វិបត្តិអន្តោប្រវេសន៍ធ្វើឲ្យអឺរ៉ុបសុខចិត្តត្រលប់ទៅចរចាយកតួកគីចូលជាសមាជិក
សហភាពអឺរ៉ុប កាលពីយប់ថ្ងៃចន្ទ ទី ១៤ធ្នូ បានបើកការចរចាជាថ្មី ដើម្បីអនុញ្ញាតឲ្យតួកគីអាចក្លាយជាសមាជិកមួយទៀតរបស់សហភាពអឺរ៉ុប។ តួកគីបានដាក់បេក្ខភាព ចង់សុំចូលជាសមាជិកអឺរ៉ុប តាំងពីឆ្នាំ ១៩៩៩។ ប៉ុន្តែ ការចរចា តាំងពីឆ្នាំ ២០០៥ បានជាប់គាំង ដោយសារមានការប្រឆាំងពីអាល្លឺម៉ង់ និងបារាំង ដែលមិនឲ្យចង់ឲ្យតួកគីចូលក្នុងរង្វង់សហភាពអឺរ៉ុប។ ៨ឆ្នាំក្រោយ វិបត្តិជនអន្តោប្រវេសន៍ និងការគំរាមកំហែងរបស់ក្រុមជីហាតអង្គការរដ្ឋអ៊ីស្លាម (ដែលនៅត្រើយម្ខាងទឹកដីអឺរ៉ុប បាំងដោយតួកគី) បានជំរុញ ឲ្យសហភាពអឺរ៉ុបត្រូវបង្ខំចិត្តមកត្រលប់ចរចាទទួលយកតួកគី ជាសមាជិករបស់ខ្លួន។
ចុះផ្សាយនៅថ្ងៃ៖
ស្តាប់ - ០២:១០
នៅមុនកិច្ចចរចាសុំចូលជាសមាជិកសហភាពអឺរ៉ុប ជាមួយភាគីតួកគី រដ្ឋមន្រ្តីការបរទេសអូទ្រីសបាននិយាយដោយស្មោះត្រង់ថា ការណ៍ដែលសមាជិកអឺរ៉ុបទាំង២៨ប្រទេសយល់ព្រមត្រលប់មកបន្ត ជាមួយតួកគីលើកនេះ ក៏ព្រោះតែសហភាពអឺរ៉ុបចង់ឲ្យតួកគីជួយអន្តរាគមន៍ ដើម្បីកុំឲ្យក្រុមជនអន្តោប្រវេសន៍ធ្វើដំណើរមកទឹកដីអឺរ៉ុប។ សព្វថ្ងៃនេះ ប្រទេសនៅអឺរ៉ុបកំពុងជួបវិបត្តិជនភៀសខ្លួន ដែលបានរត់គេចចេញពីសង្រ្គាមនៅប្រទេសស៊ីរី និងអ៊ីរ៉ាក់ និងបានប្រើប្រាស់ទឹកដីតួកគី ដើម្បីឆ្លងចូលក្នុងទឹកដីអឺរ៉ុប។
វិបត្តិជនភៀសខ្លួន បានជំរុញឲ្យសហភាពអឺរ៉ុបបើកជំនួបកំពូលជាមួយ តួកគី ដែលនៅក្នុងនោះ សហភាពអឺរ៉ុបបានសន្យាផ្តល់ជំនួយ ៣ពាន់លានអឺរ៉ូ ដល់តួកគី ដើម្បីឲ្យរដ្ឋាភិបាលតួកគីអាចប្រើដើម្បីធ្វើឲ្យប្រសើរឡើង ការទទួលជនភៀសខ្លួន ស៊ីរី និងអ៊ីរ៉ាក់ ក្នុងទឹកដីតួកគី។ ជាមួយទឹកប្រាក់ជំនួយ ៣ពាន់លានអឺរ៉ូ សហភាពអឺរ៉ុបចង់បានផងដែរឲ្យតួកគីបង្កើនការល្បាត ទៅលើទូកដឹកជនអន្តោប្រវេសន៍ ក្នុងសមុទ្រEgée ក្នុងតំបន់មេឌីទែរ៉ាណេ និងចុងក្រោយ គឺចង់ឲ្យតួកគីយល់ព្រមទទួលវិញ ជនអន្តោប្រវេសន៍សេដ្ឋកិច្ច តួកគី ដែលអឺរ៉ុបបញ្ជូនចេញពីទឹកដីអឺរ៉ុប។
ការហូរចូលជនភៀសខ្លួន ដូចទឹកបាក់ទំនប់ក៏ជាហេតុផលមួយដែរដែលធ្វើឲ្យលោកស្រីនាយករដ្ឋមន្រ្តីអាល្លឺម៉ង់ផ្លាស់ប្តូរជំហរ ១៨០ដឺក្រជាមួយតួកគី។ កាលពីឆ្នាំ ២០០៧ ការចរចាស្តីពីការសុំចូលរបស់តួកគី ជាសមាជិកអឺរ៉ុបត្រូវជាប់គាំង ក៏ដោយសារជំហរប្រឆាំងដាច់ខាតរបស់បារាំង និងអាល្លឺម៉ង់របស់់លោកស្រីអង់ហ្គែឡា ម៉ែរគែល។ នៅក្នុងការបកស្រាយផ្លូវការរបស់បារាំង និងអាល្លឺម៉ង់ គេមិនអាចចរចា ទទួលយកតួកគីឲ្យធ្វើជាសមាជិកអឺរ៉ុបបាន ដោយសារហេតុផលបញ្ហារសិទ្ធិមនុស្ស និងសង្រ្គាមប្រល័យពូជសាសន៍ទៅលើជនជាតិអាមេនី ដែលតួកគីនៅតែបដិសេធ មិនទទួលខុសត្រូវ។ ប៉ុន្តែ នៅខាងក្រោយវាំងននវិញ ប្រទេសអឺរ៉ុបជាច្រើនមានអរិភាព មិនចង់បានតួកគីឲ្យមកធ្វើជាមិត្តចាយប្រាក់រួមអឺរ៉ូ ព្រោះតែអឺរ៉ុបខ្លាចថា ប្រជាជនតួកគី ប្រមាណ ៧៨លាននាក់ ដែលភាគច្រើនជាអ្នកកាន់សាសនាអ៊ីស្លាម ហូរចូលក្នុងទឹកដីអឺរ៉ុប ដែលមានប្រជាជនរស់នៅ ភាគច្រើន ជាគ្រិស្តសាសនិក។
តួកគីវិញ ដែលខ្នះខ្នែងចង់ក្លាយជាសមាជិកសហភាពអឺរ៉ុប ក៏ដោយសារតែចង់បញ្ជាក់ថា ខ្លួនជាប្រទេសអ៊ីស្លាមគំរូ ដែលប្រកាន់លទ្ធិប្រជាធិបតេយ្យ និងដែលសមត្ថភាពសេដ្ឋកិច្ចគ្រប់គ្រាន់ អាចប្រកួតប្រជែងនឹងប្រទេសអឺរ៉ុបដទៃទៀត។ ការចរចា ចាប់បើកធ្វើ នៅយប់ថ្ងៃចន្ទ នឹងផ្តោតទៅជំពូកទី ១៧ (ក្នុងចំណោមជំពូកសរុប ចំនួន ៣៥) ដែលនិយាយពីនយោបាយសេដ្ឋកិច្ច និងរូបិយប័ណ្ណ។ តាមអធិការអឺរ៉ុបទទួលបន្ទុកការពង្រីកវិសាលភាពអឺរ៉ុប លោកJohann Hahn នៅឆ្នាំក្រោយ ការចរចាជាមួយតួកគីនឹងឈានទៅដល់បញ្ហានីតិរដ្ឋ ថាមពល អប់រំ និងកិច្ចការបរទេស។ តាមលោកJohann Hahn ដោយមើលទៅដំណើរចរចាវែងឆ្ងាយ តួកគីមិនអាចចូលជាសមាជិកអឺរ៉ុប បាននៅមុនឆ្នាំ ២០២០នោះទេ។
មួយវិញទៀត នៅក្នុងជំនួបជាមួយរដ្ឋមន្រ្តីការបរទេសតួកគី សមភាគីអឺរ៉ុបចង់សុំផងដែរឲ្យតួកគី រឹតបន្តឹង តាមព្រំដែនតួកគី ស៊ីរី ដើម្បីទប់ស្កាត់កុំឲ្យទាហានបរទេសចូលទៅប្រយុទ្ធក្នុងក្រុមជីហាតអង្គការរដ្ឋអ៊ីស្លាម។ លើសពីនោះ តួកគីត្រូវចូលរួមទប់ស្កាត់ កុំឲ្យមានជំនួញ រត់ពន្ធប្រេង ដែលជាប្រភពផ្តល់លុយដ៏សំខាន់របស់ក្រុមជីហាតនៅស៊ីរី។ នៅក្រោយតួកគីបាញ់ទម្លាក់យន្តហោះចម្បាំងរុស្ស៊ី ប្រធានាធិបតីរុស្ស៊ី លោកពូទីនបានចោទចំៗថា ក្រុមគ្រួសារ កូនប្រុសរបស់លោកប្រធានាធិបតីតួកគី ជាអ្នកធ្វើជំនួញ ទិញប្រេងពីក្រុមជីហាតអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ