ហ្វ្រង់ស័រ ហូឡង់៖ អ៊ីស្រាអែលមានសិទ្ធិការពារខ្លួនប៉ុន្តែក៏ត្រូវមានភាពអត់ធ្មត់ដែរ
គិតត្រឹមល្ងាចថ្ងៃចន្ទ អ៊ីស្រាអែលនៅតែបន្តធ្វើការវាយប្រហារតាមផ្លូវអាកាសទៅលើទឹកដីហ្កាហ្សារបស់ប៉ាឡេស្ទីន បើទោះបីជាមានការអំពាវនាវពីសហគមន៍អន្តរជាតិឲ្យមានបទឈប់បាញ់។ លោកហ្វ្រង់ស័រ ហូឡង់ ប្រធានាធិបតីបារាំងបានលើកឡើងថា អ៊ីស្រាអែលមានសិទ្ធិការពារខ្លួនក៏ប៉ុន្តែក៏ត្រូវបង្ហាញនូវភាពអត់ធ្មត់ជាអតិបរមាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
មន្រ្តីជាន់ខ្ពស់អ៊ីស្រាអែលបានអះអាងថា នៅពេលនេះ អ៊ីស្រាអ៊ែលមិនទាន់ចង់និយាយដល់បទឈប់បាញ់នៅឡើយទេ ពីព្រោះ អ៊ីស្រាអែលចង់វាយកម្ទេចរចនាសម្ព័ន្ធយោធារបស់ក្រុមហាម៉ាស់ជាមុនសិន ដើម្បីចៀសវាងកុំពួកគេអាចធ្វើការបាញ់ផ្លោងរ៉ុកកែតលើអ៊ីស្រាអែលសាជាថ្មីទៀតនៅថ្ងៃខាងមុខ។ រដ្ឋមន្រ្តីក្រសួងហិរញ្ញវត្ថុអ៊ីស្រាអែល បានលើកឡើងថា នៅពេលណាដែលអ៊ីស្រាអែលអាចសម្រេចបានគោលដៅនេះហើយ ទើបអ៊ីស្រាអែលនិយាយដល់ការចរចាឈប់បាញ់។
ក៏ប៉ុន្តែ បើតាមការផ្សាយរបស់វិទ្យុអ៊ីស្រាអែល គណៈរដ្ឋមន្រ្តីអ៊ីស្រាអែល ដែលជួបប្រជុំគ្នា កាលពីយប់ថ្ងៃអាទិត្យ មិនបានសម្រេចបើកប្រតិបត្តិការជើងគោកវាយលុកចូលក្នុងទឹកដីហ្កាហ្សានៅឡើយទេ។
គួរបញ្ជាក់ថា លោកបាន គីមូន អគ្គលេខាធិការអ.ស.ប បានអំពាវនាវដោយទទូចឲ្យអ៊ីស្រាអែលលុបចោលផែនការបើកប្រតិបត្តិការជើងគោកនៅហ្កាហ្សា ដែលអាចនឹងបង្កការខូចខាតធ្ងន់ធ្ងរដល់ប្រជាជនប៉ាឡេស្ទីន។ លោកបានបន្ថែមថា នៅពេលនេះ ប្រជាជនស៊ីវិលប៉ាឡេស្ទីនច្រើនពេកហើយ ដែលត្រូវបាត់បង់ជីវិត។
អ៊ីស្រាអែលមានសិទ្ធិការពារខ្លួន ក៏ប៉ុន្តែ ក្នុងពេលជាមួយគ្នា អ៊ីស្រាអែលក៏ត្រូវមានភាពអត់ធ្មត់ផងដែរ
ប្រសាសន៍របស់លោកហ្វ្រង់ស័រ ហូឡង់
លោកហ្វ្រង់ស័រ ហូឡង់ ប្រធានាធិបតីបារាំង ក៏បានអំពាវនាវដែរឲ្យមានបទឈប់បាញ់ជាបន្ទាន់មួយ នៅដើមបូព៌ានេះ។ នៅក្នុងបទសម្ភាសន៍ ក្នុងឱកាសបុណ្យឯករាជ្យជាតិបារាំង នៅថ្ងៃចន្ទ ១៤កក្កដា លោកហ្វ្រង់ស័រ ហូឡង់ បានលើកឡើងថា អ៊ីស្រាអែលមានសិទ្ធិការពារខ្លួន ប្រសិនបើអ៊ីស្រាអែលទទួលរងការវាយប្រហារ ក៏ប៉ុន្តែ ក្នុងពេលជាមួយគ្នា អ៊ីស្រាអែលក៏ត្រូវតែប្រកាន់នូវភាពអត់ធ្មត់ជាអតិបរមាផងដែរ។
លោកម៉ះមូដ អាបាស់ ប្រធានអាជ្ញាធរប៉ាឡេស្ទីនបានឲ្យដឹងថា លោកបានស្នើសុំឲ្យលោកបាន គីមូន ដាក់ប៉ាឡេស្ទីនក្រោមកិច្ចការពារអន្តរជាតិ ក្នុងក្របខ័ណ្ឌ អ.ស.ប ដើម្បីដោះស្រាយជម្លោះ នៅតំបន់ហ្កាហ្សា។
នៅថ្ងៃចន្ទ មជ្ឈមណ្ឌលសិទ្ធិមនុស្សប៉ាឡេស្ទីន ដែលមានទីតាំងនៅក្នុងតំបន់ហ្កាហ្សា បានអះអាងថា ចាប់តាំងពីអ៊ីស្រាអែលបើកប្រតិបត្តិការយោធាលើតំបន់ហ្កាហ្សាមក មានជនស៊ីវិលយ៉ាងតិច ១៣០នាក់ហើយ ដែលត្រូវបាត់បង់ជីវិត ក្នុងនោះ មានស្រ្តី ២៦នាក់ និងកុមារ ៣៥នាក់។ ចំណែកនៅខាងអ៊ីស្រាអែលវិញ គេមិនឃើញមានរបាយការណ៍ អំពីចំនួនអ្នកស្លាប់ និងរបួសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ