ហេតុអ្វីបានជាតម្លៃស្រូវសាលីឡើងថ្លៃ ?
កាលពីថ្ងៃសុក្រ ទី៦ សីហា ប្រទេសរុស្ស៊ី ក្នុងនាមជាអ្នកនំាចេញស្រូវសាលីចំណាត់ថ្នាក់ទី៣ក្នុងលោក បានសម្រេចបិទការនំាចេញស្រូវសាលីរបស់ខ្លួនមួយរយៈ។ ការសម្រេចចិត្តនេះបានធ្វើឡើង ចំពេលដែលតម្លៃស្រូវសាលីនៅលើទីផ្សារអាមេរិកំាង និងអឺរ៉ុបបាននិងកំពុងបន្តឡើងថ្លៃមិនឈប់ឈរ។ បច្ចុប្បន្ននេះ ស្រូវសាលីមួយតោនមានតម្លៃជិត ២០០អឺរ៉ូ។ គឺជាតម្លៃមួយយ៉ាងខ្ពស់គិតចាប់តំាងពីឆ្នំា ២០០៨មក។
ចុះផ្សាយនៅថ្ងៃ៖
បទអន្តរាគមន៍របស់ គួច គន្ធារ៉ា
តម្លៃជិត ២០០អឺរ៉ូក្នុងមួយតោននាពេលនេះ គឺនៅទាបណាស់បើប្រៀបនឹងតម្លៃក្នុងចន្លោះឆ្នំា ២០០៧ ២០០៨ ដែលមានតម្លៃរហូតដល់ទៅជិត ៣០០ អឺរ៉ូ។ ឆ្នំា ២០០៨ ដែលបានបង្កឲ្យមានវិបត្តិស្បៀងអាហារ និងកុបកម្មប្រឆំាងនឹងភាពអត់ឃ្លាននៅក្នុងបណ្តាប្រទេសកំពុងអភិវឌ្ឍន៍មួយចំនួន។ ឥឡូវនេះ តម្លៃស្រូវសាលីបាននិងកំពុងបន្តងើបឡើងជាថ្មីនារយៈពេលប៉ុន្មានថ្ងៃចុងក្រោយ ពិសេសតំាងពីជាងមួយខែកន្លងទៅនេះ។ បើគេគិតចាប់តំាងពីដំណាច់ខែមិថុនាមក តម្លៃស្រូវសាលីបានឡើងជាង ៥០%។
មូលហេតុនំាឲ្យតម្លៃស្រូវសាលីឡើងថ្លៃ
អាចមានមូលហេតុសំខាន់បី ទីមួយ គឺការក្រឡុកហាងឆេងតម្លៃស្រូវសាលីនៅលើទីផ្សារអន្តរជាតិពីសំណាក់ឈ្មួញ។ ទីពីរ គឺតម្រូវការនៅក្នុងពិភពលោកមានការកើនឡើង។ ត្រង់ចំណុចនេះ គេចង់និយាយផ្តោតលើប្រទេសថ្មីមួយចំនួនទៀតដែលបានផ្តើមយកស្រូវសាលីធ្វើជាអាហារមូលដ្ឋានរបស់ខ្លួន ដូចយ៉ាងប្រទេសកូរ៉េខាងត្បូងជាឧទាហរណ៍ជាក់ស្តែង។ អស់ជាច្រើនសតវត្សមកហើយដែលពលរដ្ឋកូរ៉េខាងត្បូង ក៏ដូចជាប្រជាជនអាស៊ីភាគច្រើន បានយកអង្ករធ្វើជាអាហារមូលដ្ឋានរបស់ខ្លួន។ តែសព្វថ្ងៃនេះ ជាមួយនឹងការអភិវឌ្ឍន៍សេដ្ឋកិច្ចដ៏លឿនទៅមុខតំាងពីទសវត្សឆ្នំា ៧៣ និងការហូរចូលទំនៀមទំលាប់របស់ប្រទេសលោកខាងលិចមក បានធ្វើឲ្យពលរដ្ឋកូរ៉េខាងត្បូងភាគច្រើនផ្តើមផ្លាស់ប្តូររបៀបរស់នៅរបស់ខ្លួន ដោយចូលចិត្តបរិភោគអាហារដែលធ្វើចេញពីស្រូវសាលី។ គ្រាន់តែក្នុងរយៈពេល ៣០ឆ្នំាចុងក្រោយនេះ តម្រូវការបរិមាណអង្កររបស់ពលរដ្ឋកូរ៉េខាងត្បូងបានថយចុះចំនួនពាក់កណ្តាល។ ចំណែកឯតម្រូវការស្រូវសាលីវិញ ពលរដ្ឋកូរ៉េខាងត្បូងម្នាក់ៗត្រូវការរហូតដល់ទៅ ៣៥គីឡូក្រាមក្នុងមួយឆ្នំា។ កាលពី ៦០ឆ្នំាមុន គ្មានពលរដ្ឋកូរ៉េខាងត្បូងណាម្នាក់ចាប់អារម្មណ៍លើស្រូវសាលីឡើយ។ បច្ចុប្បន្ននេះ ប្រទេសកូរ៉េខាងត្បូងបានក្លាយជាអ្នកនំាចូលស្រូវសាលីចំណាត់ថ្នាក់ទីបួនក្នុងលោក ជាមួយនឹងបរិមាណជិត ២តោនក្នុងមួយឆ្នំា។ ចំណែកមូលហេតុទីបីដែលនំាឲ្យតម្លៃស្រូវសាលីឡើងថ្លៃ គឺបណ្តាលមកពីមានភាពរំាងស្ងួត ក្តៅហួតហែងនៅក្នុងបណ្តាប្រទេសអ្នកដំាស្រូវសាលី។ ភាពរំាងស្ងួត ក្តៅហួតហែងដែលនំាឲ្យការប្រមូលផលមានការថយចុះ ដូចយ៉ាងនៅប្រទេសរុស្ស៊ី ក្នុងនាមជាប្រទេសអ្នកនំាចេញស្រូវសាលីចំណាត់ថ្នាក់ទី ៣ ក្នុងលោក បន្ទាប់ពីសហរដ្ឋអាមេរិក និងប្រទេសកាណាដា។
ភាពរំាងស្ងួត ក្តៅហួតហែងដែលប្រទេសរុស្ស៊ីមិនធ្លាប់ប្រទះក្នុងឆ្នំានេះ បានបំផ្លាញដំណំាស្រូវសាលីជិត ១០លានហិកតារ ពោលគឺស្មើនឹង ២០ % នៃផ្ទៃដីដំាដុះស្រូវសាលីសរុប។ បើយោងតាមអនុរដ្ឋមន្រ្តីក្រសួងកសិកម្មរុស្ស៊ី ការប្រមូលផលស្រូវសាលីឆ្នំា ២០១០អាចមានតែពី៧០ ទៅ៧៥លានតោនប៉ុណ្ណោះ គឺមិនមែន ៩៣លានតោនដូចការទស្សន៍ទាយនោះទេ។ គឺដោយហេតុផលនេះឯង ដែលបានជម្រុញឲ្យរុស្ស៊ីប្រកាសផ្អាកការនំាចេញស្រូវសាលីមួយរយៈ។
តើពិភពលោកអាចនឹងជួបប្រទះវិបត្តិខ្វះស្បៀងអាហារដូចចន្លោះឆ្នំា ២០០៧-២០០៨ ដែរឬទេ ?
ជាមួយនឹងវិធានការផ្អាកនំាចេញស្រូវសាលីរបស់ប្រទេសរុស្ស៊ីនាពេលនេះ នឹងនំាឲ្យមានការខ្វះស្រូវសាលីរុស្ស៊ីនៅលើទីផ្សារអន្តរជាតិចំនួនពី ១២ ទៅ ១៣លានតោនក្នុងឆ្នំា ២០១០នេះ។ អ្នកឯកទេសម្នាក់នៃទីភ្នាក់ងារអង្គការសហប្រជាជាតិទទួលបន្ទុកផ្នែកកសិកម្ម និងស្បៀងអាហារ មិនទាន់ហ៊ាននិយាយពីវិបត្តិខ្វះស្បៀងអាហារទេ តែបានសំដែងក្តីព្រួយបារម្ភអំពីការវឹកវរនៃតម្លៃស្រូវសាលីនៅលើទីផ្សារ។ យោងតាមអ្នកឯកទេសរូបនោះដដែល ប្រសិនបើតម្លៃស្រូវសាលីផ្តើមឡើងថ្លៃនៅក្នុងប្រទេសក្រីក្រនោះ នឹងនំាឲ្យមានការបះបោរប្រឆំាងដោយចៀសមិនរួច។
បើយោងតាមក្រុមអ្នកវិភាគវិញ កង្វះស្រូវសាលីរុស្ស៊ីចំនួន ១២ ឬ១៣តោននៅលើទីផ្សារអន្តរជាតិក្នុងឆ្នំា ២០១០នេះ មិនមានអ្វីគួរឲ្យព្រួយបារម្ភទេ និងមិនអាចបង្កឲ្យផ្ទុះចេញនូវស្ថានការណ៍ដូចវិបត្តិខ្វះស្បៀងអាហារក្នុងឆ្នំា ២០០៨ ឡើយ។ ការអះអាងរបៀបនេះ ដោយគេផ្អែកលើបរិមាណស្តុកស្រូវសាលីមានដល់ទៅ ១៧០លានតោន ដែលអាចបំពេញតម្រូវការរហូតដល់ខែមិថុនា ឆ្នំា ២០១១។ ជាបរិមាណស្តុកដ៏ច្រើនបើប្រៀបនឹងវិបត្តិឆ្នំា ២០០៨ ដែលបរិមាណស្តុកមានប្រមាណតែ ១២០លានតោន។
មួយវិញទៀត ខណៈពេលដែលការប្រមូលផលស្រូវសាលីមានការចុះថយនៅក្នុងប្រទេសមួយចំនួន ដូចជារុស្ស៊ី ឬកាណាដានោះ សហរដ្ឋអាមេរិកដែលជាអ្នកនំាចេញស្រូវសាលីចំណាត់ថ្នាក់ទីមួយក្នុងលោក បែរជាទទួលបានផលយ៉ាងល្អប្រសើរទៅវិញ។ ជាមួយគ្នានេះ ប្រទេសអាហ្សង់ទីនបានប្រកាសបង្កើនផ្ទៃដីដំាដុះស្រូវសាលីរបស់ខ្លួនចំនួន ២០%។ ម្យ៉ាងទៀត ជួនចំពេលដែលតម្លៃស្រូវសាលីកំពុងបន្តឡើងនោះ តម្លៃអង្ករបែរជាកំពុងបន្តចុះថ្លៃទៅវិញ។ ចុះថ្លៃក៏ដោយសារការប្រមូលផលស្រូវនៅក្នុងប្រទេសឥណ្ឌា ទទួលបានលទ្ធផលល្អណាស់។ ដូច្នេះឃើញថា គេមិនបារម្ភពីវិបត្តិខ្វះស្បៀងអាហារទេ តែបារម្ភពីការក្រឡុកហាងឆេង កេងចំណេញរបស់ពួកឈ្មួញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ