លោក Dominique Strauss-Kahn ឋិតនៅក្រៅឃុំ តែនៅតែជាប់ចោទ
តុលាការអាមេរិកបានយល់ព្រមនៅថ្ងៃព្រហស្បតិ៍ទី១៩ឧសភាម្សិលមិញឲ្យលោក Dominique Strauss-Kahn ឋិតនៅក្រៅពន្ធនាគារ។ ក៏ប៉ុន្តែបានដាក់លក្ខខណ្ឌយ៉ាងតឹងរ៉ឹង ដោយតម្រូវឲ្យលោកអតីតអគ្គនាយកFMIបង់ប្រាក់ធានា១លានដុល្លារ ហើយនិងតម្កល់ទុកសម្រាប់ធ្វើការធានា៥លានដុល្លារបន្ថែមទៀត។ ចាប់ពីពេលនេះតទៅ លោកDominique Strauss-Kahnបានត្រូវតុលាការចាត់ទុកជាជនជាប់ចោទក៍ពីបទឧក្រិដ្ឋកម្មផ្លូវភេទ។ ដូច្នេះ ការប្រយុទ្ធតទល់គ្នាតាមផ្លូវតុលាការរវាង លោក Dominique Strauss-Kahn និងស្ត្រីអ្នកដើមចោទក៍បានចាប់ផ្តើមមែនទែនហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
វគ្គទីពីរនៃការប្រយុទ្ធតទល់គ្នាតាមផ្លូវតុលាការបានចាប់ផ្តើមសម្រាប់លោកDominique Strauss-Kahn អតីតអគ្គនាយកFMIជាប់ចោទពីបទឧក្រិដ្ឋកម្មផ្លូវភេទ។ លោកDominique Strauss-Kahnបានត្រូវតុលាការអនុញ្ញាតឲ្យឋិតនៅក្រៅពន្ធនាគារ ក៏ប៉ុន្តែត្រូវឋិតនៅក្រោមលក្ខខណ្ឌយ៉ាងសែនតឹងរ៉ឹងមានដូចជា៖
ទី១-ត្រូវតម្កល់ទុកសម្រាប់ធ្វើការធានា៦លានដុល្លារ( ១លានជាសាច់ប្រាក់+៥លានដោយក្រុមហ៊ុនធានារ៉ាប់រង)។
ទី២-ត្រូវពាក់ខ្សែដៃអេឡេចត្រូនិក។
ទី៣-ឋិតនៅក្រោមការឃ្លាំយាមដោយវីដេអូ២៤ម៉ោងលើ២៤ម៉ោង ហើយនិងមានអ្នកយាមការពារប្រដាប់ដោយអាវុធនៅគេហដ្ឋានផងទៀត។
លោកDominique Strauss-Kahnនឹងត្រូវតុលាការកោះហៅសួរចម្លើយទៀតនៅថ្ងៃទី៦មិថុនាខាងមុខនេះទៀត។ នៅថ្ងៃនោះ លោកDominique Strauss-Kahnត្រូវឆ្លើយប្រាប់តុលាការថា តើលោកយល់ព្រមទទួលស្គាល់ជាពិរុទ្ធិកជនដែរឬទេ? មកទល់ពេលនេះ លោកDominique Strauss-Kahnបានបដិសេធទាំងស្រុងការចោទប្រកាន់ទៅលើរូបលោក។
បើប្រសិនជាលោកDominique Strauss-Kahnទទួលស្គាល់ថា លោកបានប្រព្រឹត្តអំពើទាំងនោះមែន នោះនឹងលែងមានការប្តឹងប្តល់អ្វីទៀតឡើយ។ ផ្ទុយទៅវិញ បើប្រសិនជាលោកDominique Strauss-Kahnប្រកែកថា ពុំបានប្រព្រឹត្តដូចការចោទប្រកាន់ទេនោះ បើគេរកទោសកំហុសឃើញ លោកDominique Strauss-Kahnអាចជាប់គុករហូតដល់ទៅ៧៤ឆ្នាំ។
សេណារីយោមួយទៀតដែលអាចជាយុទ្ធសាស្ត្ររបស់អ្នកចុងចោទក៍គឺ៖ ខិតខំធ្វើការទទួលឲ្យបាននូវ “ការព្រមព្រៀង”ពីតុលាការ ដោយយល់ព្រមទទួលស្គាល់យ៉ាងហោចណាស់នូវការចោទប្រកាន់ណាមួយក្នុងចំណោមការចោទប្រកាន់សំខាន់ៗ សម្រាប់ធ្វើជាថ្នូរប្តូរនឹងទណ្ឌកម្មកុំឲ្យធ្ងន់ធ្ងរពេក។
ដូច្នេះចាប់ពីពេលនេះតទៅ មេធាវីនៃអ្នកដើមចោទក៍និងអ្នកជាប់ចោទត្រូវខិតខំរៀបចំខ្លួនដើម្បីធ្វើការប្រយុទ្ធតទល់គ្នាតាមផ្លូវតុលាការ។ អ្នកជាប់ចោទនឹងខិតខំធ្វើការអង្កេតរបស់ខ្លួន ដោយប្រើអ្នកសង្កេតការណ៍ឯកជនឬរិះរកភស្តុតាងសម្រាប់ធ្វើការតទល់ប្រឆាំងនឹងការចោទប្រកាន់។ បន្ទាប់មកទៀតពួកគេត្រូវធ្វើការវិភាគទៅលើស្នាមADN ឈាម ទឹកមាត់ឬទឹកកាមនៅទីកន្លែងកើតហេតុ ដោយពុំភ្លេចផងដែរព័ត៌មានដែលអាចផ្តល់ឲ្យដោយកាម៉េរ៉ាឃ្លាំយាម ហើយនិងកូនសោម៉ាញេទិកនៃបន្ទប់នៅសណ្ឋាគារសូហ្វ៊ីតែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ