រុស្ស៊ី ចង់ឱ្យប្រទេសបច្ចិមលោក បន្ទន់ឥរិយាបទបន្តិច លើបញ្ហានុយក្លេអ៊ែរ អ៊ីរ៉ង់
រដ្ឋាភិបាលរុស្ស៊ី បានស្នើឱ្យប្រទេសបច្ចិមលោក បន្ធូរបន្ថយ ទណ្ឌកម្ម ដែលតម្រូវឱ្យ ប្រទេសអ៊ីរ៉ង់បញ្ឈប់ ជាបន្ទាន់ នូវការផលិតអាវុធនុយក្លេអ៊ែរ។ ដោយទីក្រុងមូស្គូយល់ថា របបទីក្រុងតេអេរ៉ង់ ដែលមានថ្នាក់ដឹកនាំថ្មីមួយនេះ នឹងមានឆន្ទៈល្អក្នុងការចរចារកដំណោះស្រាយ មួយដោយសន្តិវិធី។
ចុះផ្សាយនៅថ្ងៃ៖
ស្តាប់ - ០១:៥៤
ទីក្រុងមូស្គូ បានប្រកាសឱ្យប្រទេសបច្ចិមលោក បន្ទន់រិយាបទបន្តិច ទាក់ទឹងនឹងការដាក់ទណ្ឌកម្ម អ៊ីរ៉ង់ ក្នុងសំណុំរឿង នុយក្លេអ៊ែរ ដោយចង់ឱ្យប្រទេសមហាអំណាចទាំងអស់ ពិចារណាឡើងវិញ ជៀសវាងការដាក់គំនៀបលើអ៊ីរ៉ង់។ មានតែវិធីនេះទេ ដែលទីក្រុង មូស្គូយល់ថា វានឹងមានប្រសិទ្ធិភាពបំផុត។
បើតាមសេចក្តីប្រកាស កាលពីថ្ងៃអង្គារ ទី១៨ មិថុនា របស់រដ្ឋមន្រ្តីក្រសួង ការបរទេសរុស្ស៊ី ដែល ដែលដកស្រង់ដោយភ្នាក់ងារព័ត៌មានបារាំង AFP បានឱ្យដឹងថា ទីក្រុងមូស្គូ ចង់ឱ្យប្រទេសមហាអំណាចទាំងប្រាំ បូក ១ ស្វែងរកគន្លឹះមួយចរចាជាមួយអ៊ីរ៉ង់។ គឺចង់ឱ្យមានការកំណត់ពេលវេលាមួយពិតប្រាកដឆាប់ៗខាងមុខនេះ។
សូមបញ្ជាក់ផងដែរថា ការចរចាការទូត រវាង អ៊ីរ៉ង់ និងប្រទេសមហាអំណាចទាំង៥ បូក ១ ដែលមាន សហរដ្ឋអាមេរិក បារាំង អាឡឺម៉ង់ អង់គ្លេស ចិន និងរុស្ស៊ី បានអូសបណ្លាយ អស់រយៈពេលជាច្រើនឆ្នាំមកហើយ។ រហូតមកដល់ការចរចាមួយកាល ពីខែមេសា កន្លងទៅនេះ ក៏មិនបានទទួលជាលទ្ធផលអ្វីដែរ។
យើងបានដឹងហើយថា កន្លងមកសហគមន៍ អន្តរជាតិ បានសង្ស័យលើ ដ្ឋាភិបាលតេអេរ៉ង់ មានលួចលាក់ផលិតគ្រាប់បែកនុយក្លេអ៊ែរ ក្រោមរូបភាពផលិតថាមពលនុយក្លេអ៊ែរស៊ីវិល។ តបនឹងទង្វើរខាងលើ សហគមន៍អន្តរជាតិបានសម្រេច ដាក់ទណ្ឌកម្មសេដ្ឋកិច្ចលើរដ្ឋាភិបាលអ៊ីរ៉ង់។ ដោយអង្គការសហប្រជាជាតិ បានសម្រេចបង្កកគណនីយ្យធនាគាររបស់អ៊ីរ៉ង់ និង ផ្អាកការទិញប្រេងរបស់ អ៊ីរ៉ង់ ពីសំណាក់ សហភាពអឺរ៉ុប និងសហរដ្ឋអាមេរិក ជាដើម។
កាលពីថ្ងៃចន្ទទី១៧មិថុនានេះដែរ លោក បារ៉ាក់ អូបាម៉ា បានប្រកាសក្នុងកិច្ចប្រជុំ G8 ថា អាមេរិក និងរុស្ស៊ី មានសុទិដ្ឋិនិយម ចំពោះការដោះស្រាយបញ្ហាខាងលើ ជាមួយថ្នាក់ដឹកនាំថ្មីរបស់អ៊ីរ៉ង់។
សូមរម្លឹកថា លោក Hassan Rohani បានជាប់ឆ្នោតជាប្រធានាធិបតីថ្មីរបស់អ៊ីរ៉ង់ កាលពីថ្ងៃអាទិត្យ ទី ១៦មិថុនា។ ហើយលោក ជាបក្ខជនមកពីគណបក្ស ដែលមាននយោបាយ កំណែទម្រង់និយម។ ក្នុងរឿងនេះ លោក Hassan Rohaniបានបញ្ជាក់ថា អ៊ីរ៉ង់ មិនបញ្ឈប់កម្មវិធីនុយក្លេអ៊ែររបស់ខ្លួនទេ។ តែលោក បានសន្យាថានឹងធ្វើការងារខាងនេះ ឱ្យមានតម្លាភាពបំផុតមុននឹងបន្តកម្មវិធី នុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ