តុលាការខ្មែរក្រហម ចាប់ផ្តើមសវនាការពិនិត្យភ័ស្តុតាងវគ្គដំបូង លើសំណុំរឿង ០០២ ដំណាក់កាលទី២ ពីថ្ងៃទី១៧ តុលា ដល់ថ្ងៃទី១៨ធ្នូ
អង្គជំនុំជម្រះសាលាដំបូង របស់តុលាការខ្មែរក្រហម កាលពីថ្ងៃទី១៩កញ្ញា បានចេញដីកាកំណត់កាលបរិច្ឆេទ សម្រាប់សវនាការលើអង្គសេចក្តីក្នុងសំណុំរឿង០០២ ដំណាក់កាលទី២។ នោះគឺអង្គជំនុំជម្រះ ចាប់ផ្តើមសវនាការពិនិត្យភ័ស្តុតាង វគ្គដំបូង ក្នុងសំណុំរឿង០០២ ដំណាក់កាលទី២ ចាប់ពីថ្ងៃសុក្រ ទី១៧ ខែតុលា ឆ្នាំ២០១៤ រហូតដល់ថ្ងៃព្រហស្បតិ៍ ទី១៨ ខែធ្នូ ឆ្នាំ២០១៤។ សវនាការនោះ នឹងចាប់ផ្តើមដំបូង ដោយសេចក្តីថ្លែងការណ៍របស់សហព្រះរាជអាជ្ញាពីបទចោទ បន្ទាប់មកមានការឆ្លើយតបរបស់ជនជាប់ចោទ នួនជា និងខៀវសំផន ឬមេធាវី។ រីឯសាក្សី នឹងផ្តល់សក្ខីកម្ម នៅថ្ងៃទី២០តុលា។
ចុះផ្សាយនៅថ្ងៃ៖
ស្តាប់ - ០២:៣២
ដីកាកំណត់កាលបរិច្ឆេទសម្រាប់សវនាការលើអង្គសេចក្តីក្នុងសំណុំរឿង០០២/០២ ចេញដោយចៅក្រមអង្គជំនុំជម្រះសាលាដំបូង ៥ រូប ដែលមានចៅក្រមខ្មែរ ៣ រូប បានកំណត់ថា សវនាការពិនិត្យភ័ស្តុតាង វគ្គដំបូង ក្នុងសំណុំរឿង ០០២/០២ នឹងចាប់ផ្តើមពីថ្ងៃសុក្រ ទី១៧ ខែតុលា ដល់ថ្ងៃព្រហស្បតិ៍ ទី១៨ ខែធ្នូ ឆ្នាំ២០១៤។
អង្គជំនុំជម្រះ នៅតុលាការខ្មែរក្រហម នឹងដំណើរការសវនាការ ៣ ថ្ងៃ ក្នុង ១ សប្តាហ៍ តាមកាលវិភាគសវនាការ ប្រចាំថ្ងៃ ដូចធ្លាប់អនុវត្តនៅក្នុងសំណុំរឿង០០២/០១ ដោយចាប់ផ្តើមសវនាការ ពីម៉ោង ៩ ព្រឹក និងបញ្ចប់នៅម៉ោង ៤ រសៀល។ សវនាការនឹងផ្អាកសម្រាប់ការទទួលទានអាហារថ្ងៃត្រង់ ពីម៉ោង ១២ ថ្ងៃត្រង់ រហូតដល់ម៉ោង ១ និង ៣០ នាទីរសៀល និងមានការសម្រាកម្តងនៅពេលព្រឹក និងម្តងទៀត នៅពេលរសៀល តាមការណែនាំរបស់ប្រធានអង្គជំនុំជម្រះ។
អង្គជំនុំជម្រះ ក៏បានជូនដំណឹងដល់ភាគីនានាថា សវនាការថ្ងៃទី១៧ ខែតុលា ឆ្នាំ២០១៤ សហព្រះរាជអាជ្ញា នឹងត្រូវបានផ្តល់ឱកាសសម្រាប់ធ្វើសេចក្តីសន្និដ្ឋានដោយសង្ខេបអំពីការចោទប្រកាន់ ចំពោះជនជាប់ចោទ ហើយជនជាប់ចោទចាស់ជរា នួនជា និងខៀវសំផន ឬមេធាវីរបស់ជនជាប់ចោទទាំងពីរ អាចធ្វើការឆ្លើយតបដោយសង្ខេបបាន។ រីឯការស្តាប់សក្ខីកម្មដំបូងរបស់សាក្សី នឹងធ្វើឡើង នៅថ្ងៃទី២០ ខែតុលា។
អ្នកនាំពាក្យសាលាក្តីខ្មែរក្រហម លោក នេត្រ ភក្ត្រា បានឲ្យដឹងនៅថ្ងៃ២០កញ្ញានេះថា សំណុំរឿង០០២/០២ ដែលមានជនជាប់ចោទ នួនជា និងខៀវសំផន នឹងដំណើរការលើបទចោទប្រកាន់ចំនួន ៣ រួមមាន៖ បទឧក្រិដ្ឋប្រឆាំងមនុស្សជាតិ ឧក្រិដ្ឋកម្មសង្គ្រាម និងឧក្រិដ្ឋកម្ម ប្រល័យពូជសាសន៍ សំដៅលើការកាប់សម្លាប់ជនជាតិចាម និងវៀតណាម នៅសម័យខ្មែរក្រហម។
តាមអ្នកនាំពាក្យ សវនាការលើអង្គសេចក្តី ក្នុងសំណុំរឿង ០០២/០២ នៅថ្ងៃទី១៧តុលា នឹងចាប់ផ្តើមលើភស្តុតាងនានា នៃការកាប់សម្លាប់មនុស្សនៅមន្ទីរសន្តិសុខ ក្រាំងតាចាន់ ក្នុងសហករណ៍ត្រាំកក់ នៅខេត្តតាកែវ។
ជាការកត់សម្គាល់ អតីតមេដឹកនាំខ្មែរក្រហមចាស់ជរា លោក នួនជា អាយុ ៨៨ ឆ្នាំ និងលោក ខៀវសំផន អាយុ ៨៣ ឆ្នាំ ត្រូវបានអង្គជំនុំជម្រះសាលាដំបូង របស់តុលាការខ្មែរក្រហម កាលពីថ្ងៃទី៧សីហា សម្រេចផ្តន្ទាទោសដាក់ពន្ធនាគារអស់មួយជីវិត ពីបទឧក្រិដ្ឋកម្មប្រឆាំងមនុស្សជាតិ ក្នុងសំណុំរឿង០០២/០១។ នៅពេលបុណ្យភ្ជុំបិណ្ឌនេះ លោកខៀវសំផន ត្រូវបានអ្នកនាំពាក្យសាលាក្តី ឲ្យដឹងថា មានជំងឺផ្តាសាយធំ កំពុងសម្រាកព្យាបាល នៅមន្ទីរពេទ្យរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ