ប្រតិកម្មរុស្ស៊ីចំពោះវត្តមាននាវាអាមេរិកធុន Monterey ក្នុងសមយុទ្ធនៅ អ៊ុយក្រែន
ក្រោយពីនាវាចម្បាំងអាមេរិកធុន Monterey ដែលប្រដាប់ទៅដោយកាំជ្រួចមីស្ស៊ីលសម្រាប់ស្កាត់ចាប់កាំជ្រួចមីស្ស៊ីលអ្នកដទៃ ថ្ងៃ១២មិថុនាម្សិលមិញ បានបើកទៅដល់ដែនទឹកសមុទ្រខ្មៅ ដើម្បី ចូលរួមក្នុងសមយុទ្ធជាមួយអ៊ុយក្រែនទីក្រុងម៉ូស្គូ បានសំដែងនូវក្តីព្រួយបារម្ភទាំងចោទជាសំនួរមួយចំនួនតែម្តងទៅក្រុងវ៉ាស៊ីនតោន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ទីបញ្ជាការទ័ពអាមេរិក ពន្យល់ជាផ្លូវការថា ក្រុមនាវាចម្បាំងរបស់អាមេរិក ដែលមាន ភារៈ ខាងការពារបណ្តាប្រទេសអឺរ៉ុបខាងត្បូង ឲ្យផុតពីគ្រោះថ្នាក់ នៃការវាយប្រហារ ជាយថាហេតុ ពីខាងកាំជ្រួចមីស្ស៊ីល កាលណា”ស្ថានការណ៍នៅតំបន់ឡើងតានតឹងខ្លាំង“ គឺអាចចល័តចេញពី សមុទ្រ មេឌីទែរ៉ាណេ ទៅកាន់ សមុទ្រខ្មៅ។ ជាប្រតិកម្ម ក្រសួងការបរទេសរុស្ស៊ី ក្នុង សេចក្តីថ្លែងការណ៍ខ្លួន ដោយទុកមួយអន្លើសិន បញ្ហាដែលមិនទាន់ដោះស្រាយរួច ស្តីអំពី ប្រព័ន្ធខែលមីស្ស៊ីល ដែលអាមេរិកគ្រោងពង្រាយនៅទ្វីបអឺរ៉ុប ចោទជាសំនួរ ៖
“ តើអំពី ភាពឡើងតានតឹងស្អីណានៃស្ថានការណ៍ ដែលភាគីអាមេរិកចង់និយាយនោះ”? ដោយរំកិល ត្មោងនាវាខ្លួន ខាងប្រឆាំងកាំជ្រួចមីស្ស៊ីលបែបនេះ មកជិតប្រទេសរុស្ស៊ី។
ក្រសួងការបរទេសរុស្ស៊ី បន្តសេចក្តីថា ៖
- បើគ្រាន់តែ សម្រាប់ចូលរួម ក្នុងលំហាត់សឹក ខាងប្រយុទ្ធ ទល់នឹងចោរសមុទ្រសោះ ចុះហេតុដូចម្តេច បានជាអាមេរិក ដាក់នាវាជាស្នូល នៃកងនាវាខ្លួន សម្រាប់កំចាត់កាំជ្រួចមីស្ស៊ីល ឲ្យចូលរួមទៅវិញ?
- ភាគីរុស្ស៊ី តែងបានគូសបញ្ជាក់ទៅហើយថា ខ្លួនមិនអាចស្ថិតនៅឱបដៃ ព្រងើយកន្តើយឡើយ កាលណាមានលេចចេញមក នៅក្បែរព្រំដែនខ្លួន គឺគ្រឿងផ្សំនៃហេដ្ឋារចនាសម្ព័ន្ធយុទ្ធសាស្ត្រ របស់អាមេរិក ហើយតែងចាត់ទុក ជំហានអាមេរិកបែបនេះ ជាការគំរាមដល់ សន្តិសុខជាតិរុស្ស៊ី។
ជាការកត់សម្គាល់ នាវាចម្បាំងអាមេរិក Monterey គឺបំពាក់ទៅដោយ ប្រព័ន្ធ ប្រឆាំង កាំជ្រួច មីស្ស៊ីលធុន Idgis ដែលប្រើមីស្ស៊ីល SM-៣ ដ៏មានប្រសិទ្ធិភាព ខាង ស្កាត់ ចាប់ មីស្ស៊ីល។
ចំណែកសមយុទ្ធអ៊ុយក្រែន-អាមេរិកាំង គឺមានឈ្មោះថា “ខ្យល់រំភើយសមុទ្រ” ហៅថា “ Sea Breeze ឆ្នាំ 2011 “។ វាប្រព្រឹត្តទៅ មួយឆ្នាំម្តង តាំងពីឆ្នាំ១៩៩៧មក។ ចូលរួម ក្នុងសមយុទ្ធនេះ គឺ បណ្តាប្រទេសអូតង់ផ្ទាល់ ព្រមទាំងប្រទេសណាដែលសហការ ជាមួយបក្សសម្ព័ន្ធនេះស្របតាមកម្មវិធី “ភាពជាដៃគូ” ជាមួយអូតង់។ ឆ្នាំនេះ លំហាត់សឹក ប្រព្រឹត្តទៅ ក្រោម បាវចនាថា” ប្រឆាំងនឹងចោរសមុទ្រ “ ដោយបានចាប់ផ្តើមតាំងពីថ្ងៃ ទី៦មិថុនាមក ហើយនឹង ពន្យារទៅ ដល់ថ្ងៃ១៨មិថុនា នៅត្រង់ដែនទឹក ជិតផែសមុទ្រ Odessa របស់អ៊ុយក្រែន ដោយមានការចូលរួមនៃ ១៣ប្រទេស ក្នុងនោះ មាននាវាចម្បាំង ៣០គ្រឿង យន្តហោះ ១០គ្រឿង ទ័ពម៉ារីន ១.២០០នាក់ រថក្រោះ៩០គ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ