អំពើហិង្សាមរណៈផ្ទុះឡើងជាថ្មីរវាងក្រុមអ្នកគាំទ្រអតីតប្រធានាធិបតីនិងប៉ូលិស
ក្នុងខណៈដែលសកម្មជនប្រឆាំងនឹងលោកមរស៊ី នាំគ្នាធ្វើបាតុកម្ម នៅទីលានសន្តិភាព Tahrir និងនៅជិតវិមានប្រធានាធិបតី ដើម្បីគាំទ្ររបបយោធាដឹកនាំប្រទេសឆ្លងអន្តរកាល សកម្មជនរាប់សិបពាន់នាក់ផ្សេងទៀត ជាអ្នកគាំទ្រប្រធានាធិបតីបាត់តំណែង បានប្រមូលផ្តុំគ្នាដែរ នៅថ្ងៃសុក្រម្សិលមិញ ដើម្បីទាមទារយកតួនាទីប្រមុខរដ្ឋមកឱ្យលោកមរស៊ីវិញ។ បាតុកម្មគាំទ្រ បាតុកម្មប្រឆាំង ដែលចៀសមិនផុតពីការ ប៉ះទង្គិចគ្នា។ តាំងពីល្ងាចមិញ រហូតមកទល់នឹងព្រឹកថ្ងៃសៅរ៍នេះ អំពើហិង្សាមរណៈ បានផ្ទុះឡើងជាច្រើនកន្លែងនៅទីក្រុង គែរ និងក្រុង អាឡិចសង់ឌ្រី។ មានស្លាប់យ៉ាងហោចណាស់ ៧៥នាក់ នេះបើតាមតួលេខផ្តល់ដោយក្រុមអ៊ីស្លាមជ្រុលនិយមភាតរបុត្រ Frère musulman។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ការប៉ះទង្គិចហិង្សា បានផ្ទុះឡើងនៅពេលដែលក្រុមអ្នកគាំទ្រលោកអតីតប្រធានាធិបតី មរស៊ី បាននាំគ្នាដង្ហែក្បួនចេញពីទីតាំងនៅជាយក្រុង ឆ្លងចូលរដ្ឋធានីគែរ តាមច្រកខាងកើត។
កងកម្លាំងប៉ូលិសចូលធ្វើអន្តរាគមន៍រាំងដំណើរបាតុកម្ម ការវាយប្រហារហិង្សាបានឆាបឆេះឡើង។ បើតាមសកម្មជនFrère musulman ដែលជាអ្នកគាំទ្រលោក មរស៊ី កងកម្លាំងរក្សាសន្តិសុខ បានប្រើតែគ្រាប់បែក និងគ្រាប់គ្មានរំសេវទេ គ្រាប់ពិតៗត្រូវបានប្រើប្រាស់ដោយក្រុមមិនស្គាល់មុខ បាញ់ចេញពីសកលវិទ្យាល័យក្បែរនោះ។
នៅឯមន្ទីរពេទ្យជាយក្រុង កន្លែងដែរក្រុមអ៊ីស្លាមជ្រុលនិយមយកធ្វើជាទីតាំង តាំងពីជាងមួយខែមកហើយវិញ ទើបមានចំនួនអ្នកស្លាប់ច្រើនជាង។ ចំនួនមនុស្សស្លាប់ដែលពិបាកនឹងផ្ទៀងផ្ទាត់ ៖ ១០នាក់ ២០នាក់ បន្ទាប់មកជាង៣០នាក់។ អ្នកកាសែតរបស់ភ្នាក់ងារព័ត៌មានបារាំង បានរាប់ឃើញមានសាកសព៣៧នាក់តំរៀបគ្នានៅមន្ទីរពេទ្យ។ បន្ទាប់មកទើបគេឃើញក្រសួងសុខាភិបាលចេញរបាយការណ៍បញ្ជាក់ថាមានស្លាប់ ២០នាក់ និងរបួស១៧៧នាក់ នៅក្នុងការប៉ះទង្គិចហិង្សាព្រឹកមិញនេះ។ ចំណែកក្រសួងមហាផ្ទៃ មិនបានចេញសេចក្តីថ្លែងការណ៍អ្វីទាក់ទងនឹងហេតុការណ៍ហិង្សានេះទេ។
អំពើហិង្សាក៏បានកើតឡើងដែរ នៅក្រុងអាឡិចសង់ឌ្រី ក្រុមសកម្មជនអ្នកគាំទ្រលោក មរស៊ី បានទទួលរងការវាយប្រហារពីសំណាក់កងកម្លាំងប៉ូលិស បន្លំខ្លួនជាស៊ីវិល ប្រើកាំភ្លើងបាញ់ត្រង់ៗតែម្តង។ នេះបើតាមការអះអាងរបស់ក្រុមអ៊ីស្លាមជ្រុលនិយម។ ប៉ុន្តែ ចំពោះដំណឹងនេះ ក្រសួងមហាផ្ទៃបានបញ្ចេញប្រតិកម្មតបវិញថា គឺក្រុមFrère musulman ដែលជាអ្នកបាញ់ទៅលើវិហាររបស់ក្រុមអ្នកប្រឆាំងនឹងអតីតប្រធានាធិបតី មរស៊ី។
ជនរងគ្រោះបាត់បង់ជីវិត ដែលសុទ្ធត្រូវគ្រាប់ចំក្បាល ឬដើមទ្រូង ! ប៉ុន្តែជាថ្មីម្តងទៀត ព័ត៌មានទាំងនេះ គ្មានអ្វីប្រភពឯករាជ្យណាអាចផ្ទៀងផ្ទាត់បានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ