វិបត្តិនយោបាយថៃ៖មានស្លាប់មនុស្ស ២នាក់ និងរបួស ២៤នាក់ រីឯគ.ជ.ប. ស្នើឲ្យលើកថ្ងៃបោះឆ្នោត
នៅក្នុងប្រទេសថៃ មានស្លាប់មនុស្ស ២នាក់ និងរងរបួសចំនួន ២៤នាក់ផ្សេងទៀតនៅក្នុងព្រឹត្តិការណ៍វាយប្រហារចោលគ្រាប់បែកទៅលើទីតំាងរបស់ក្រុមបាតុករអាវលឿងនាព្រលឹមស្រាងៗព្រឹកថ្ងៃព្រហស្បតិ៍ ទី១៥ ឧសភានេះ។ ឧប្បត្តិហេតុនេះបានធ្វើឲ្យគ្រប់គ្នាបារម្ភពីការផ្ទុះអំពើហិង្សាក្រោមទ្រង់ទ្រាយធំរវាងក្រុមអាវលឿងប្រឆំាងរដ្ឋាភិបាល និងក្រុមអាវក្រហម អ្នកគំាទ្រលោកអតីតនាយករដ្ឋមន្ត្រីថាក់ស៊ីន។ ដោយឡែកក្នុងថ្ងៃនេះដែរ ពួកអាវលឿងក៏បានបុកទម្លាយចូលទីតំាងរបស់កងទ័ពជើងអាកាសដែលលោកនាយករដ្ឋមន្រ្តីចំាផ្ទះនីវ៉ាត់ទំរ៉ុង ប៊ូនសុងប៉ៃសានកំពុងជួបជាមួយប្រធានគណៈកម្មការជាតិរៀបចំការបោះឆ្នោត។ ទង្វើនេះបានបង្ខំឲ្យលោករត់ចេញពីទីនោះ ហើយគ.ជ.ប. ក៏បានស្នើឲ្យលើកថ្ងៃបោះឆ្នោតដែលគ្រោងរៀបចំនៅថ្ងៃទី២០ កក្កដាខាងមុខ។
ចុះផ្សាយនៅថ្ងៃ៖
ស្តាប់ - ០១:៤៥
គឺនៅវេលាម៉ោង ៣ ទៀបភ្លឺព្រឹកមិញដែលគ្រាប់បែកធុន M៧៩ ចំនួន ២គ្រាប់ត្រូវបានគប់ទៅលើជំរំរបស់ក្រុមបាតុករអាវលឿងប្រឆំាងរដ្ឋាភិបាលស្ថិតក្បែរបូជនីស្ថានប្រជាធិបតេយ្យ និងបន្តដោយការបាញ់រះជាច្រើនគ្រាប់។ ព្រឹត្តិការណ៍នោះបានបណ្តាលឲ្យស្លាប់មនុស្ស ២នាក់ ក្នុងនោះមានម្នាក់ជាបាតុករ និងម្នាក់ទៀតជាឆ្មំាការពារ។ ក្រៅពីមានស្លាប់ ២នាក់ ក៏មានអ្នករងរបួសចំនួន ២៤នាក់ផ្សេងទៀត។ ទង្វើហិង្សានេះបានកើតមានឡើង មួយសប្តាហ៍ក្រោយពីតុលាការធម្មនុញ្ញបានដកលោកស្រីយីឡាក់ចេញពីតំណែងនាយករដ្ឋមន្រ្តីចំាផ្ទះ និងចំពេលដែលក្រុមប្រឆំាងបានទាមទារឲ្យប្រធានព្រឹទ្ធសភាតែងតំាងនាយករដ្ឋមន្រ្តីអព្យាក្រឹតម្នាក់ដោយមិនបាច់បោះឆ្នោត។
មេបាតុករអាវលឿងលោកស៊ូថេបបានព្យាយាមជម្នះព្រឹទ្ធសភាឲ្យប្រើមាត្រាទី៧ នៃច្បាប់រដ្ឋធម្មនុញ្ញដើម្បីស្នើព្រះមហាក្សត្រឲ្យតែងតំាងរដ្ឋាភិបាលអព្យាក្រឹតមួយ។ តែគណបក្សភឿថៃធ្លាប់បានបញ្ជាក់រួចហើយថា ខ្លួនមិនអាចទទួលយកនិតិវិធីរបៀបនេះបានទេ។ រីឯក្រុមអាវក្រហមអ្នកគំាទ្ររដ្ឋាភិបាលបានព្រមានរួចហើយថា សង្រ្គាមស៊ីវិលនឹងផ្ទុះឡើង ប្រសិនបើពួកអាវលឿងហ៊ានទម្លាក់រដ្ឋាភិបាលចំាផ្ទះសព្វថ្ងៃនោះ។ ដោយឡែកក្នុងថ្ងៃនេះដែរ ពួកបាតុករអាវលឿងក៏បានបុកទម្លាយចូលទៅក្នុងទីតំាងរបស់ទ័ពជើងអាកាសដែលលោកនាយករដ្ឋមន្រ្តីចំាផ្ទះនីវ៉ាត់ទំរ៉ុង ប៊ូនសុងប៉ៃសានកំពុងជួបជាមួយប្រធានគណៈកម្មការជាតិរៀបចំការបោះឆ្នោត។ ទង្វើនេះបានបង្ខំឲ្យលោករត់ចេញពីទីនោះ ហើយគ.ជ.ប. ក៏បានស្នើឲ្យមានការលើកថ្ងៃបោះឆ្នោតសភាដែលគ្រោងរៀបចំនៅថ្ងៃទី២០ កក្កដាខាងមុខ។
ទន្ទឹមគ្នានេះ មេទ័ពថៃលោកប្រាយុទ្ធ ចាន់អូចាបានថ្លែងឲ្យដឹងនៅក្នុងសេចក្តីជូនដំណឹងដ៏កម្រមួយចេញផ្សាយថ្ងៃនេះថា ប្រសិនបើវិបត្តិនៅតែបន្តរុំារ៉ៃយ៉ាងដូចនេះ កងទ័ពអាចនឹងចេញអន្តរាគមន៍ដើម្បីធានាសុវត្ថិភាព និងរៀបចំសណ្តាប់ធ្នាប់សង្គមឡើងវិញ។ គួររម្លឹកជូនថា វិបត្តិនយោបាយថៃដែលបានផ្ទុះជាថ្មីតំាងពី ៦ខែកន្លងទៅបានបណ្តាលឲ្យមានស្លាប់ ២៧នាក់ និងរបួសជាច្រើនរយនាក់។ ជាទូទៅ ក្រុមប្រឆំាងទំាងពីរបានទម្លាក់កំហុសដាក់គ្នាទៅវិញ ទៅមក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ