះរវាងគូសត្រូវប្រចំាសតវត្សទំាងពីរតំាងពីមួយសប្តាហ៍កន្លងទៅបានបណ្តាលឲ្យមានស្លាប់ប្រជាជនប៉ាឡេស្ទីន ២០០នាក់ និងប្រជាជនអ៊ីស្រាអែល ១នាក់ ព្រមទំាងបង្កឲ្យមានរបួសប្រជាជនប៉ាឡេស្ទីនជាង ១ ០០០នាក់ផ្សេងទៀត។ នៅថ្ងៃនេះ រដ្ឋាភិបាលអ៊ីស្រាអែលបានអំពាវនាវឲ្យប្រជាជនប៉ាឡេស្ទីនចំនួន ១០០ ០០០នាក់ដែលរស់នៅក្នុងតំបន់ប៉ែកខាងជើងតំបន់ហ្កាហ្សាឲ្យចាកចេញពីផ្ទះសម្បែងរបស់ពួកគេ។ តើនេះ ជាទង្វើមួយដើម្បីកំញើញ ឬមួយក៏អ៊ីស្រាអែលពិតជាមានបំណងចង់បើកការវាយប្រហារលើពួកប៉ាឡេស្ទីនហាម៉ាស់នៅតំបន់ហ្កាហ្សាតាមផ្លូវគោកមែន?
កំញើញ ឬមួយក៏អ៊ីស្រាអែលចង់បើកប្រតិបត្តិការផ្លូវគោកមែន ឬយ៉ាងណា គេនៅមិនទាន់អាចសន្និដ្ឋានបានទេ។ អ្វីដែលគេអាចនិយាយបាននៅពេលនេះគឺថា តំាងពីពួកប៉ាឡេស្ទីនហាម៉ាស់បានប្រកាសមិនទទួលយកបទឈប់បាញ់ដែលស្នើឡើងដោយប្រទេសអេហ្ស៊ីប និងបន្តបាញ់ផ្លោងគ្រាប់រ៉ូកែតចូលក្នុងទឹកដីអ៊ីស្រាអែលមក រដ្ឋាភិបាលអ៊ីស្រាអែលដែលបានយល់ព្រមទទួលយកបទឈប់បាញ់នោះ ក៏បានផ្តើមទម្លាក់គ្រាប់បែកជាថ្មីលើតំបន់ហ្កាហ្សា។ ទីបំផុត ភាគីទំាងពីរបានបន្តប្រើអាវុធដើម្បីជជែកគ្នានៅលើសមរភូមិ ជាជាងប្រើពាក្យសម្តីដោយសន្តិវិធី។ ដូច្នេះ អ៊ីស្រាអែលអាចនឹងប្រើគ្រប់មធ្យោបាយទំាងអស់ដើម្បីទប់ស្កាត់ការបាញ់ផ្លោងគ្រាប់រ៉ូកែតពីសំណាក់ពួកប៉ាឡេស្ទីនហាម៉ាស់ ដោយរាប់បញ្ចូលទំាងអន្តរាគមន៍យោធាតាមផ្លូវគោកផង។
ថ្ងៃនេះ ឈានដល់ថ្ងៃទី៩ ហើយដែលអ៊ីស្រាអែលបានបើកប្រតិបត្តិការវាយប្រហារផ្លូវអាកាសលើតំបន់ហ្កាហ្សាក្នុងទឹកដីប៉ាឡេស្ទីន ហើយតំាងពីពេលនោះមក ពាក្យចចាមអារ៉ាមជុំវិញការត្រៀមបើកប្រតិបត្តិការផ្លូវគោករបស់ទាហានអ៊ីស្រាអែលក៏បានលេចចេញជាហូហែរមកដល់សព្វថ្ងៃ។ នៅថ្ងៃនេះទៀត លោកនាយករដ្ឋមន្រ្តីអ៊ីស្រាអែលបេនយ៉ាមីន នេតាន់យ៉ាហ៊ូបានបញ្ជាក់ជាថ្មីថា អ៊ីស្រាអែលគ្មានជម្រើសអ្វី ក្រៅពីបង្កើនការវាយប្រហាររបស់ខ្លួនតាមគ្រប់រូបភាពទំាងអស់ មានន័យថា ប្រតិបត្តិផ្លូវគោកក៏ជាជម្រើសចុងក្រោយមួយដែរ។ ចូរកុំភ្លេចថាខណៈនេះ កងកំាភ្លើងធំ និងកងរថក្រោះ ព្រមទំាងទាហានបម្រុងចំនួន ៤០ ០០០នាក់ត្រូវបានអ៊ីស្រាអែលកែនប្រមូលទៅដាក់នៅតាមខ្សែបន្ទាត់ដែលខ័ណ្ឌចែកដែនដីអ៊ីស្រាអែល និងតំបន់ប៉ាឡេស្ទីនហ្កាហ្សា។
អ៊ីស្រាអែលមិនចង់ឲ្យមានបទពិសោធន៍ជូរចត់ជាថ្មី
ការដែលអ៊ីស្រាអែលនៅបន្តរារែក អល់អែកក្នុងការបើកអន្តរាគមន៍ផ្លូវគោកលើតំបន់ហ្កាហ្សាពេលនេះ មិនមែនមកពីអ៊ីស្រាអែលមិនហ៊ាន ឬគ្មានសមត្ថភាពទេ។ អ៊ីស្រាអែលជាប្រទេសមួយដែលមានបំពាក់ដោយគ្រឿងសព្វាវុធទំនើបៗដូចប្រទេសបស្ចិមលោកមួយចំនួន និងមានសមត្ថភាព និងលទ្ធភាពគ្រប់គ្រាន់ក្នុងការបំពាក់អាវុធគ្រប់ប្រភេទដើម្បីការពារប្រទេស និងប្រជាជនខ្លួន។ ផ្ទុយទៅវិញ គឺពួកប៉ាឡេស្ទីនហាម៉ាស់ដែលគ្មានគ្រឿងសព្វាវុធទំនើបៗ និងគ្រប់ប្រភេទដូចអ៊ីស្រាអែល។ ជាក់ស្តែងនៅក្នុងជម្លោះពេលនេះ អ៊ីស្រាអែលបានប្រើយន្តហោះចម្បំាងទំនើបៗទម្លាក់គ្រាប់បែកស្រេចនឹងចិត្តលើតំបន់ហ្កាហ្សា។ រីឯពួកហាម៉ាសមានត្រឹមតែគ្រាប់រ៉ូកែតដើម្បីតបតវិញ សូម្បីតែកំាភ្លើងធំបាញ់យន្តហោះក៏គ្មានដែរ។ រវាងកម្លំាងអ៊ីស្រាអែល និងកម្លំាងពួកហាម៉ាស់ គឺខុសគ្នាដូចមេឃ និងដី។
តែសម្រាប់អ៊ីស្រាអែល ប្រតិបត្តិការផ្លូវគោក គឺជាប្រតិបត្តិការមួយដែលប្រកបដោយគ្រោះថ្នាក់ និងហានីភ័យខ្ពស់ ពិសេសនឹងអាចធ្វើឲ្យមានការបាត់បង់ជីវិតទាហានអ៊ីស្រាអែលច្រើន។ គួររម្លឹកជូនថា កងទ័ពអ៊ីស្រាអែលធ្លាប់បានចូលកាន់កាប់តំបន់ហ្កាហ្សាអស់ជាច្រើនឆ្នំា មុននឹងអ៊ីស្រាអែលរបស់រដ្ឋាភិបាលលោកនាយករដ្ឋមន្រ្តីអារីយែល ស្ហារ៉ុនសម្រេចដកចេញវិញកាលពីឆ្នំា ២០០៥។ ការសម្រេចកាលណោះក៏ដោយសារថា មានស្លាប់ទាហានអ៊ីស្រាអែលជារៀងរាល់ថ្ងៃដោយស្នាដៃពួកប៉ាឡេស្ទីនហាម៉ាស់។ នេះពិតជាបទពិសោធន៍ដ៏ល្វីងជូរចត់មួយដែលអ៊ីស្រាអែលមិនចង់យកមកអនុវត្តន៍ជាថ្មីទេ។ អ៊ីចឹងហើយបានជាបញ្ហាអន្តរាគមន៍ផ្លូវគោកពេលនេះបានបង្កឲ្យមានមតិផ្ទុយគ្នានៅក្នុងរដ្ឋាភិបាលអ៊ីស្រាអែលរបស់លោកនាយករដ្ឋមន្រ្តីនេតាន់យ៉ាហ៊ូសព្វថ្ងៃ។ មានអ្នកខ្លះ មិនចង់ឲ្យមានអន្តរាគមន៍ផ្លូវគោក និងអ្នកខ្លះទៀត គឺចង់ឲ្យមានការវាយប្រហារផ្លូវគោកដើម្បីកំចាត់រចនាសម្ព័ន្ធរបស់ពួកហាម៉ាស់ឲ្យដល់ឫសគល់តែម្តង។
ពួកហាម៉ាស់បន្តញុះញង់ឲ្យអ៊ីស្រាអែលបើកការវាយប្រហារផ្លូវគោក
ពួកហាម៉ាស់មិនដែលញញើតនឹងការកំញើញរបស់អ៊ីស្រាអែលទេ ផ្ទុយទៅវិញ មានតែការបន្តញុះញង់ដើម្បីឲ្យអ៊ីស្រាអែលក្តៅក្រហាយខ្លំាង រួចបើកប្រតិបត្តិការវាយលុកចូលតំបន់ហ្កាហ្សា។ គឺពេលនោះហើយដែលជាឱកាសដ៏ប្រសើររបស់ពួកគេក្នុងការសម្លាប់ទាហានអ៊ីស្រាអែល។ ជាការពិត អ៊ីស្រាអែលមានបំពាក់ដោយអាវុធទំនើបៗ តែបើនិយាយពីតាក់ទិចនៅលើសមរភូមិ និងការវាយឆ្មក់វិញ ប្រហែលជាចាញ់ពួកហាម៉ាស់។ ពួកអ៊ីស្លាមនិយមជ្រុលមួយនេះរង់ចំាតែទាហានអ៊ីស្រាអែលវាយលុកចូលក្នុងតំបន់របស់ខ្លួនទេ ទើបស្រួលចាត់ការ ព្រោះថា បើមានតែការវាយប្រហារផ្លូវអាកាស គឺពិតជាពិបាកទប់ទល់ខ្លំាងណាស់។
នេះហើយជាអ្វីដែលអ៊ីស្រាអែលកំពុងបារម្ភខ្លំាង។ អ៊ីចឹងហើយបានជានៅពេលដែលប្រទេសអេហ្ស៊ីបបានស្នើឲ្យមានបទឈប់បាញ់ រដ្ឋាភិបាលអ៊ីស្រាអែលបានប្រកាសទទួលយកដើម្បីចៀសវាងកុំឲ្យស្ថានការណ៍កាន់តែស្មុគស្មាញខ្លំាង។ តែអ្វីដែលអ៊ីស្រាអែលភ្ញាក់ផ្អើលខ្លំាងនោះ គឺការឆ្លើយបដិសេធរបស់ពួកហាម៉ាស់។ ពួកនេះបានយល់ឃើញថា សំណើរបស់ប្រទេសអេហ្ស៊ីបនៅមិនទាន់បានបំពេញលក្ខខណ្ឌត្រឹមត្រូវទេ។ អ្វីដែលពួកហាម៉ាស់ចង់បាន គឺសុំឲ្យអ៊ីស្រាអែលបញ្ឈប់ការបិទច្រកចេញ ចូលតំបន់ហ្កាហ្សាដែលអ៊ីស្រាអែលបានអនុវត្តន៍តំាងពីឆ្នំា ២០០៦ ព្រមទំាងដោះលែងអ្នកទោសប៉ាឡេស្ទីនដែលអ៊ីស្រាអែលទើបចាប់ថ្មីនេះ។ មួយវិញទៀត ពួកហាម៉ាស់ក៏បានទាមទារឲ្យបើកច្រកព្រំដែនរ៉ាហ្វាជាមួយប្រទេសអេហ្ស៊ីបឡើងវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ