លោកស្រីមែគែលចង់បណ្តេញជនភៀសខ្លួនណា ដែលត្រូវតុលាការអាល្លឺម៉ង់ផ្តន្ទាទោស
លោកស្រី អង់ហ្គេឡា មែគែល ប្រមុខរដ្ឋាភិបាលអាល្លឺម៉ង់ បានប្រកាសនៅថ្ងៃសោរ៍ទី ៩មករាថា រដ្ឋាភិបាលលោកស្រីនឹងស្នើរឲ្យមានការបណ្តេញជនភៀសខ្លួន ដែលកំពុងសុំសិទ្ធិរឺក៏បានទទួលសិទ្ធជ្រកកោននៅអាល្លឺម៉ង់ បើសិនជាជននោះត្រូវបានតុលាការអាល្លឺម៉ង់ ផ្តន្ទាទោសជាស្ថាពរ។ ការប្រកាសដូចនេះ គឺបានធ្វើឡើងបន្ទាប់ពីផ្ទុះករណីបំពារបំពាន និងរំលោភផ្លូវភេទទៅលើស្រ្តីអាល្លឺម៉ង់ ជាងមួយរយករណី នៅយប់ថ្ងៃបុណ្យឆ្លងឆ្នាំសកល នៅទីក្រុងកូឡូញ។ ជនដៃដល់ត្រូវបានសាក្សីជាច្រើននាក់អះអាងថា ជាក្រុមមនុស្សប្រុសជនជាតិអារ៉ាប់ ហើយអាចជាជនភៀសខ្លួន ដែលទើបមកដល់អាល្លឺម៉ង់ថ្មីៗនេះ។
ចុះផ្សាយនៅថ្ងៃ៖
ស្តាប់ - ០១:៥៤
លោកស្រីអង់ហ្គេឡា មែគែល បានប្រកាសថា ជនភៀសខ្លូនម្នាក់ដែលបានប្រព្រឹត្តិបទល្មើសមជ្ឈឹម គឺត្រូវតែទទួលផលវិបាក។ មានន័យថា សិទ្ធិស្នាក់នៅក្នុងទឹកដីអាល្លឺម៉ង់របស់ជនភៀសខ្លួននោះ នឹងត្រូវតែដកចោល ជាស្វ័យប្រវត្តប្រសិនបើជននោះត្រូវបានតុលាការផ្តន្ទាទោសឲ្យជាប់គុក រឺមួយក្នុងករណីទោសព្យួរក៏ដោយ។ នេះគឺជាប្រសាសន៍របស់លោកស្រីអធិកាបតីអាល្ហឺម៉ង់ ដែលបានថ្លែងក្នុងអង្គប្រជុំសមាជិគណបក្សលោកស្រី ដើម្បីចាត់វិធានការឆ្លើយតបនឹងព្រឹត្តិការណ៍ ដែលបានកើតឡើងនៅយប់ថ្ងៃឆ្លងឆ្នាំសកល។
យប់ថ្ងៃឆ្លងឆ្នាំ នៅទីក្រុងកូឡូញ ភាគខាងលិចអាល្លឺម៉ង់ មានករណីមនុស្សស្រីជាច្រើននាក់ បានដាក់ពាក្យបណ្តឹងថាមានក្រុមមនុស្សប្រុសនាំគ្នាបំពារបំពាន នឹងឈានទៅដល់ការរំលោភសេពសន្ទវៈទៀតផង។ បណ្តឹងប្រមាណជា ១៧០ ហើយក្នុងនោះគឺ៣ភាគ៤ សុទ្ធតែជាករណីបំពារបំពានផ្លូវភេទ ហើយមានករណីរំលោភ២ករណី។ នេះជាលើកទីមួយសម្រាប់ប្រទេសអាល្លឺម៉ង់ ដែលមានករណីបំពារបំពានទៅលើស្រ្តី ក្នុងចំនួនច្រើន កើតឡើងក្នុងពេលតែមួយបែបនេះ។
តាមការស៊ើបអង្កេត និងយោងតាមសាក្សី ព្រមទាំងការអះអាងរបស់ជនរងគ្រោះ ជនដៃដល់គឺភាគច្រើនជាក្រុមមនុស្សប្រុសអារ៉ាប់ ពោលជាក្រុមជនភៀសខ្លួន។ បញ្ហានេះ បានធ្វើឲ្យគេសម្លឹងទៅដល់គោលនយោបាយរបស់រដ្ឋាភិបាលអាល្លឺម៉ង់ថ្មីៗនេះ ដែលបានបើកទ្វារចំហរទទួលជនភៀសខ្លួនជាងមួយលាននាក់។ ក្រុមគណបក្សស្តាំនិយមជ្រុល បានឆ្លៀតឱកាសនេះ វាយប្រហាររដ្ឋាភិបាលលោកស្រីមែគែល ថាបានបណ្តោយឲ្យពួកជនភៀសខ្លួន ទាំងនោះចូលមកចាប់រំលោភស្រ្តីអាល្លឺម៉ង់ដល់ផ្ទះ។
គួរបញ្ជាក់ដែរថា ច្បាប់អាល្លឺម៉ង់បច្ចុប្បន្ននេះ អាចអនុញ្ញាតិឲ្យដកសិទ្ធិស្នាក់នៅចេញពីជនភៀសខ្លួនម្នាក់ ក្នុងករណីដែលជននោះត្រូវបាន តុលាការផ្តន្ទាទោសឲ្យជាប់គុក ចាប់ពី៣ឆ្នាំទៅ ហើយក្នុងករណីដែលជននោះអាចត្រឡប់ទៅប្រទេសដើមវិញ ដោយមិនខ្លាចប្រឈមមុខនឹងគ្រោះថ្នាក់ដល់ជិវិត។ បំណង ចង់រិតបន្តិងច្បាប់ដើម្បីអាចដកសិទ្ធិជ្រកកោនចេញពីជនភៀសខ្លួន ដែលលោកស្រីមែគែល ចង់ស្នើនៅពេលនេះ នឹងត្រូវយកទៅពិភាក្សា ជាមួយបណ្តាគណបក្សផ្សេងទៀត។ យ៉ាងណាក៏ដោយមតិមួយចំនួន បានអំពាវនាវកុំឲ្យមានការយល់ច្រឡំ ទម្លាក់កំហុសទៅលើជនភៀសខ្លួនទាំងអស់ ថាពួកគេសុទ្ធតែជាជនល្មើស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ