អេហ្ស៊ីបយល់ព្រមទិញនាវាចម្បំាងបារំាងមីស្ត្រាល់ដែលរុស្ស៊ីលែងចង់បាន
នៅក្នុងប្រទេសបារំាង វិមានប្រធានាធិបតីបានប្រកាសឲ្យដឹងនៅរសៀលថ្ងៃពុធ ទី២៣ កញ្ញាថា ប្រទេសអេហ្ស៊ីបបានយល់ព្រមជាគោលការណ៍ក្នុងការទិញយកនាវាចម្បំាងមីស្ត្រាល់ (Mistral) ទំាងពីរគ្រឿងដែលប្រទេសរុស្ស៊ីបានសម្រេចឈប់យកវិញ។ គួររម្លឹកជូនថាតាមគម្រោង នាវាចម្បំាងបារំាងមីស្ត្រាល់ទំាងពីរគ្រឿងនោះនឹងត្រូវបញ្ជូនទៅឲ្យរុស្ស៊ីដែលជាអ្នកកម្ម៉ង់ទិញ តែដោយសារការលូកដៃរបស់រុស្ស៊ីទៅក្នុងវិបត្តិអ៊ុយក្រែន បារំាងក៏បានផ្អាកការបញ្ជូនទៅឲ្យរុស្ស៊ី និងដែលនៅទីបំផុត រុស្ស៊ីក៏បានសម្រេចឈប់យកមីស្រ្តាល់ទំាងពីរគ្រឿងនោះតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
កិច្ចព្រមព្រៀងជាគោលការណ៍រវាងបារំាង និងអេហ្ស៊ីបក្នុងការលក់នាវាចម្បំាងមីស្រ្តាល់ទំាងពីរគ្រឿងទៅឲ្យអេហ្ស៊ីបបានលេចរូបរាងឡើង បន្ទាប់ពីមានកិច្ចសន្ទនារវាងលោកប្រធានាធិបតីបារំាងហ្រ្វង់ស័រ ហូឡង់ និងសមភាគីអេហ្ស៊ីបលោកអាល់ស៊ីស៊ី។ គួរជម្រាបជូនថា តំាងពីប្រទេសរុស្ស៊ីដែលជាម្ចាស់ដើមកម្ម៉ង់នាវាចម្បំាងមីស្រ្តាល់ទំាងពីរគ្រឿងឈប់យកវិញមក មានប្រទេសចំនួន ៤បានសម្លឹងចង់បាននាវាមីស្រ្តាល់ទំាងពីរគ្រឿងនោះ គឺកាណាដា ឥណ្ឌា សិង្ហបុរី និងប្រទេសអេហ្ស៊ីប។ តែក្នុងចំណោមបេក្ខភាពទំាង ៤ប្រទេសនោះ អេហ្ស៊ីបបានបង្ហាញឲ្យឃើញពីការចង់បានខ្លំាងជាងគេ។
លោក Stéphane Le Foll អ្នកនំាពាក្យរដ្ឋាភិបាលបារំាងបានថ្លែងឲ្យដឹងនៅក្រោយកិច្ចប្រជុំគណៈរដ្ឋមន្រ្តីនាថ្ងៃពុធ ទី២៣ កញ្ញាថា ការចរចាដែលបានចាប់ផ្តើមជាមួយប្រទេសអេហ្ស៊ីបកំពុងចម្រើនទៅមុខគួរឲ្យកត់សម្គាល់។ អ្វីដែលគេនៅមិនទាន់ដឹងនោះគឺថា តើបារំាងបានលក់នាវាមីស្រ្តាល់ទំាងពីរគ្រឿងឲ្យអេហ្ស៊ីបក្នុងតម្លៃប៉ុន្មាន។ តែបើយោងតាមការបញ្ជាក់របស់លោក Le Foll បារំាងអត់ខាតលុយទេ និងថា កិច្ចចរចាបានធ្វើឡើងយ៉ាងលំអិត និងដែលនឹងត្រូវប្រកាសឲ្យដឹងនាពេលខាងមុខ។ បើផ្អែកតាមព័ត៌មានចុះផ្សាយក្នុងកាសែតមួយចំនួនឲ្យដឹងថា តម្លៃដែលបារំាងបានយល់ព្រមលក់ឲ្យអេហ្ស៊ីបត្រូវបានអេហ្ស៊ីបបញ្ជាក់ថា ថ្លៃជ្រុល។
គួររម្លឹកជូនឡើងវិញថា គឺកាលពីឆ្នំា ២០១១ ក្នុងជំនាន់លោកប្រធានាធិបតីបារំាងសាកូហ្ស៊ីដែលរុស្ស៊ីបានកម្ម៉ង់ឲ្យបារំាងផលិតនាវាចម្បំាងមីស្រ្តាល់ចំនួនពីរគ្រឿងក្នុងតម្លៃប្រមាណជា ១ ២០០លានអឺរ៉ូ។ តាមគម្រោង បារំាងត្រូវបញ្ជូននាវាមួយគ្រឿងដំបូងឲ្យរុស្ស៊ីតំាងពីឆ្នំា ២០១៤ ម្ល៉េះ តែដោយសារការលូកដៃរបស់រុស្ស៊ីនៅក្នុងវិបត្តិអ៊ុយក្រែន បារំាងក៏ផ្អាកការបញ្ជូនទៅឲ្យរុស្ស៊ី។ ទីបំផុត រុស្ស៊ីក៏បានសម្រេចឈប់យកនាវាមីស្រ្តាល់ទំាងពីរគ្រឿងនោះវិញ។
បន្ទាប់ពីចរចាគ្នាអស់រយៈពេល ៨ខែ កិច្ចព្រមព្រៀងមួយត្រូវបានរកឃើញរវាងប៉ារីស និងមូស្គូកាលពីថ្ងៃទី៥ សីហាកន្លងទៅ។ នៅក្នុងកិច្ចព្រមព្រៀងនោះ បារំាងសុទ្ធចិត្តប្រគល់ទៅឲ្យរុស្ស៊ីវិញនូវទឹកប្រាក់សឹងតែទំាងអស់ដែលរុស្ស៊ីបានកក់ ពោលជិត ១ ០០០លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ