ប្រទេសមិត្តរបស់ស៊ីរី ត្រៀមបើកសន្និសីទមួយថ្មីនៅប៉ារីសប្រទេសបារាំង
ក្រុមប្រទេសមិត្តរបស់ស៊ីរីនឹងបើកសន្និសីទមួយថ្មីនៅទីក្រុងប៉ារីសប្រទេសបារាំងនៅថ្ងៃស្អែកទី៦កក្កដា។ គោលដៅគឺជំរុញបាស្សារ អាល់ អាសាឌ (Bachar al-Assad) ឱ្យចាកចេញពីអំណាចនិងបញ្ចុះបញ្ចូលឱ្យរុស្ស៊ីឈប់គាំទ្រលោកប្រធានាធិបតីស៊ីរី។ ក៏ប៉ុន្តែ រុស្ស៊ីបានប្រាប់ឱ្យដឹងរួចជាស្រេចថានឹងមិនចូលរួមក្នុងសន្និសីទទីក្រុងប៉ារីសនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៩
គោលដៅសំខាន់ជាងគេនៃសន្និសីទប្រទេសមិត្តរបស់ស៊ីរីលើកទីបីនេះ គឺបង្ហាញនូវការគាំទ្ររបស់ប្រទេសជាង១០០ ចំពោះផែនការទីក្រុងហ្សឺណែវ(Genève) របស់លោកកូហ្វី អាណាន់(Kofi Annan)។ បើយោងទៅតាមពួកប្រទេសទាំងនេះ ផែនការរបស់លោកកូហ្វី អាណាន់អនុម័តកាលពីថ្ងៃសៅរ៍កន្លងទៅនេះនៅប្រទេសស្វីស(Suisse) តម្រូវឱ្យជំរុញលោកបាស្សារ អាល់ អាសាឌ ចាកចេញពីអំណាច។ ចំពោះរុស្ស៊ីដែលជាអ្នកគាំទ្ររបបស៊ីរីវិញផែនការទីក្រុងហ្សឺណែវនេះ មិនបានបញ្ជាក់ពីការតម្រូវឱ្យលោកបាស្សារ អាល់ អាសាឌលាលែងចេញពីតំណែងទេ។
ទន្ទឹមនេះ អង្គប្រជុំដែលនឹងប្រព្រឹត្តទៅក្រោមអធិបតីភាពរបស់លោកប្រធានាធិបតីបារាំង ហ្វ្រង់ស័រ ហូឡង់(François Hollande) ក៏នឹងបន្តដាក់គំនាបទៅលើរុស្ស៊ីឱ្យឈប់គាំទ្ររបប ស៊ីរីដែរ។ នៅក្នុងន័យនេះ នាឱកាសសន្និសីទសារព័ត៌មានរួមគ្នាមួយរវាងរដ្ឋមន្រ្តីការបរទេសបារាំងនិងរដ្ឋមន្ត្រីការបរទេសអង់គ្លេសកាលពីថ្ងៃពុធម្សិលមិញ លោកប្រមុខការទូត អង់គ្លេសHague បាននិយាយថា «ប្រទេសរុស្ស៊ីគួរតែយល់ថារបបស៊ីរីរបស់បាស្សារ អាល់ អាសាឌ នឹងគង់តែរលំមិនយូរមិនឆាប់»។
ក៏ប៉ុន្តែ រុស្ស៊ីក៏ដូចចិនដែរបន្តប្រកាន់ជំហររឹងរូសដដែល នោះគឺមិនត្រូវមានជាដាច់ខាតការបង្ខំលោកប្រធានាធិបតីស៊ីរីឱ្យចុះចេញពីតំណែង។ មិនតែប៉ុណ្ណោះ រុស្ស៊ីនឹងមិនចូលរួមក្នុងសន្និសីទទីក្រុងប៉ារីសនៅថ្ងៃស្អែកនេះទៅទៀត។
ដោយឡែក យោងទៅតាមប្រភពការទូតខ្លះនៅថ្ងៃស្អែកនេះ ក្រុមប្រទេសមិត្តរបស់ស៊ីរី នឹងប្រកាសជាថ្មីប្រឆាំងនឹងការវាយបង្ក្រាបនៅស៊ីរី គាំទ្រប្រជាជននិងពួកអ្នកប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ