ភាពយន្តនយោបាយ និងហិង្សាចូលរួមក្នុងមហោស្រពភាពយន្តអន្តរជាតិលើកទី៦៤
មហោស្រពភាពយន្តអន្តរជាតិ លើកទី៦៤ នៅទីក្រុងកាន ប្រទេសបារាំង នឹងចាប់ផ្តើមសម្ពោធជាផ្លូវការ នៅល្ងាចនេះ ទី ១១ ឧសភានេះ សម្រាប់រយៈពេល ១១ថ្ងៃ។ ភាពយន្ត៤៩ ប្រភេទកុនហិង្សា កាប់ចាក់ នយោបាយ និងបច្ចុប្បន្នភាពក្តៅគគុកទាក់ទងនឹងពិភពអារ៉ាប់ នឹងចាក់បញ្ចាំងមួយម្តងៗ ក្នុងអំឡុងពេល១១ថ្ងៃ។ ស្នាដៃរបស់សមិទ្ធិករ Woody Allen រឿង “អធ្រាត្រនៅទីក្រុងប៉ារីស” (Minuit à Paris) ដែលមានភរិយាប្រធានាធិបតីបារាំងដើរតួសម្តែងនឹងត្រូវបញ្ចាំងបើកឆាកនៅល្ងាចនេះ។
ចុះផ្សាយនៅថ្ងៃ៖
ស្តាប់ - ០១:៤៦
ជាថ្មីម្តងទៀត នេះជាឱកាសមួយដែលមិនរំលងបានសម្រាប់អ្នកសេ្នហាខ្សែភាពយន្ត។ មានអ្នកកាសែត ៤៥១២នាក់ អ្នកថតរូប ៣១១នាក់ មកតាមដានព្រឹត្តិការណ៍វប្បធម៌នេះ។
នៅឆ្នាំនេះ មានខ្សែភាពយន្តចំនួន ២០ ដែលត្រូវបានជ្រើសរើសឲ្យចូលប្រកួតដណ្តើមយកពានរង្វាន់តាលប័ត្រមាស ដ៏ល្បីល្បាញ។ ក្នុងចំណោមខ្សែភាពយន្តចំនួន៤៩ គេក៏សង្កេតឃើញមានភាពយន្តអាស៊ី ចិន កូរ៉េ ឥណ្ឌា អៀរ៉ង់ ទុយនីស៊ី អេហ្ស៊ីប និងខ្មែរមួយរឿងរបស់លោក ឬទ្ធី ប៉ាន់ ចាក់បញ្ចាំងលើផ្ទាំងសំពត់ស នាទីក្រុងកាននេះដែរ។ កុនខ្លះមានលក្ខណៈនយោបាយ ខ្លះជាកុនហិង្សាកាប់ចាក់ និងខ្លះទៀតជាភាពយន្តដែលឆ្លើយតបទាំងស្រុងទៅនឹងបច្ចុប្បន្នភាពបដិវត្តន៍ក្នុងពិភពអារ៉ាប់។ នេះហើយជាភាពសម្បូរបែប នៃមហោស្រពកានដ៏ធំបំផុតលើលោក។
សូមបញ្ជាក់ថា ក្នុងមួយឆ្នាំៗមានភាពយន្តរាប់រយ ឬរាប់ពាន់ផងក៏មាន ដែលដាក់ពាក្យសុំចូលប្រកួត តែពេលខ្លះមានកុនមិនដល់២០ត្រូវបានជ្រើសរើសយកមកប្រកួត។ ក្រៅពីការប្រកួតប្រជែងយកពានរង្វាន់ មហោស្រពកាននេះ ក៏ជាឱកាសមួយតាំងបង្ហាញកុនថ្មីៗ ដើម្បីរកអ្នកទិញ ឬអ្នកចែកចាយបញ្ចាំងតាមរោង។
លោកស្រី មេឡានី ឡូរ៉ង់ Mélanie Laurent សិល្បការិនីភាពយន្ត និងជាតារាចម្រៀងបារាំង ជាម្ចាស់ផ្ទះអ្នកបើកកម្មវិធីមហោស្រព។ ជាមួយ តារាភាពយន្តអាមេរិកដ៏ល្បី លោក រ៉ូប៊ែរ ដឺ នីរ៉ូ ដែលជាប្រធានគណៈមេប្រយោគ មហោស្រពឆ្នាំនេះសន្យាថាមានលក្ខណៈអ៊ឹកអធឹកជាងពេលណាៗទាំងអស់។
« Minuit à Paris » អធ្រាត្រនៅក្រុងប៉ារីស របស់ Woody Allen នឹងត្រូវចាក់បញ្ចាំង ក្នុងឱកាសបើកកម្មវិធី។ ប៉ុន្តែលោកស្រីជំទាវទីមួយបារាំង ការឡា ប្រ៊ុយនី សាកូស៊ី ភរិយាលោកប្រធានាធិបតីបារាំង ដែលបានដើរតួសម្តែងក្នុងភាពយន្តនេះនឹងមិនអញ្ជើញមកចូលរួមក្នុងកម្មវិធីទទួលតារាលើកម្រាលព្រំក្រហម La Montée des Marches នៅយប់នេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ