សហរដ្ឋអាមេរិក ផ្អាកការចេញទិដ្ឋាការ ឲ្យពលរដ្ឋរុស្ស៊ីមួយរយៈពេលសិន
ស្ថានទូតអាមេរិកនៅម៉ូស្គូ បានប្រកាសរសៀលថ្ងៃទី២១ សីហាថា ការចេញទិដ្ឋាការឲ្យពលរដ្ឋ រុស្ស៊ី សម្រាប់ធ្វើដំណើរចូលសហរដ្ឋអាមេរិក នឹងត្រូវផ្អាកមួយរយៈពេលសិន ចាប់ពីថ្ងៃពុធទី២៣សីហាទៅ មកពី ការកាត់បន្ថយបុគ្គលិកការទូតអាមេរិកាំង ដោយអាជ្ញាធររុស្ស៊ី ជាចម្លើយតបនឹងទណ្ឌកម្មបន្ថែមលើរុស្ស៊ី ពីខាងក្រុងវ៉ាស៊ីនតោន។
ចុះផ្សាយនៅថ្ងៃ៖
“ដោយមកពីរដ្ឋាភិបាលរុស្ស៊ី បានកម្រិតចំនួនបុគ្គលិកការទូតអាមេរិកាំង ដែលអាចបំពេញការងារ ក្នុង ប្រទេសរុស្ស៊ី ដូច្នេះ រាល់ប្រតិបត្តិការទាក់ទងនឹង ការចេញទិដ្ឋាការមិនមែនអន្តោប្រវេសន៍ សម្រាប់ធ្វើដំណើរ ចូលសហរដ្ឋអាមេរិក នឹងត្រូវផ្អាក ចាប់ពីថ្ងៃ ២៣សីហា” នេះជាសេចក្តីជូនដំណឹងរបស់ស្ថានទូត អាមេរិកប្រចាំនៅរុស្ស៊ី។
សេចក្តីជូនដំណឹងនោះបន្ថែមថា ៖ ប្រតិបត្តិការខាងចេញទិដ្ឋាការ នឹងចាប់ផ្តើមឡើងវិញនៅថ្ងៃ ទី១កញ្ញា តែត្រូវធ្វើបាន តែនៅស្ថានទូតនៅឯម៉ូស្គូប៉ុណ្ណោះ ចំណែក ស្ថានកុងស៊ុលអាមេរិក ៣កន្លែង ពោលគឺ នៅក្រុង Saint-Petersbourg Ekaterinbourg និង ក្រុង Vladivostok នឹងផ្អាកការចេញទិដ្ឋាការនេះ រហូត ទាល់តែមានការសម្រេចណាមួយថ្មីទៀត។
តាមតួលេខក្រសួងការបរទេស អាមេរិក ក្នុងឆ្នាំ២០១៦ កន្លងទៅ ទាំងស្ថានទូតនៅម៉ូស្គូ ទាំងស្ថានកុងស៊ុល ៣ នោះ បានចេញទិដ្ឋាការ សរុបទៅ ចំនួន ១៩០.០០០ ឲ្យ ប្រជាពលរដ្ឋរុស្ស៊ី។
យោងលើក្រសូងការបរទេសអាមេរិកដដែល ប្រព័ន្ធផ្សព្វផ្សាយរុស្ស៊ី ព្រមានថា ស្របនឹងសណ្តាប់ធ្នាប់ថ្មី ដើម្បី ទទួលទិដ្ឋាការអាមេរិក ពលរដ្ឋរុស្ស៊ី ត្រូវរង់ចាំរហូតដល់ ៣ ខែ មិនមែនត្រឹមកន្លះខែ ដូចមុនទៀតឡើយ។
ថ្លែងក្នុងសន្និសីទសារពត៏មាន នៅក្រុងម៉ូស្គូ រួមជាមួយ សមភាគីអេហ្ស៊ីប លោកប្រមុខការទូត រុស្ស៊ី ស៊ែរហ្គៃ ឡាវ្រ៉ូវ បានបរិហារ ការផ្អាកឈប់ចេញទិដ្ឋាការនោះ ថាជា”ការប៉ុនប៉ងមួយលើកថ្មី ពន្យុះ អ្នកស្រុករុស្ស៊ី ឲ្យក្តៅក្រហាយនឹងអាជ្ញាធររុស្ស៊ី។ ប៉ុន្តែគាត់ចង្អុលឲ្យឃើញថា ម៉ូស្គូមិនចាត់វិធានការបែបនេះ ទល់ នឹងប្រជាពលរដ្ឋអាមេរិកាំងឡើយ ទាំងគូសបញ្ជាក់ថា ប្រសិនបើនរណាមួយ សង្ឃឹមថា រុស្ស៊ី នឹងធ្វើ ត្រាប់តាមឧទាហរណ៍ដ៏អាក្រក់នេះ ហើយ ក៏ផ្អាកការចេញទិដ្ឋាការឲ្យពលរដ្ឋអាមេរិកដែរ គឺមុខជា ភ័ន ច្រឡំហើយ។
លោកឡាវ្រ៉ូវ សង្កត់ធ្ងន់ថា “ម៉ូស្គូស្គាល់ច្បាស់ណាស់ ក្រយៅពួកដែលខំបង្កឲ្យអ្នកស្រុករុស្ស៊ីទោមនស្ស នឹងថ្នាក់ដឹកនាំប្រទេសខ្លួន ព្រោះពួកនោះសង្ឃឹមថា វាអាចវិវឌ្ឍដល់របស់ដែលហៅថា បដិវត្តន៍ពណ៏ ដូចនៅអ៊ុយក្រែន”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ