លោកពូទីនឆ្នាំក្រោយនឹងត្រឡប់ទៅកាន់អំណាចកំពូលវិញ
សេចក្តីនេះបានត្រូវខ្សឹបប្រាប់ទៅទីភ្នាក់ងារពត៌មានអង់គ្លេស Reuters ដោយមន្ត្រីជាន់ខ្ពស់៤នាក់នៅវិមានក្រេមឡាំង។ Reuters កត់សម្គាល់ថា មន្ត្រីទាំងនោះសុខចិត្តធ្វើអត្ថាធិប្បាយគួរឲ្យភ្ញាក់ផ្អើលនេះគឺតែក្នុងលក្ខណៈមិនបញ្ចេញឈ្មោះខ្លួនជាដាច់ខាត។ Reuters គ្រាន់តែបង្ហើបឲ្យដឹងថា ពួកគេជាអ្នកនយោបាយនិងជាអ្នកការទូត។ ដំណឹងដែលកន្ត្រាក់អារម្មណ៍នេះ ទើបលើកយកមកផ្សាយដោយប្រព័ន្ធឃោសនារុស្ស៊ីឈ្មោះ Newsru។
ចុះផ្សាយនៅថ្ងៃ៖
ស្តាប់ - ០២:១៤
ដោយច្របាច់ចូលគ្នាមតិខ្សឹបប្រាប់ខ្លួនទទួលបានពីប្រភពមិនបញ្ចេញឈ្មោះទាំង៤នោះ ទីភ្នាក់ងារពត៌មានអង់គ្លេស Reuters សរុបសេចក្តីថា គឺលោកនាយករដ្ឋមន្ត្រី ពូទីន ដែលនឹងឈរឈ្មោះ ជាបេក្ខជនចូលប្រឡូកក្នុងការបោះឆ្នោតនៅខែមីនាឆ្នាំ២០១២ ដើម្បីដណ្តើមយកវិញតំណែងជាប្រធានាធិបតីរុស្ស៊ី។ មូលហេតុ ៖
ទី១- គឺ មកពីលោក ពូទីន មិនប្រាកដក្នុងចិត្តឡើយថា ប្រធានាធិបតីសព្វថ្ងៃលោក មេដវេដេវ ដែលជា“អតីតសិស្ស” របស់គាត់និងជា “អ្នកស្ថិតនៅក្នុងការឧបត្ថម្ភ” របស់គាត់អាចបន្តដើរតួជាមេដឹកនាំប្រទេសរុស្ស៊ីតទៅទៀត។
ទី២- ពូទីនមានការគាំទ្រពីបណ្តាជនធំធេងជាងមេដវេដេវ ឆ្ងាយ។ លោកពូទីនបារម្ភខ្លាចក្រែងមេដវេដេវដែលគាត់ស្គាល់ជាង២០ឆ្នាំហើយមិនទទួលបានសម្លេងគាំទ្រឲ្យបានមាំមួនពីខាងមជ្ឈដ្ឋាននយោបាយ មជ្ឈដ្ឋានBusiness និងពីខាងប្រជាជនសាមញ្ញ។ ការគាំទ្រនេះ ជាកត្តាចាំបាច់សម្រាប់រក្សាទុកស្ថិរភាពក្នុងប្រទេស។
ទី៣- ពូទីន ក្នុងប៉ុន្មានឆ្នាំចំពោះមុខគ្មានបំណងចាកចេញពីឆាកនយោបាយសោះឡើយផ្ទុយទៅវិញគាត់ចង់វិលត្រឡប់ទៅកាន់អំណាចកំពូលវិញ ហើយគាត់ចង់នេះគឺមែនទែន។
ទី៤- ពូទីនខកចិត្តដោយឃើញមេដវេដេវចេះតែខំបង្ហាញយ៉ាងសំញ៉ែងពីភាពម្ចាស់ការនយោបាយរបស់ខ្លួនហើយប៉ុនប៉ងចាក់ឫសឲ្យបានជាប់ម៉ឺងក្នុងអំណាចកំពូល។
Reuters ក៏ច្បិចចេញមកនូវកំណត់សម្គាល់មួយរបស់មន្ត្រីម្នាក់ដែលមិនបញ្ចេញឈ្មោះនោះ ថាលោកមេដវេដេវថ្លោះការដោយគាត់ឲ្យតម្លៃខ្ពស់ជ្រុលដល់“ទម្ងន់”ខ្លួនក្នុងប្រព័ន្ធនយោបាយនៅរុស្ស៊ី។
ជាបញ្ចប់ Reuters បានព្យាករថា ចាប់ពីឆ្នាំ២០១២ទៅ លោកពូទីន អាចនឹងកាន់អំណាចដល់២អាណត្តិជាប់ដែលអាណត្តិថ្មីនោះមួយលើកៗមិនមែន៤ឆ្នាំដូចឥឡូវទេតែគឺដល់ទៅ៦ឆ្នាំ បានន័យថា គាត់នឹងកាន់អំណាំចរហូតដល់ឆ្នាំ២០២៤។ ពេលនោះ គាត់នឹងមានអាយុ៧២ឆ្នាំទៅហើយ។
ទាក់ទងនឹងការបោះឆ្នោតនៅរុស្ស៊ីដែរ ប៉ុន្តែជាការបោះឆ្នោតសភា នៅខែធ្នូខាងមុខថ្ងៃនេះមានចេញផ្សាយលទ្ធផលនៃការស្ទង់មតិដែលថាបណ្តាជនរុស្ស៊ីភាគច្រើនដល់ទៅ ៥៣% ជឿជាក់ថា ការបោះឆ្នោតនោះ គ្រាន់តែមានទម្រង់ជាសំបកក្រៅប៉ុណ្ណោះ ដ្បិតអាសនៈក្នុងរដ្ឋសភានឹងត្រូវបែងចែក គឺទៅតាមការសម្រេចចិត្តរបស់អាជ្ញាធរទេតើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ