អ្នកកាសែតបារាំងម្នាក់ត្រូវគេសម្លាប់នៅសាធារណរដ្ឋអាហ្វ្រិកកណ្តាល
អ្នកកាសែតបារាំងមួយរូបត្រូវបានគេសម្លាប់ នៅក្នុងពេលកំពុងយកការណ៍ នៅក្នុងសាធារណរដ្ឋអាហ្វ្រិកកណ្តាល។ នេះបើយោងតាមសេចក្តីប្រកាសព័ត៌មានរបស់វិមានប្រធានាធិបតីបារាំង កាលពីល្ងាចថ្ងៃអង្គារ។ រហូតមកទល់នឹងពេលនេះ គេនៅមិនទាន់ដឹងច្បាស់នៅឡើយទេថា តើការសម្លាប់អ្នកកាសែតរូបនេះ គឺជាស្នាដៃរបស់អ្នកណា ហើយស្លាប់នៅក្នុងកាលៈទេសៈបែបណា? ក្រុមប៉ូលិសស៊ើបអង្កេតបារាំងត្រូវបានបញ្ជូនភ្លាមៗ ទៅកាន់កន្លែងកើតហេតុ ដើម្បីស៊ើបអង្កេតលើករណីនេះ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកកាសែតបារាំង ដែលត្រូវគេសម្លាប់ នៅសាធារណរដ្ឋអាហ្វ្រិកកណ្តាលនេះ គឺជាអ្នកថតរូប មានឈ្មោះថា Camille Lepage ភេទស្រី វ័យ ២៦ឆ្នាំ ហើយដែលរូបថតរបស់គាត់ ជាពិសេស នៅសាធារណរដ្ឋអាហ្វ្រិកកណ្តាល ត្រូវបានចុះផ្សាយដោយបណ្តាញសារព័ត៌មានអន្តរជាតិធំៗ ដូចជា Reuters និង BBC ជាដើម។
►សូមមើលរូបថតរបស់ Camille Lepage នៅលើវិបសៃតត៍ផ្ទាល់ខ្លួនរបស់គាត់
ជាអ្នកមានចំណង់ចំណូលចិត្តក្នុងការយកការណ៍ នៅក្នុងតំបន់ដាច់ស្រយាល Camille Lepage ធ្លាប់បានទៅយកការណ៍ នៅក្នុងប្រទេសស៊ូដង់ខាងត្បូង មុននឹងធ្វើដំណើរទៅអាហ្វ្រិកកណ្តាល។
សាកសពរបស់ Camille Lepage ត្រូវបានគេរកឃើញ កាលពីព្រឹកថ្ងៃអង្គារ នៅពេលដែលទាហានបារាំង ដែលកំពុងឈរជើងនៅក្នុងសាធារណរដ្ឋអាហ្វ្រិកកណ្តាល កំពុងធ្វើការឆែកឆេររថយន្តជាច្រើនគ្រឿងបើកបរដោយក្រុមជនប្រដាប់អាវុធ ដែលអះអាងថា ខ្លួនគឺជាក្រុមឧទ្ទាម Anti-balaka ពោលគឺ ក្រុមគ្រីស្ទានប្រដាប់អាវុធប្រឆាំងនឹងក្រុមប្រដាប់អាវុធឥស្លាម។ នៅក្នុងពេលឆែកឆេរ ទាហានបារាំង បានរកឃើញសាកសពរបស់អ្នកកាសែតបារាំង ក្នុងចំណោមសាកសព ៤ផ្សេងទៀត។
ក្រុមជនប្រដាប់អាវុធនៅលើរថយន្តទាំងនេះត្រូវបានចាប់បញ្ជូនខ្លួនទៅឲ្យប៉ូលិសអាហ្វ្រិកកណ្តាល និងប៉ូលិសបារាំងធ្វើការសាកសួរ អំពីដំណើរហេតុ ដែលនាំឲ្យស្លាប់អ្នកកាសែតរូបនេះ។
ភ្លាមៗក្រោយពីទទួលដំណឹងនេះ លោកហ្វ្រង់ស័រ ហូឡង់ ប្រធានាធិបតីបារាំង បានប្រកាសថា បារាំងនឹងចាត់វិធានការគ្រប់យ៉ាង ដើម្បីស្វែងរកអ្នកដែលបានធ្វើឃាតអ្នកកាសែតរូបនេះ។
“យើងចាំបាច់ត្រូវតែស្វែងរកការពិតជុំវិញសំណុំរឿងនេះ។ តើហេតុអ្វីបានជាគាត់ស្ថិតនៅក្នុងតំបន់នោះ? អ្នកណាជាអ្នកចាប់ខ្លួនគាត់ ហើយតើគាត់ត្រូវស្លាប់ដោយរបៀបណា? យើងចាំបាច់ត្រូវធ្វើយ៉ាងណាកុំឲ្យឃាតកត្រូវរួចទោស។ យើងនឹងស្វែងរកមុខពួកឃាតកឲ្យឃើញ ដើម្បីយកមកកាត់ទោសតាមផ្លូវច្បាប់។ នេះជាការអះអាងរបស់លោកហ្វ្រង់ស័រ ហូឡង់ កាលពីយប់ថ្ងៃអង្គារ។ លោកប្រធានាធិបតីបារាំងក៏បានអំពាវនាវផងដែរ ដល់គ្រប់អ្នកកាសែតទាំងអស់ឲ្យមានការប្រុងប្រយ័ត្នខ្ពស់បំផុត ចំពោះសុវត្ថិភាពផ្ទាល់ខ្លួន នៅក្នុងពេលបំពេញការងារ នៅក្នុងតំបន់ជម្លោះនៅអាហ្វ្រិក ជាពិសេស នៅសាធារណរដ្ឋអាហ្វ្រិកកណ្តាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ