កុនអាស៊ី៥ចូលប្រកួតនៅមហោស្រពភាពយន្តអន្តរជាតិ២០១០
នៅថ្ងៃនេះ មហោស្រពភាពយន្តអន្តរជាតិឆ្នាំ២០១០ នឹងចាប់បើកសម្ពោធ នៅទីក្រុងកាន (Cannes) ប៉ែកខាងត្បូងប្រទេសបារាំង។ មហោស្រពនេះ គឺជាមហោស្រពភាពយន្តដ៏ល្បីល្បាញបំផុត។ នៅឆ្នាំនេះ កុនមកពីអាស៊ី ចំនួន ៥ ត្រូវបានគេជ្រើសរើសយកមកប្រកួតប្រជែង។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ សេង ឌីណា ពីទីក្រុងកាន
មហោស្រពភាពយន្តអន្តរជាតិ ដែលគេស្គាល់ជាទូទៅថាជា “មហោស្រពកាន" បានចាប់កំណើតឡើងតាំងពីឆ្នាំ១៩៤៦ម៉្លេះ នៅពេល ដែលសង្រ្គាមលោកលើកទី១ ទើបនឹងបញ្ចប់។ ឆ្នាំ២០១០នេះ គឺជាមហោស្រពលើកទី៦៣។ មហោស្រពភាពយន្តនេះ មានចំណុចសំខាន់ ២៖
ទី១ គឺផ្សារភាពយន្ត ដែលជាកន្លែង សម្រាប់តាំងបង្ហាញនូវកុនថ្មីៗ ដើម្បីរកអ្នកទិញ ឬអ្នកចែកចាយទៅតាមរោងកុន។
ទី២ គឺការប្រកួតប្រជែងដណ្តើមពានរង្វាន់។ ក្នុងមួយឆ្នាំៗ មានកុនជាច្រើនរឿង ដែលគេជ្រើសរើសយកមកប្រកួតប្រជែង។
កុនដែលគេយកមកប្រកួតប្រជែងក្នុងមហោស្រពភាពយន្តនៅកាននេះ ដំបូង គឺអ្នកផលិតកុន ដែលជាអ្នកដាក់ពាក្យសុំចូលប្រកួតប្រជែង។ បន្ទាប់មក គណៈកម្មការជ្រើសរើស គឺជាអ្នកសម្រេចថា តើត្រូវយកកុននេះមកដាក់ប្រកួតឬក៏អត់។ ជាធម្មតា ក្នុងមួយឆ្នាំៗ មានកុនរាប់រយ ឬពេលខ្លះរហូតដល់រាប់ពាន់ ដែលសុំដាក់ចូលប្រកួត។ ប៉ុន្តែ ពេលខ្លះ មានមិនដល់ ២០កុនផង ដែលគេរើសយកមកប្រកួត។
ឆ្នាំ២០១០នេះ កុនដែលគេជ្រើសរើសយកមកប្រកួតមាន ១៨ ក្នុងនោះយើងឃើញថា កុនអាស៊ីមានចំនួនច្រើនគួរសម គឺមានដល់ទៅ ៥រឿង៖ កុនកូរ៉េ ២រឿង កុនចិន ១រឿង កុនជប៉ុន ១រឿង និងកុនថៃ ១រឿង។
ពីថ្ងៃទី១២ រហូតដល់ថ្ងៃទី២៣ ឧសភា កុន ដែលគេជ្រើសរើសយកមកប្រកួត នឹងត្រូវដាក់ បញ្ចាំងម្តងមួយៗ ឲ្យគណៈមេប្រយោគមើល។ គណៈមេប្រយោគនេះ មានសមាសភាព ភាគច្រើនជាអ្នកផលិតកុន អ្នកនិពន្ធ និងតារាភាពយន្តល្បីៗ មកពីហូលីវូដ។ គណៈមេប្រយោគនេះហើយ ដែលជាអ្នកសម្រេចថា តើកុនណាត្រូវទទួលរង្វាន់លេខ១ ហើយសមិទ្ធករណា អ្នកសរសេរសេណារីយ៉ូណា និងតួកុនណា ដែលត្រូវទទួលរង្វាន់ប្រចាំឆ្នាំ។
យើងនៅរង់ចាំមើលថា តើក្នុងចំណោមកុនទាំង៥ មកពីអាស៊ី នឹងមានកុនណាមួយ ដែលអាចទទួលពានរង្វាន់ពីមហោស្រពភាពយន្តនេះដែរឬក៏យ៉ាងណា?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ