តុលាការអេហ្ស៊ីបបញ្ជាអោយឃុំខ្លួនលោកមរស៊ី ពីបទពាក់ព័ន្ធនឹងក្រុមឧទ្ទាមហាម៉ាស
នៅថ្ងៃសុក្រនេះ តុលាការអេហ្ស៊ីបបានចេញបញ្ជាអោយឃុំខ្លួនអតីតប្រធានាធិបតី ម៉ូហាមេដ មរស៊ី ចោទប្រកាន់ពីបទរួមដៃជើងជាមួយក្រុមឧទ្ទាមហាម៉ាសប៉ាឡេស្ទីន ក្នុងការវាយប្រហារក្រុមប៉ូលិស និងការរត់គេចចេញពីពន្ធនាគារ ក្នុងពេលដែលអេហ្ស៊ីបកំពុងបះបោរទំលាក់អតីតប្រធានាធិបតីអូស្ន៊ី មូបារ៉ាក់ នាដើមឆ្នាំ២០១១។ ក្រុមប្រឆាំងភាតរអ៊ីស្លាមបានបរិហារនិងប្រៀបប្រដូច ការសំរេចចិត្តរបស់តុលាការ ទៅនឹងសញ្ញានៃការវិលត្រលប់មកវិញនៃរបបផ្តាច់ការ មូបារ៉ាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
នៅថ្ងៃសុក្រនេះ អាជ្ញាធរអេហ្ស៊ីប បានចោទប្រកាន់អតីតប្រធានាធិបតីមរស៊ី ថាបានសម្លាប់ទាហាន និងអ្នកជាប់ពន្ធនាគារជាច្រើននាក់ នៅពេលដែលលោក និងសកម្មជនបក្សភាតរអ៊ីស្លាមរបស់លោក បានរត់គេចចេញពីពន្ធនាគារ កាលពីដើមឆ្នាំ២០១១ គឺក្នុងពេលដែល អេហ្ស៊ីបកំពុងតែបះបោរទំលាក់អតីតប្រធានាធិបតី អូស្ន៊ី មូបារ៉ាក់។ អាជ្ញាធរចោទលោកមរស៊ីថា បានរួមដៃជើងជាមួយក្រុមឧទ្ទាមហាម៉ាស។
គួររំលឹកថា បន្ទាប់ពីត្រូវបានកងទ័ពទំលាក់ពីតំណែងនៅថ្ងៃ ៣កក្កដា មក អតីតប្រធានាធិបតីមរស៊ី បានត្រូវឃុំខ្លួនក្នុងរយៈពេលកំណត់១៥ថ្ងៃ ដើម្បីតុលាការវាយតំលៃពីស្ថានភាពដែលលោកមរស៊ី និងសកម្មជនក្រុមភាតរអ៊ីស្លាមរបស់លោក បានលួចរត់ចេញពីពន្ធនាគារ។ ផ្នែកសន្តិសុខចង់ដឹងថា តើសកម្មជនភាតរអ៊ីស្លាមមានទទួលជំនួយពីក្រុមឧទ្ទាមបរទេសនានា ដូចជាក្រុមហាម៉ាស រឺក៏ក្រុមអេស្បូឡា ដែររឺទេ។ កាលពីថ្ងៃ២៣មិថុនា តុលាការអេហ្ស៊ីប បានវាយតំលៃថា ក្រុមឧទ្ទាមហាម៉ាសដែលកាន់អំណាចនៅហ្កាហ្សា និងក្រុមអេស្បួឡា ជាប់ពាក់ព័ន្ធនឹងការរត់ចេញពីគុករបស់អ្នកទោសនានា ដែលក្នុងនោះក៏មានរូបលោកមរស៊ីផងដែរ។ ប៉ុន្តែ លោកមរស៊ី បានប្រាប់ថា នៅពេលដែលលោកនិងក្រុមលោកបានរួចចេញពីគុកនោះ គឺដោយសារតែប្រជាជនបានបើកទ្វារគុកអោយលោករត់ចេញ។
ការប្រកាសចោទប្រកាន់របស់អាជ្ញាធរមកលើលោកមរស៊ី នៅថ្ងៃសុក្រនេះ ធ្វើឡើងតែប៉ុន្មានម៉ោងប៉ុណ្ណោះ មុននឹងប្រជាជនអេហ្ស៊ីបចុះធ្វើមហាបាតុកម្ម។ ដូចរាល់ដង គឺមានទាំងបាតុកម្មគាំទ្រ និងបាតុកម្មប្រឆាំងលោកមរស៊ីរួមគ្នា។
ការសំរេចចិត្តរបស់តុលាការឃុំខ្លួនលោកមរស៊ី ប្រហែលជាអាចបង្កអោយផ្ទុះអំពើហិង្សាសម្លាប់មនុស្សសាជាថ្មីម្តងទៀត។ កាលពីម្សិលមិញនេះ ប្រធានអង្គការសហប្រជាជាតិ លោក បាន់ គីមូន ទើបតែបានសុំអោយកងទ័ពអេហ្ស៊ីបដោះលែង លោកមរស៊ី ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ