អាហ្វ្រិកកណ្តាលរងភាពវឹកវរហិង្សា ប្រធានាធិបតីចាកចេញពីអ.ស.ប.ជាបន្ទាន់
ភាពតានតឹងបន្តគ្របដណ្តប់ក្រុងបង់ហ្គីប្រទេសអាហ្វ្រិកកណ្តាលដដែល ! មានស្លាប់យ៉ាងហោចណាស់ ៣៦នាក់ នៅក្នុងប៉ះទង្គិចហិង្សាចុងក្រោយ។ អាហ្វ្រិកកណ្តាលធ្លាក់ក្នុងភាពហិង្សាជាថ្មី តាំងពីចុងសប្តាហ៍មុនមក។ នៅថ្ងៃចន្ទទី ២៨កញ្ញាម្សិលមិញ បាតុករបីនាក់បានស្លាប់ ក្នុងបង្ក្រាបបំបែកហ្វូង នៅក្បែរវិមានប្រធានាធិបតី។ តែក្រុមមួកខៀវអ.ស.ប.នៅអាហ្វ្រិកខាងកណ្តាល ដែលទទួលបន្ទុករក្សាសន្តិសុខ បានបដិសេធ។ មិនតែប៉ុណ្ណោះ អ្នកទោសជាច្រើនបានរត់ចេញពីគុក ហើយនៅយប់មិញក៏ដូចជាយប់មុន គ្មាននរណាគោរពបម្រាមគោចរឡើយ។ លោកស្រីប្រធានាធិបតីអាហ្រ្វិកកណ្តាល បានថ្កោលទោសអំពើហិង្សាពីវេទិកាអង្គការសហប្រជាជាតិ និងបានរួសរាន់ត្រលប់ចូលស្រុកមុនកាលកំណត់។
ចុះផ្សាយនៅថ្ងៃ៖
ស្តាប់ - ០២:១៦
រដ្ឋធានីបង់ហ្គី ត្រូវគាំងស្តូកស្តឹង ក្នុងបរិយាកាសដ៏តានតឹងបំផុត មានទាំងអំពើហិង្សា និងការចូលលួចប្លន់។ គ្រាន់តែព្រះអាទិត្យមិនទាន់លិចបាត់ស្រួលបួលផង ក្រុមចោរលួចបានសម្រុកចូលតាមអាគារ ស្ថាប័នរបស់អង្គការមនុស្សធម៌។ ពេលថ្ងៃ ជាអំពើហិង្សា ! បើតាមប្រភពព័ត៌មានផ្តល់ដោយអ្នកយកការណ៍វិទ្យុបារាំងអន្តរជាតិ បាតុករនៅក្រុងបង់ហ្គី ហាក់មានសន្ទុះកាន់តែខ្លាំងនៅពេលឃើញមានកម្លាំងយុទ្ធជន anti-balaka បានចូលមកដល់រដ្ឋធានី។
នៅរសៀលថ្ងៃចន្ទម្សិលមិញនេះដដែល អ្នកយាមពន្ធនាគារក្រុងបានរត់បាត់អស់ បណ្តាលឱ្យអ្នកទោសប្រមាណជាង៦០០នាក់ ភាគច្រើនជាពួកអង់ទីបាឡាកា អាចចេញពីគុកបានដោយសេរី និងបង្កឱ្យមានការផ្ទុះអាវុធ បាញ់រះឡើង រវាងអ្នកទោសនិងទាហានមួកខៀវ។ យ៉ាងច្របូកច្របល់ ខាងក្រុមបាតុករ បាននាំគ្នាសម្រុកទៅកាន់វិមានប្រធានាធិបតី ដើម្បីស្រែកទាមទារឱ្យប្រធានាធិបតីអន្តរកាលចុះចេញពីតំណែង រាលដាលជាអំពើហិង្សា ស្លាប់បាតុករបីនាក់ និងរបួស៧នាក់។
ប៉ុន្តែអ្នកទទួលខុសត្រូវទាហានមួកខៀវអង្គការសហប្រជាជាតិ(Minusca)ទទួលបន្ទុកការពារប្រធានាធិបតីអាហ្វិ្រកកណ្តាលបានបដិសេធ និងអះអាងនៅក្នុងសេចក្តីថ្លែងការណ៍ ថាក្រុមមួកខៀវបានបំបែកហ្វូងបាតុកម្មមែន តែមិនបានធ្វើការបាញ់រះទៅលើបាតុករទេ ហើយនិងធ្វើការស្រាវជ្រាវផ្ទៀងផ្ទាត់ការចោទប្រកាន់នេះ។
ប្រឈមនឹងស្ថានការណ៍បែបនេះ សាធារណរដ្ឋកុងហ្គោជិតខាងបានសម្រេចបិទព្រំប្រទល់នៅយប់មិញ។ ឯចំណែកប្រធានាធិបតី លោកស្រី កាទ្រីន សំបា ប៉ង់ហ្សា ដែលកំពុងចូលរួមក្នុងមហាសន្និបាតអង្គការសហប្រជាជាតិ នៅទីក្រុងញូវយ៉ក បន្ទាប់ពីបានថ្កោលទោសអំពើហិង្សា និងអំពាវនាវឱ្យពលរដ្ឋអត់ធ្មត់និងចេះយោគយល់រួមរស់ជាមួយគ្នាមក ក៏បានធ្វើដំណើរត្រលប់ចូលមាតុវិញជាបន្ទាន់។
ជារដ្ឋាភិបាលអន្តរកាល បង្កើតឡើងដោយមានការគាំទ្រពីអង្គការសហប្រជាជាតិ កាលពីឆ្នាំ២០១៤ លោកស្រីកាទ្រីន សំបា ប៉ង់ហ្សា ជាប្រធានាធិបតីដែលលែងសូវផ្តល់ជំនឿដល់ពលរដ្ឋ តែអវត្តមានរបស់លោកស្រី និងមេដឹកនាំជាន់ខ្ពស់មួកខៀវ ក៏ជាចំណែកមួយជំរុញឱ្យមានអំពើហិង្សាផ្ទុះឡើងយ៉ាងទាន់ហន់លើកនេះ។ សម្រាប់រដ្ឋាភិបាលស្តីទី អ្នកទទួលខុសត្រូវដឹកនាំបង្កភាពហិង្សានេះ កំពុងសាកល្បងធ្វើជាឧបសគ្គរាំងស្ទះដំណើរការបោះឆ្នោតនៅខែក្រោយ ក្នុងក្របខ័ណ្ឌឆ្លងអន្តរកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ