សភាបារាំងសម្រេចអោយកងទ័ពបារាំងបន្តប្រតិបត្តិការយោធានៅអាហ្វ្រិកកណ្តាល
នៅថ្ងៃអង្គារម្សិលមិញតំណាងរាស្ត្របារាំងភាគច្រើនបានបោះឆ្នោតសម្រេចអោយកងទ័ពបារាំងបន្តប្រតិបត្តិការខ្លួនឈ្មោះថាសង់ហ្ការីនៅអាហ្វ្រិកកណ្តាលតទៅទៀត។ លោកហ្សង់ម៉ាក អៃរ៉ូល នាយករដ្ឋមន្ត្រីបារាំងបានទទួលស្គាល់ថា ប្រតិបត្តិការកងទ័ពបារាំងក្នុងការពង្រឹងសន្តិសុខសាធារណរដ្ឋអាហ្វ្រិកកណ្តាល ពិតជាប្រតិបត្តិការដ៏លំបាកប៉ុន្តែវាមានលក្ខណៈចាំបាច់។លោកស្រីសំបាប៉ាន់ហ្សាជាប្រធានាធិបតីអន្តរកាលអាហ្វ្រិកកណ្តាលបានសំដែងការត្រេកអរចំពោះការដែលបារាំងបន្តវត្តមានយោធាខ្លួនដើម្បីជួយប្រជាជនអាហ្វ្រិកកណ្តាល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
នៅសភាបារាំង ក្នុងក្រុងប៉ារីស ម្សិលមិញ តំណាងរាស្ត្របារាំងភាគច្រើន បានបោះឆ្នោតគាំទ្រអោយកងទ័ពបារាំង បន្តប្រតិបត្តិការយោធាសង់ហ្ការី នៅអាហ្វ្រិកកណ្តាលតទៅទៀត។ សម្លេងឆ្នោតគាំទ្រមាន ៤២៨សម្លេងច្រើនលើសលុប ធៀបនឹងសម្លេងជំទាស់១៤សម្លេង និងអនុប្បវាទ២១សម្លេង។ គួររំលឹកថា ក្រោយពេលមានប្រតិបត្តិការយោធា រៀងរាល់៤ខែម្តង សភាបារាំងបោះឆ្នោតស្តីពីការបន្តអន្តរាគមន៍យោធានេះ។
មុននឹងឈានដល់ការសម្រេចនេះ តំណាងរាស្ត្របារាំងបានជជែកគ្នាយ៉ាងតឹងសសៃក។ តំណាងរាស្ត្របក្សប្រឆាំង ប្រាប់ថា មិនជំទាស់នឹងប្រតិបត្តិការយោធានេះទេ ប៉ុន្តែ មិនពេញចិត្តនឹងមធ្យោបាយបារាំងនៅអាហ្វ្រិកកណ្តាល ដែលមានលក្ខណៈមិនគ្រប់គ្រាន់ មិនសមស្របជាមួយមហិច្ឆតារដ្ឋាភិបាលក្នុងការពង្រឹងសន្តិសុខ ។ បក្សប្រឆាំងរិះគន់ប្រធានាធិបតីបារាំង ថាមិនបានធ្វើសកម្មភាពគ្រប់គ្រាន់ ដើម្បីជំរុញអោយប្រទេសអឺរ៉ុបជាដៃគូផ្សេងទៀត បញ្ជូនទ័ពទៅជួយបារាំង នៅអាហ្វ្រិកកណ្តាល។
បារាំងបើកប្រតិបត្តិការនៅអាហ្វ្រិកកណ្តាល ៤ខែមកហើយ។ កងទ័ពបារាំង នៅទីនោះ មាន២០០០នាក់។ កងកម្លាំងចម្រុះអាហ្វ្រិក ឈ្មោះថា មីស្កា ក៏បានចូលរួមពង្រឹងសន្តិសុខ អាហ្វ្រិកកណ្តាលផងដែរ។ ប៉ុន្តែ អំពើហិង្សាកាប់សម្លាប់គ្នា នៅតែកើតមានជាប្រចាំ។ សហភាពអឺរ៉ុបធ្លាប់សន្យាដាក់ទ័ពជាងមួយពាន់នាក់ នៅទីនោះ ប៉ុន្តែនៅមិនទាន់កម្រើកបញ្ជូនទ័ពនៅឡើយទេ។ ដូច្នេះ បក្សប្រឆាំងបន្ទោសថាបារាំងថា ទទួលបន្ទុកហិរញ្ញវត្ថុ រឿងនេះ តែម្នាក់ឯង។ បក្សប្រឆាំងបង្ខំអោយអង្គការសហប្រជាជាតិបញ្ជូនកងទ័ពមួកខៀវ ទៅអាហ្វ្រិកកណ្តាលអោយបានឆាប់បំផុត។ រីឯនាយករដ្ឋមន្ត្រីហ្សង់ម៉ាក អៃរ៉ូលចង់អោយកងទ័ពមួកខៀវ ចុះទៅអាហ្វ្រិកកណ្តាល យ៉ាងយូរ ក្នុងខែក្រោយនេះ។
លោកអៃរ៉ូលរំលឹកថា ការដាក់ប្រតិបត្តិការរក្សាសន្តិភាពរបស់ទ័ពមួកខៀវ អនុញ្ញាតអោយធានាបាននូវការពង្រឹងកម្លាំងដ៏ចាំបាច់ផ្នែកយោធា ហើយសម្រាប់ផ្នែកស៊ីវិលវិញ វាជាការធានានូវការដាក់អាវុធ ធានាការបញ្ចេញពីកំណែនកងពល អោយក្រុមប្រយុទ្ធបានចូលក្នុងសង្គមវិញ រួមទាំងធានាការរៀបចំបោះឆ្នោតផងដែរ។
គួររំលឹកថា អាហ្វ្រិកកណ្តាលត្រូវរៀបចំការបោះឆ្នោតប្រធានាធិបតីនៅដើមឆ្នាំ២០១៥ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ