ការវាយប្រហារដោយកាំបិត ២ផ្ទួនគ្នា ក្នុងយប់តែមួយ នៅព្រុចសែល និង ឡុងដ៍
មានករណីវាយប្រហារដោយកាំបិត ទៅលើទាហានយាមល្បាត ពីរកន្លែងផ្ទួនគ្នា ក្នុងយប់តែមួយ មួយនៅកណ្តាលទីក្រុងព្រុចសែល ប្រទេសប៊ែលហ្សិក និងមួយទៀតនៅទីក្រុងឡុងដ៍ ប្រទេសអង់គ្លេស។ ករណីទាំងពីរ សុទ្ធតែត្រូវបានអាជ្ញាធរ ចាត់ទុកថាជាអំពើភេរវកម្ម។ នៅព្រុចសែល ទាហានល្បាត បានបាញ់សម្លាប់ជនដៃដល់ នៅនឹងកន្លែង ឯចំណែកនៅទីក្រុងឡុងដ៍ សមត្ថកិច្ចបានធ្វើការឃាត់ខ្លួន ជនដៃដល់ ដែលមានគំរោងធ្វើប្រតិបត្តិការចាក់សម្លាប់មនុស្ស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
ទីក្រុងព្រុចសែល វេលាម៉ោង៨យប់ ថ្ងៃទី ២៥សីហា នៅទីលានកណ្តាលក្រុង ដែលជាតំបន់ប្រកបដោយការយាមកាមខ្ពស់បំផុត ស្រាប់តែមានជនម្នាក់ បានស្ទុះយកកាំបិត មកចាក់ទាហានយាមល្បាតពីរនាក់។ ពេលកំពុងធ្វើសកម្មភាព ជននោះបានស្រែកជាភាសាអារ៉ាប់ ដើម្បីឧទ្ទិសដល់ព្រះអាឡា។ ភ្លាមនោះ ទាហានបានយកកាំភ្លើងបាញ់តបវិញ ធ្វើឲ្យជនដៃដល់ ស្លាប់នៅនឹងកន្លែង។ ទាហានម្នាក់ ក្នុងចំណោម២នាក់នោះ បានត្រូវរបួសចំដៃ ដោយសារកាំបិតរបស់ជនដៃដល់។
នគរបាលក្រុងព្រុចសែល បានបញ្ជាក់ថាអំពើនេះគឺជាអំពើភេរវកម្មបែបអ៊ីស្លាមជ្រុលនិយម ដែលជនដៃដល់ មានបំណងវាយប្រហារ ទៅលើសមត្ថកិច្ចការពារសន្តិសុខ។ បើយោងតាមការផ្សាយរបស់បណ្តាញព័ត៌មានប៊ែលហ្សិក ជនដៃដល់ គឺជាជនជាតិម៉ាលី មានអាយុជាង៣០ឆ្នាំ។
នៅយប់ថ្ងៃសុក្រ ទី២៥សីហាដែរ នៅទីក្រុងឡុងដ៍ប្រទេសអង់គ្លេស សមត្ថកិច្ច បានចាប់ខ្លួនបុរសម្នាក់ បានទាន់ពេលវេលា មុននឹងជននោះធ្វើសកម្មភាព។ នៅវេលាម៉ោងប្រមាណជា ៨ និង ៣៥នាទីយប់ ជនម្នាក់បានបើករថយន្តមកឈប់ នៅទីលានខាងមុខព្រះរាជវាំង Buckingham ដែលជាទីកន្លែងមានការយាមល្បាតខ្ពស់បំផុត។ ដោយមានការសង្ស័យ នគរបាលបានទៅពិនិត្យរថយន្ត ហើយបានរកឃើញកាំបិតដ៏ធំមួយនៅក្នុងនោះ ហើយក៏ឈានទៅដល់ការចាប់ឃាត់ខ្លួន ជននោះតែម្តង។ ក្នុងពេលឃាត់ខ្លួន នគរបាលពីរនាក់បានរងរបួសស្រាល ដោយសារមុខកាំបិតរបស់ជនដៃដល់។
សូមបញ្ជាក់ថា ទាំងទីក្រុងព្រុចសែល ទាំងទីក្រុងឡុងដ៍ ក៏ដូចជាទីក្រុងអឺរ៉ុបផ្សេងៗទៀត សុទ្ធតែបានឆ្លងកាត់នូវអំពើភេរវកម្មអ៊ីស្លាមជ្រុលនិយម។ បន្ទាប់ពីទីក្រុងប៉ារីស ទីក្រុងព្រុចសែល បានរងអំពើភេរវកម្មដ៏ធ្ងន់បំផុតមិនធ្លាប់មាន កាលពីថ្ងៃទី ២២ មីនា ២០១៦។ ភេរវកម្មបំផ្ទុះគ្រាប់បែក នៅចំកណ្តាលក្រុងព្រុចសែល និងនៅព្រលានយន្តហោះ ក្នុងថ្ងៃតែមួយ ដោយបានផ្តាច់ជីវិតមនុស្សអស់៣២នាក់ និងរបួសប្រមាណ១៥០នាក់។
ដូចគ្នាដែរ ឆ្នាំ២០១៧ នេះ អង់គ្លេសបានរងការវាយប្រហារភេរវកម្មជាច្រើនលើក។ ករណីបំផ្ទុះគ្រាប់បែកនៅខាងមុខទីកន្លែងប្រគុំតន្ត្រី នៅទីក្រុងម៉ាន់ឆែស្ទឺរ កាលពីខែឧសភា បានបណ្តាលឲ្យស្លាប់មនុស្ស២២នាក់។ នៅទីក្រុងឡុងដ៍ មានករណីបើករថយន្តកិនមនុស្ស និងយកកាំបិតចាក់មនុស្សដល់ទៅ២លើករួចមកហើយ លើកទីមួយនៅខែមីនា មានស្លាប់៥នាក់ និងលើកទីពីរនៅខែមិថុនា មានស្លាប់៨នាក់។ ទីក្រុងផ្សេងៗទៀតនៅអឺរ៉ុប សុទ្ធតែបានជួបនូវករណីវាយប្រហារភេរវកម្មអ៊ីស្លាមជ្រុលនិយម ប្រហាក់ប្រហែលគ្នានេះជាញឹកញាប់។ ការយាមកាមសន្តិសុខ ត្រូវបានរិតបន្តឹងនៅគ្រប់ទីកន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ