ក្រុមប្រទេសអាស៊ី ប៉ាស៊ីហ្វិករួមគ្នាបង្កើតបណ្តាញប្រយុទ្ធប្រឆាំងអំពើពុករលួយ
កាលពីថ្ងៃសៅរ៍ ទី ៨វិច្ឆិកា នៅក្នុងកិច្ចប្រជុំថ្នាក់រដ្ឋមន្រ្តី នាទីក្រុងប៉េកាំង បណ្តាប្រទេសអាស៊ីប៉ាស៊ីហ្វិកបានសម្រេចបោះឆ្នោតអនុម័តរួមគ្នាផែនការដើម្បីប្រយុទ្ធប្រឆាំងនឹងអំពើពុករលួយ។ កិច្ចព្រមព្រៀងដែលផ្តួចផ្តើមគំនិតដោយប្រទេសចិន និងគំាទ្រដោយសហរដ្ឋអាមេរិក មានទិសដៅសំខាន់ ប្រយុទ្ធប្រឆាំងអំពើពុករលួយក្នុងតំបន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ប្រទេសចិនដែលកំពុងធ្វើយុទ្ធនាការបោសសម្អាតក្រុមមន្រ្តីពុករលួយ ក្នុងប្រទេស បានស្នើផែនការសម្រាប់ប្រយុទ្ធប្រឆាំងអំពើពុករលួយនៅក្នុងតំបន់។ សេចក្តីសម្រេចនេះដែល បានទទួលការគាំទ្រ ជាបឋម ពីអ្នកតំណាងរបស់ប្រទេសចំនួន ២១ នឹងត្រូវបោះឆ្នោតអនុម័ត ជាបន្ទាប់មកទៀត ដោយបណ្តាមេដឹកនាំដែលត្រូវចូលរួម នៅក្នុងកិច្ចប្រជុំកំពូលស្តីពីវេទិកាសហប្រតិបត្តិការ អាស៊ី ប៉ាស៊ីហ្វិក ដែលត្រូវបើកធ្វើ នៅថ្ងៃចន្ទស្អែក ក្នុងទីក្រុងប៉េកាំង។
នៅក្រោយការអនុម័ត កិច្ចព្រមព្រៀង គេនឹងបង្កើតជាផ្លូវការ បណ្តាញអាជ្ញាធរប្រយុទ្ធប្រឆាំងអំពើពុករលួយមួយ និងដាក់ឲ្យដំណើរការទីភ្នាក់ងារដើម្បីអនុវត្តច្បាប់ ឈ្មោះ ACT NET។ នៅក្នុងសេចក្តីថ្លែងការណ៍រួម ដែលចេញផ្សាយ កាលពីថ្ងៃសៅរ៍ ក្រុមប្រទេសពាក់ព័ន្ធបានសន្យាមិនផ្តល់ជម្រកដល់ក្រុមមនុស្សពុករលួយ និងយល់ព្រមឲ្យមានការធ្វើបត្យាប័នមនុស្សពុករលួយ។
ប៉ុន្តែ អ្នកជំនាញជាច្រើនមានការសង្ស័យទៅលើការអនុវត្តន៍កិច្ចព្រមព្រៀង ពីព្រោះ មានប្រទេសចូលរួមជាច្រើន គ្មានចុះកិច្ចព្រមព្រៀងធ្វើបត្យាប័នរវាងគ្នា។ ឧទាហរណ៍ សហរដ្ឋអាមេរិក អូស្ត្រាលី និងកាណាដា គ្មានកិច្ចព្រមព្រៀងធ្វើបត្យាប័នជាមួយទីក្រុងប៉េកាំង ដោយគេខ្លាចថា ជនដែលត្រូវធ្វើបត្យាប័ន ទៅប្រទេសចិន នឹងអាចទទួលទោសប្រហារជីវិត។
តាមរយៈបណ្តាញប្រយុទ្ធប្រឆាំងអំពើពុករលួយ ទីក្រុងប៉េកាំងបង្ហាញដោយមិនលាក់លៀមពីបំណងរបស់ខ្លួន ដែលចង់ឲ្យគេធ្វើបត្យាប័ន ប្រគល់មន្រ្តីពុករលួយរបស់ខ្លួន ដែលបានរត់គេច ទៅសំងំលាក់ខ្លួន នៅបរទេស។ កាលពីពេលថ្មីៗនេះ នៅក្នុងក្របខ័ណ្ឌតាមប្រមាញ់ក្រុមមន្រ្តីពុករលួយ ទីក្រុងប៉េកាំងបានដាក់សម្ពាធ ទៅប្រទេសអូស្ត្រាលី កាណាដា បារាំង និងនូវែលហ្សេឡង់ ដើម្បី ទាមទារឲ្យប្រទេសទាំងនោះ ធ្វើបត្យាប័ន បញ្ជូនមន្រ្តីពុករលួយចិនឲ្យប្រទេសចិនវិញ។
របាយការណ៍របស់ធនាគារកណ្តាលចិនមួយ ដែលបែកធ្លាយ កាលពីឆ្នាំ ២០០៨ បានបង្ហាញថា មានមន្រ្តីចិនពុករលួយ មិនតិចជាង ១៨ ០០០នាក់បានលួចរត់ចេញពីចិន ទៅបរទេស ក្នុងទសវត្សរ៍ ឆ្នាំ ១៩៩០ ដោយនាំទៅជាមួយពួកគេ នូវទឹកប្រាក់ប្រមាណ ១២៣ពាន់លានដុល្លារ។
នៅក្រោមពាក្យស្លោក តាមប្រមាញ់កញ្ជ្រោង លោកប្រធានាធិបតីចិន ស៊ី ជីនពីងបានផ្តើមយុទ្ធនាការបោសសម្អាតមន្រ្តីពុករលួយ សូម្បីនៅក្នុងជួរបក្សកុម្មុយនិស្ត។ ប៉ុន្តែ ដោយសារតែគ្មានតម្លាភាពនៃការអនុវត្តច្បាប់ គេសង្ស័យថា យុទ្ធនាការបោសសម្អាតមន្រ្តីពុករលួយ ត្រូវលោកប្រធានាធិបតីចិន ប្រើសម្រាប់កម្ចាត់ ក្រុមប្រឆាំងនឹងខ្លួន នៅក្នុងជួរបក្សតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ