រដ្ឋអាជ្ញាបារាំងបើកការស៊ើបអង្កេតថ្មី ករណីបំពានផ្លូវភេទដោយទាហានបារាំង នៅអាហ្វ្រិកកណ្តាល
រដ្ឋអាជ្ញាអមតុលាការក្រុងប៉ារីស បានចាប់ផ្តើមបើកការស៊ើបអង្កេតថ្មីមួយទៀត ទៅលើករណីបំពារបំពានផ្លូវភេទ ដែលប្រព្រឹត្តិដោយកងទ័ពបារាំង មានបេសកកម្មនៅប្រទេសអាហ្វ្រិកកណ្តាល។ នេះជាការចាប់ផ្តើមស៊ើបអង្កេត បន្ទាប់ពីអង្គការសហប្រជាជាតិ បានទំលាយដំណឹង ដែលគេសង្ស័យពីសកម្មភាពរំលោភបំពាន របស់នាយទាហានបារាំង ក្នុងពេលបំពេញបេសកកម្ម ចន្លោះពីឆ្នាំ២០១៣ ដល់២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
កាលពីសប្តាហ៍មុននេះ អង្គការសហប្រជាជាតិ បានប្រកាសថាគេបានទទួលព័ត៌មានជាច្រើន ដែលអះអាងថា កងទាហានបារាំងដែលមានបេសកកម្ម នៅប្រទេសអាហ្វ្រិកកណ្តាល បានប្រព្រឹត្តិអំពើរំលោភបំពានផ្លូវភេទទៅលើស្រ្តី និងកុមារ ជាថ្នូរនឹងប្រាក់បន្តិចបន្តួច។ ដំណឹងនេះបានជូនទៅដល់ក្រសួងការពារជាតិបារាំង ហើយក្រសួងបានបញ្ជូនបន្ត ទៅកាន់រដ្ឋអាជ្ញាប្រចាំក្រុងប៉ារីស ដើម្បីបើកការស៊ើបអង្កេត។ ទោះបីជាយ៉ាងណាក៏ដោយ សេចក្តីជូនដំណឹងរបស់អង្គការសហប្រជាជាតិ មិនបានបញ្ជាក់លំអិត អំពីចំនួនជនរងគ្រោះ អាយុ រឺក៏ចំនួននាយទាហានបារាំង ដែលជាប់ពាក់ព័ន្ធ ថាមានប៉ុន្មាននាក់នោះទេ។
លោក ស្តេហ្វាន ឌូចារីក អ្នកនាំពាក្យអង្គការសហប្រជាជាតិ បានបញ្ជាក់ផងដែរថា ក្រុមការងាររបស់អង្គការសហប្រជាជាតិ បានជួបសាកសួរជាមួយមនុស្ស១០៨នាក់ ដែលសុទ្ធតែអះអាងខ្លួនថាជាជនរងគ្រោះដោយសារការបំពានរបស់ទាហានបារាំង។ ក្នុងចំណោមក្មេងស្រីជនជាតិអាហ្វ្រិកកណ្តាល ដែលបានអះអាងថាជាជនរងគ្រោះ មាន៣នាក់បាននិយាយថា នៅរវាងឆ្នាំ២០១៤ ពួកគេត្រូវបានទាហានបារាំងចាប់ចង សម្រាតខោអាវ ហើយបង្ខំឲ្យរួមភេទជាមួយសត្វឆ្កែ។ បន្ទាប់មកទៀតទាហានបារាំង បានឲ្យប្រាក់ទៅពួកគេ។ តែយ៉ាងណាក៏ដោយ អ្នកនាំពាក្យខាងលើ បានបញ្ជាក់ថា គេនៅមិនទាន់អាចច្បាស់ប្រាដកថា ការអះអាងរបស់ស្ត្រីទាំងនោះ គឺជាការពិតទាំងស្រុងទេ។
សូមបញ្ជាក់ថា នៅឆ្នាំ២០១៣ បារាំងបានចេញធ្វើប្រតិបត្តិការដែលមានឈ្មោះថា ប្រតិបត្តិការ Sangaris នៅតំបន់ Dékoa ប្រទេសអាហ្វ្រិកកណ្តាល ដើម្បីកសាងសន្តិភាពនៅតំបន់នេះ។ នេះមិនមែនជាករណីទីមួយទេ ដែលកងទាហានបារាំងក្នុងបេសកកម្មនេះ ទទួលរងនូវការចោទប្រកាន់ ពីបទបំពារបំពានផ្លូវភេទ។ រដ្ឋអាជ្ញាក្រុងប៉ារីស ធ្លាប់បានបើកការស៊ើបអង្កេតម្តងរួចមកហើយ ដោយបានសួរចម្លើយទាហានបារាំងដែលជាប់សង្ស័យ ចំនួន៥នាក់ តែទីបំផុត មិនបានធ្វើការដាក់បន្ទុកទេ។ យ៉ាងណាមិញ មិនមែនមានតែទាហានបារាំងទេ ដែលជាប់ការសង្ស័យ នៅមានកងកម្លាំងពិសេសរបស់អង្គការសហប្រជាជាតិ មកពីប្រទេស ប៊ុយរុនឌី និងប្រទេសហ្កាបុង ក៏រងការចោទប្រកាន់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ