អូបាម៉ា៖មិនមែនខ្ញុំទេ ដែលបាក់មុខ ប៉ុន្តែ គឺពិភពលោកទាំងមូល
កាលពីល្ងាចថ្ងៃពុធទី ៤ កញ្ញា នៅក្នុងដំណើរទស្សនកិច្ច នៅប្រទេសស៊ុយអែត លោក ប្រធានាធិបតី បារ៉ាក់ អូបាម៉ាបានចេញមុខ និយាយការពារខ្លួន នៅក្នុងសំណុំរឿងស៊ីរី។ តាមលោកអូបាម៉ា ប្រសិនបើគេនៅបន្តឈរ ឱបដៃ មិនអន្តរាគមយោធានៅស៊ីរី នោះ គឺពិភពលោកទាំងមូល និងសភាអាមេរិកដែលគេត្រូវដកជំនឿទុកចិត្ត ប៉ុន្តែ មិនមែនរូបលោកទេ។
ចុះផ្សាយនៅថ្ងៃ៖
ស្តាប់ - ០២:៣៧
ដោយខ្លាចគេចោទថា លោកលេបសំដី មិនព្រមធ្វើប្រតិបត្តិការយោធានៅស៊ីរី លោកប្រធានាធិបតីអាមេរិក បានចេញមុខ និយាយការពារខ្លួនពីរឿងខ្សែបន្ទាត់ក្រហម ដែលលោកធ្លាប់បានកំណត់ដើម្បីព្រមានរដ្ឋាភិបាលស៊ីរី កាលពីឆ្នាំមុន។ សម្រាប់លោកអូបាម៉ា លោក មិនមែនជាអ្នកបង្កើតខ្សែបន្ទាត់ក្រហមនោះទេ គឺមេដឹកនាំនៃប្រជាជនជាង ៩៨ភាគរយ ក្នុងពិភពលោកដែលបានកំណត់ខ្សែបន្ទាត់ក្រហម ដោយបានបង្កើតសន្ធិសញ្ញាប្រឆាំងមិនឲ្យគេប្រើអាវុធគីមីប្រល័យលោក។
តាមលោកអូបាម៉ា រហូតមកដល់ពេលនេះ រដ្ឋាភិបាលស៊ីរីបានរំលោភខ្សែបន្ទាត់ក្រហមរបស់សហគមន៍អន្តរជាតិ ដោយបានប្រើអាវុធគីមី សម្លាប់ប្រជាជន កាលពីខែសីហាកន្លងទៅ។ ដូច្នេះ ប្រសិនបើសហគមន៍អន្តរជាតិ ក្នុងនោះមានអាមេរិក និងសភាអាមេរិក នៅស្ងៀម មិនធ្វើអ្វីសោះ នោះគឺពួកគេនឹងត្រូវបាត់បង់ជំនឿទុកចិត្តពីប្រជាជន ប៉ុន្តែមិនមែនរូបលោក បារ៉ាក់ អូបាម៉ា ទេ។
លោកអូបាម៉ា បានរារែកមិនសម្រេចធ្វើអន្តរាគមន៍យោធា ភ្លាមទៅលើស៊ីរី បន្ទាប់ពី អង់គ្លេស និង អូតង់ ដកខ្លួន និងក្រោមការព្រមានរបស់រុស្ស៊ី និងចិន។ ប៉ុន្តែ ដើម្បីស្តាប្រជាប្រិយភាពរបស់លោកឡើងវិញ លោកអូបាម៉ានៅបន្តស្វែងរកសំឡេងគាំទ្រ នៅលើឆាកអន្តរជាតិ ដើម្បីធ្វើប្រតិបត្តិការយោធាឲ្យបាន នៅស៊ីរី។ នៅក្រោយជំនួបជាមួយលោកនាយករដ្ឋមន្រ្តីស៊ុយអែត លោកអូបាម៉ា ដោយមិននិយាយបើកចំហរ នោះ បានអំពាវនាវដល់ប្រទេសនានាឲ្យចូលរួមគាំទ្រនយោបាយធ្វើអន្តរាគមយោធារបស់អាមេរិកនៅស៊ីរី។
នៅក្នុងស្រុកវិញ លោកប្រធានាធិបតីអាមេរិកបានទទួលការគំាទ្រពីគណៈកម្មការទំនាក់ទំនងអន្តរជាតិនៅព្រឹទ្ធសភា ដែលបានយល់ព្រមកាលពីយប់ថ្ងៃពុធម្សិលមិញ ឲ្យលោកអូបាម៉ាធ្វើប្រតិបត្តិការទ័ពនៅ ស៊ីរី ក្នុងអំឡុង៦០ថ្ងៃ និងអាចមានសិទ្ធិបន្ត៣០ថ្ងៃបន្ថែមទៀត ប្រសិនបើចាំបាច់។ ក្នុងប្រតិបត្តិការទ័ព លើកនេះ ព្រឹទ្ធសភាអាមេរិកអនុញ្ញាតឲ្យប្រើការវាយប្រហារតាមអាកាស ប៉ុន្តែ ហាមដាច់ខាតវត្តមានទ័ពជើងគោក នៅស៊ីរី។
លោកប្រធានាធិបតីរុស្ស៊ី វ្លាដីមៀរ ពូទីន បានរិះគន់ការសម្រេចរបស់គណៈកម្មការព្រឹទ្ធសភាអាមេរិក និងចាត់ទុកការវាយប្រហារទៅលើប្រទេសមួយ ដោយគ្មានការអនុញ្ញាតពីអង្គការសហប្រជាជាតិ ថា ជាការរំលោភបំពាន ខុសច្បាប់។
កាលពីខែសីហាមុននេះ លោកអូបាម៉ាបានប្រកាសលុបចោលជំនួបកំពូលស្តីពីស៊ីរី ដែលលោកត្រូវធ្វើជាមួយលោកប្រធានាធិបតី រុស្ស៊ី នៅមុនកិច្ចប្រជុំកំពូលក្រុមប្រទេស G ២០ ដែលត្រូវបើកធ្វើ នៅថ្ងៃព្រហស្បតិ៍ទី ៥ កញ្ញា។ ប៉ុន្តែ កាលពីថ្ងៃពុធម្សិលមិញ លោកអូបាម៉ា បានអះអាងថា លោកនៅតែមានក្តីសង្ឃឹម និងបន្តនិយាយបញ្ចុះបញ្ចូលប្រមុខដឹកនាំរុស្ស៊ីឲ្យដាក់ទោសរដ្ឋាភិបាលស៊ីរី។ តាមលោកអូបាម៉ា ប្រតិបត្តិការអន្តរជាតិនឹងមានប្រសិទ្ធិភាពបើសិនជាមានការសហការពីរុស្ស៊ី។ តាមសេតវិមាន គ្មានទេ ជំនួបជាផ្លូវការ រវាងមេដឹកនាំទាំងពីរនៅក្នុងកិច្ចប្រជុំ G ២០ ប៉ុន្តែ ជំនួបក្រៅផ្លូវការនឹងអាចមាន រវាងលោកអូបាម៉ា និងលោកពូទីន ដើម្បីនិយាយពីសំណុំរឿងស៊ីរី។
ប្រធានាធិបតីរុស្ស៊ី ដែលរហូតមកដល់ពេលនេះ បាននិយាយថា លោកនឹងចូលរួមធ្វើអន្តរាគមន៍ នៅស៊ីរី ប្រសិនបើគេមានភស្តុតាងគួរឲ្យជឿជាក់ថា រដ្ឋាភិបាលស៊ីរី ជាអ្នកប្រើអាវុធគីមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ