ជនភៀសខ្លួន៖ជំនួបកំពូលវិសាមញ្ញរវាងសហភាពអឺរ៉ុប និងតួកគីសាជាថ្មី
ជាថ្មីម្តងទៀត សហភាពអឺរ៉ុប និងតួកគី កំពុងតែជួបប្រជុំគ្នានៅទីក្រុងព្រុយសែល ដើម្បីដោះស្រាយវិបត្តិស្តីពីបញ្ហាជនភៀសខ្លួនរាប់លាននាក់ ដែលកំពុងតែធ្វើឲ្យសហភាពអឺរ៉ុបរង្គោះរង្គើរស្ទើរតែរលំ។ អឺរ៉ុបត្រូវការជំនួយពីតួកគី ក្នុងការទប់លំហូរជនភៀសខ្លួន ឯតួកគីក៏ប្រើស្នៀតនេះ ដើម្បីកាច់ឫកទាមទារលក្ខខណ្ឌពីសហភាពអឺរ៉ុបវិញដែរ។ នេះមិនមែនជាលើកទីមួយទេ ដែលមានជំនួបកំពូលដើម្បីដោះស្រាយវិបត្តិនេះ ក៏ប៉ុន្តែ ពេលវេលាកាន់តែខិតទៅមុខ តែដំណោះស្រាយជាក់លាក់នៅតែគ្មានដដែល ឯជនភៀសខ្លួន នៅតែបន្តធ្វើដំណើរមកកាន់ប្រទេសក្រិក ក្នុងមួយថ្ងៃ ពី២០០០ ទៅ ៣០០០នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៦
ជំនួបកំពូលកាលពីថ្ងៃទី២៩ វិច្ឆិកាឆ្នាំទៅ តួកគី និងសហភាពអឺរ៉ុប បានព្រមព្រៀងគ្នាលើច្រើនចំណុច ដែលក្នុងន័យរួម គឺអឺរ៉ុបយល់ព្រមចាប់ផ្តើមពិចារណារឿងបញ្ចូលតួកគីជាសមាជិក ជាថ្នូរនឹងការដែលតួកគីសន្យាថានឹងជួយទប់លំហូរជនភៀសខ្លួន។ ក៏ប៉ុន្តែសហភាពអឺរ៉ុបក៏ត្រូវផ្តល់ប្រាក់ដល់តួកគីដែរ គឺចំនួនប្រមាណជា ៣ពាន់លានអឺរ៉ូ ក្នុងមួយឆ្នាំ។
ចាប់ពីដើមឆ្នាំ២០១៦ មាន១៣ម៉ឺននាក់ បានមកដល់ក្រិកបន្ថែមទៀត៖
ដើម្បីទប់លំហូរជនភៀសខ្លួន តួកគីបានសន្យាថានឹងពង្រឹងការត្រួតពិនិត្យតាមព្រំដែន ជាពិសេសព្រំដែនទឹកឆ្លងពីតួកគីទៅក្រិក ដែលតាមធម្មតាក្រុមជនភៀសខ្លួន នំាគ្នាជិះទូកឆ្លងទៅក្រិក។ បន្ទាប់មកទៀតតួកគីសន្យាផ្តល់ក្រដាសស្នាមអនុញ្ញាតិឲ្យជនភៀសខ្លួនមកពីស៊ីរី អាចធ្វើការនៅតួកគីបាន ហើយរដ្ឋតួកគីសន្យាជួយទំនុកបំរុង ឲ្យកុមារដែលជាកូនចៅជនភៀសខ្លួន អាចចូលសាលារៀន។ ហើយជាចុងក្រោយគឺធ្វើយ៉ាងណា បំបែកបណ្តាញទុច្ចរិកដែលរកស៊ីដឹកជញ្ជូនជនភៀសខ្លួន ឆ្លងទូកទៅក្រិក និងកន្លែងផលិតអាវពោង រឺក៏ទូកពោងកៅស៊ូជាដើម។
ទាំងអស់នេះជាការសន្យារបស់តួកគី តែការពិតជាក់ស្តែងនៃការអនុវត្តគឺថា វានៅមិនទាន់មានលទ្ធផលទេ ព្រោះថាជនភៀសខ្លួននៅតែបន្តឆ្លងទៅក្រិកដដែល។ មួយថ្ងៃៗ មានយ៉ាងហោចណាស់ ពី ២ ទៅ៣ពាន់នាក់ ដែលឆ្លងទូកមកក្រិក។ ហើយកាលពីថ្ងៃអាទិត្យទី ៦ មីនានេះ មានស្លាប់២៥នាក់ទៀត ដោយសារលិចទូក។ បើយើងគិតពីដើមឆ្នាំ២០១៦នេះមក ជនភៀសខ្លួនដែលបានមកដល់ក្រិក មានចំនួនប្រមាណជា១៣ម៉ឺននាក់ ឯនោះ។
តួកគីព្រមទទួលយកជនអន្តោប្រវេសន៍សេដ្ឋកិច្ច ត្រឡប់ពីក្រិកវិញ៖
អ្វីដែលសហភាពអឺរ៉ុបសង្ឃឹម គឺសុំឲ្យតួកគីធ្វើឲ្យបានដិតដល់ ឲ្យបានកាន់តែខ្លាំង នូវអ្វីដែលតួកគីបានសន្យាកាលពីខែវិច្ឆិកា។ កាលពីថ្ងៃទី ៣មីនា លោក ដូណាល់ ទូស្ក៍ ប្រធានក្រុមប្រឹក្សាអឺរ៉ុប បានទៅជួបលោកអ៊ែកដូហ្កាន់ ប្រធានាធិបតីតួកគីដល់ផ្ទះ ដើម្បីបញ្ចុះបញ្ចូលឲ្យតួកគី ព្រមទទួលយកជនអន្តោប្រវេសន៍ ដែលមិនត្រូវបានគេប្រគល់ក្រដាសស្នាមទទួលស្គាល់ ជាជនភៀសខ្លួន ឲ្យត្រឡប់ទៅតួកគីវិញ។
សូមរំលឹកថា ក្នុងចំណោមមនុស្សដែលនាំគ្នាធ្វើដំណើរមកដល់ក្រិកទាំងអស់ មិនមែនសុទ្ធតែត្រូវបានគេទទួលស្គាល់ជាជនភៀសខ្លួនទេ គឺមកលាយឡំគ្នាទាំងអស់។ អ្នកដែលគេទទួលស្គាល់ជាជនភៀសខ្លួន គឺអ្នកដែលមកពីប្រទេសដែលកំពុងតែមានសង្រ្គាម ដូចជាប្រទេសស៊ីរី និងអ៊ីរ៉ាក់ជាដើម។ ចំណែកប្រជាជនមកពីប្រទេសផ្សេងទៀត ដូចជាប៉ាគីស្ថាន អាហ្វហ្គានីស្ថាន រឺបង់ក្លាដែស គឺមិនត្រូវបានគេទទួលស្គាល់ជាជនភៀសខ្លួនទេ តែគេហៅថាជាជនអន្តោប្រវេសន៍សេដ្ឋកិច្ច គឺពួកគេរត់មកដើម្បីស្វែងរកការងារធ្វើនៅអឺរ៉ុប មិនមែនរត់មកដើម្បីគេចពីគ្រាប់កាំភ្លើង គ្រាប់បែកទេ។
អ្វីដែលសហភាពអឺរ៉ុប ចង់បាននាពេលនេះ គឺបិទផ្លូវឆ្លងកាត់តំបន់បាល់កង់ឲ្យជិតតែម្តង ហើយប្រើប្រាស់ក្រិក ជាកន្លែងតែមួយគត់ ដើម្បីចុះបញ្ជីរជនភៀសខ្លួនស្របច្បាប់ មុននឹងបញ្ជូនបែងចែកទៅតាមប្រទេសផ្សេងៗដែលទទួលយកពួកគេ។ ក្នុងករណីដែលជនភៀសខ្លួនណា ដែលមិនត្រូវបានគេទទួលស្គាល់ថាជាជនភៀសខ្លួនស្របច្បាប់ គឺក្រិកមានសិទ្ធិបញ្ជូនត្រឡប់ទៅប្រទេសតួកគីវិញ។ ហើយបន្ទាប់មកទៀត តួកគី នឹងសម្រេចបញ្ជូនជនភៀសខ្លួនទាំងនោះត្រឡប់ទៅប្រទេសដើមវិញ។
ដូច្នេះហើយបានជាអឺរ៉ុបសុំឲ្យតួកគីព្រមទទួលជនភៀសខ្លួន ត្រឡប់ពីក្រិកវិញ ចាប់ពីខែមិថុនាទៅ។ បើតាមការឲ្យដំណឹង លោកប្រធានាធិបតីតួកគី បានសុខចិត្តហើយលើបញ្ហានេះ ហើយតួកគីនឹងរៀបចំធ្វើកិច្ចព្រមព្រៀងបញ្ជូនជនភៀសខ្លួន ត្រឡប់ទៅប្រទេសដើមវិញ ជាមួយនឹងប្រទេសចំនួន១៤ ផងដែរ។
ពួកឈ្មួញដឹកជញ្ជូនជនភៀសខ្លួន រកចំណូលបាន២ពាន់លានអឺរ៉ូ៖
ចំណុចមួយទៀតដែលសំខាន់ដែរ គឺសុំឲ្យតួកគីបង្កើនប្រតិបត្តិការ ឲ្យមានប្រសិទ្ធិភាព ដើម្បីបំបែកបណ្តាញដឹកជញ្ជូនជនភៀសខ្លួនតាមទូក។ ក្នុងរយៈពេលជិត២ឆ្នាំនេះ របរដឹកជញ្ជូនជនភៀសខ្លួននេះ គឺកាក់កបណាស់។ បើតាមតួលេខ ប្រាក់ចំណេញសរុបរបស់ពួកឈ្មួញទុច្ចរិកមានប្រហែល២ពាន់លានអឺរ៉ូ ឯនោះ។ នេះជាទំងន់សេដ្ឋកិច្ចមួយរបស់តួកគីផងដែរ ដែលគេពិបាកសង្ឃឹមថារដ្ឋាភិបាលតួកគីអាចនឹងកំចាត់វាបានសម្រេចនោះទេ ព្រោះថាមានមន្ត្រីពុករលួយនៅតាមមូលដ្ឋាន ដែលទ្រាំបិទភ្នែក រឺក៏រកស៊ីជាមួយពួកឈ្មួញ តែម្តង។
តួកគីវាយឫកដាក់សហភាពអឺរ៉ុប៖
ទោះបីជាវិបតិ្តជនភៀសខ្លួន មិនមែនជាកំហុសរបស់តួកគីក៏ដោយ តែតួកគីមិនបានជួយធ្វើអ្វីដើម្បីបង្អាក់វាទេ ហើយតួកគីឆក់ឱកាសនេះ ដើម្បីធ្វើកល ដាក់សហភាពអឺរ៉ុប។ រដ្ឋាភិបាលរបស់លោកអ៊ែកដូហ្កាន់ មួយរយៈពេលចុងក្រោយនេះ ឯកោខ្លាំង ព្រោះតែនយោបាយផ្តាច់ការ ងប់ងល់ជ្រុលហួសហេតុនឹងបញ្ហាជនជាតិគួដ។ គាត់មិនត្រូវគ្នា ជាមួយរុស្ស៊ី ហើយសហរដ្ឋអាមេរិកមិនកាន់ជើងទៀត។ អញ្ចឹងលោក អ៊ែកដូហ្កាន់ នៅសល់តែសហភាពអឺរ៉ុបមួយទៀតតែប៉ុណ្ណោះ។
តួកគីយកបញ្ហាជនភៀសខ្លួន ជាលេស ដើម្បីកំញើញទាមទារនេះ ទាមទារនោះ ពីសហភាពអឺរ៉ុប មានទាំងជំនួយហិរញ្ញវត្ថុ ការចរចាលប់ទិដ្ឋាកាពីជនជាតិតួកគី ដែលធ្វើដំណើរចេញចូលអឺរ៉ុប និងការចរចាស្តីពីគម្រោងចាត់បញ្ចូលតួកគីជាប្រទេសសមាជិកថ្មីរបស់សហភាពអឺរ៉ុបជាដើម។ យ៉ាងណាមិញ អង្គការ OTAN បានយល់ព្រមកាលពីថ្ងៃទី១១ កុម្ភៈ ថាឲ្យប្រទេសសមាជិកសហការគ្នា បញ្ជូននាវាទៅល្បាតក្នុងសមុទ្រ Egée ក្នុងដែនទឹកតួកគីនឹង ក្រិក។ ប៉ុន្តែរហូតមកដល់ពេលនេះ ផែនការនេះនៅមិនទាន់ចាប់ផ្តើមនៅឡើយទេ ដោយសារតួកគីមិនទាន់អនុញ្ញាតិ។ យើងឃើញថា រដ្ឋាភិបាលលោកអ៊ែកដូហ្កាន់ អូសជើង អូសដំណើរ ដើម្បីទាញយកប្រយោជន៍ឲ្យបានធំ។
សហភាពអឺរ៉ុបបែកបាក់គ្នា ឲ្យតួកគីស្គាល់ចំណុចខ្សោយ៖
បន្តែបើនិយាយក្នុងន័យមួយទៀត គឺវាជាកំហុសរបស់សហភាពអឺរ៉ុបខ្លួនឯងទេ ដែលបែកបាក់គ្នា រុញបន្ទុកដាក់គ្នាទៅវិញទៅមក ទុកបញ្ហាឲ្យកាន់តែធ្ងន់ធ្ងរ។ តួកគីឃើញចំណុចខ្សោយនេះហើយ ទើបបន្តបានចិត្ត វាយឫកដាក់សហភាពអឺរ៉ុប ព្រោះដឹងថាពេលនេះសហភាពអឺរ៉ុប កំពុងតែគ្មានជម្រើសផ្សេងទេ។ លោកស្រីអង់ហ្គេឡា មែគែល នៅតែម្នាក់ឯងសុទ្ធសាធ ព្រោះគ្មាននរណាយល់ព្រមទទួលសំណើរគាត់ ដែលសុំឲ្យប្រទេសទាំងអស់ព្រមទទួលកូតាជនភៀសខ្លួន។ ធម្មតាទេ តែកាលណានៅក្នុងផ្ទះយើងឈ្លោះគ្នា និយាយគ្នាមិនត្រូវ អ្នកជិតខាងគេនិយាយពេបជ្រាយយើងមិនខាន។
សហភាពអឺរ៉ុប សុំជំនួយសាមគ្គីពីកូនចៅខ្លួនឯងមិនបានផង បែរទៅសុំជំនួយពីអ្នកដទៃ។ ក្រិក ដែលជាអ្នករងគ្រោះធ្ងន់ជាងគេ ក្នុងវិបត្តិនេះ កំពុងតែដកដង្ហើមចង្រិត ជាមួយនឹងជនភៀសខ្លួន ដែលមកនៅកកកុញរាប់សែននាក់។ រដ្ឋាភិបាលក្រិកផ្ទាល់ រកតែការងារឲ្យប្រជាជនខ្លួនធ្វើមិនបានផង មានរឿងអីទៅអាចជួយទំនុកបំរុងជនភៀសខ្លួនបាន? សមាជិកសហភាពអឺរ៉ុប ដែលធ្លាប់រួបរួមគ្នាពេលសប្បាយ តែពេលមានទុក្ខម្នាក់ៗ សំងំឲ្យស្ងាត់ចឺង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ