ទីក្រុងវ៉ាស៊ីនតោនហាមមិនឲ្យមន្ត្រីរុស្ស៊ី រហូតដល់៦០នាក់ ចូលស.រ.អា.
បម្រាមនេះ ទើបបញ្ជាក់ដោយក្រសួងការបរទេសអាមេរិក យោងទៅលើច្បាប់អាមេរិកស្តី អំពីអន្តោប្រវេសន៍។ពួកមន្ត្រីរុស្ស៊ី ដែលជាប់ក្នុងទណ្ឌកម្មអាមេរិកនោះ បណ្តាលមកពីគេពាក់ព័ន្ធនឹងមរណភាពកាលពី២ឆ្នាំមុន នៃអ្នកច្បាប់រុស្ស៊ី ឈ្មោះ Mag-nit-ski ដែលបាន ធ្វើការជាទីប្រឹក្សារបស់មូលនិធិវិនិយោគអាមេរិកាំង Hermitage Capital Management។ ទីក្រុងម៉ូស្គូ បានព្រមានទៅថា ទណ្ឌកម្មនេះ នឹងជះចំហាយអាក្រក់ មកលើទំនាក់ទំនងដែលទើបតែចាប់ផ្តើមវិវឌ្ឍល្អឡើងវិញ សម័យលោកប្រធានាធិបតីObama។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ជាបឋម គួររំលឹកថា អ្នកច្បាប់ជាតិរុស្ស៊ីឈ្មោះ Serguei Magnitski ក្នុងឋានៈជាទីប្រឹក្សា របស់ មូលនិធិវិនិយោគអាមេរិកាំង Hermitage Capital Management បានត្រូវអាជ្ញាធររុស្ស៊ី ឃាត់ខ្លួនក្នុងឆ្នាំ២០០៨ ចំពោះការជួយឲ្យមូលនិធិនេះ គេចពន្ធក្នុងទឹកប្រាក់ ២១៣លានរូប្ល ឫស្មើនឹង ជាង៧លានដុល្លារអាមេរិក។ លុះថ្ងៃ១៧វិច្ឆិកាឆ្នាំ២០០៩ ដោយមកពីពួកមន្ត្រីគុក ពុំព្រមអើពើ នឹងពាក្យត្អូញត្អែរចំពោះអាការៈសុខភាពគាត់យ៉ាប់យ៉ឺនមែនទែន គាត់ក៏បានដាច់ ខ្យល់ស្លាប់ទៅ ក្នុងវ័យជាបុរសនៅពេញកម្លាំងនៅឡើយ អាយុទើប៣៧ឆ្នាំ។
តាមការបកស្រាយនៃភាគីអាមេរិកាំង មានមន្ត្រីមួយចំនួននៅរុស្ស៊ី ដែលប្រាថ្នាឲ្យ អ្នកច្បាប់នោះ ក្ស័យជីវិតទៅ សម្រាប់ជាផលប្រយោជន៍របស់ពួកគេផ្ទាល់។
កាសែតក្រុងម៉ូស្គូ Kommersant លេខថ្ងៃពុធនេះ ដោយយោងទៅលើកាសែតអាមេរិកាំង The Washington Post សរសេរថា ក្នុងចំណោម៦០នាក់នោះ មានពួកមន្ត្រីក្រសូងសន្តិសុខ ក្រសួងមហាផ្ទៃ ពួកឆ្មាំគុក និងពេទ្យគុក បណ្តារដ្ឋអាជ្ញា ពួកមន្ត្រីសវនករ និងអធិការ។
ស្របនឹងទណ្ឌកម្មអាមេរិក ពួកមន្ត្រីរុស្ស៊ីទាំងនោះ ត្រូវហាមមិន ឲ្យធ្វើដំណើរចូលស.រ.អា. ឡើយ។ បើគេមានលុយឫទ្រព្យសម្បត្តិ ស្ថិតនៅលើដែនដី អាមេរិក គឺនឹងត្រូវផ្អាប់ទុកតែម្តង។
ក្រសួងការបរទេសរុស្ស៊ី ធ្លាប់បានព្រមានទៅហើយថា ទណ្ឌកម្មបែបនេះ គឺវាមិនស៊ីគ្នាឡើយ នឹងសហប្រតិបត្តិការក្នុងកម្រិតបច្ចុប្បន្ន រវាងរុស្ស៊ី និងអាមេរិក។ ទណ្ឌកម្មនេះ ញ៉ាំងឲ្យភាគីរុស្ស៊ី នឹកឃើញពីយុគសម័យ ដែលហៅថា “សង្គ្រាមត្រជាក់”។
តាមការវិភាគនៃពួកនយោបាយវិទូ ទីក្រុងម៉ូស្គូអាចប្រតិកម្មទៅវិញ ក្នុងទម្រង់ជាការឈប់ គាំទ្រការខំប្រឹងប្រែងរបស់ស.រ.អា. ខាងបន្តដាក់ទណ្ឌកម្មទល់នឹង អ៊ីរ៉ង់ កូរ៉េខាងជើង លីប៊ី ព្រមទាំងអាចបង្កើតជាឧបសគ្គដល់ស.រ.អា. ក្នុងការដឹកសម្ភារៈយោធាឆ្លងកាត់ដែនដីរុស្ស៊ី ទៅផ្គត់ផ្គង់ដល់ទ័ពអាមេរិកាំង ដែលឈរជើង នៅប្រទេស អាហ្វហ្កានីស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ