លោកពូទីនថារុស្ស៊ីផ្អាកការបញ្ជូនមីស៊ីលបាញ់យន្តហោះទៅឲ្យស៊ីរី
លោកប្រធានាធិបតីរុស្ស៊ី វ៉្លាឌីមៀរ ពូទីន បានប្រកាសកាលពីថ្ងៃពុធម្សិលមិញថា រុស្ស៊ីបានផ្អាកការបញ្ជូនប្រព័ន្ធមីស៊ីលបាញ់យន្តហោះទៅឲ្យស៊ីរី ក៏ប៉ុន្តែថា មានផ្នែកខ្លះនៃប្រព័ន្ធការពារដែនអាកាសនេះ ត្រូវបានបញ្ជូនទៅឲ្យស៊ីរីរួចទៅហើយ។ លោកពូទីនបានថ្លែងបែបនេះ មួយថ្ងៃមុនបើកជំនួបកំពូលក្រុមប្រទេស G20 ដែលមានរុស្ស៊ីជាម្ចាស់ផ្ទះ ហើយដែលគេរំពឹងថា វិបត្តិស៊ីរីនឹងជាសំណុំរឿងដ៏សំខាន់មួយក្នុងជំនួបកំពូលនេះ។
ចុះផ្សាយនៅថ្ងៃ៖
ស្តាប់ - ០១:៤៧
ថ្លែងនៅក្នុងបទសម្ភាសន៍ជាមួយទូរទស្សន៍រុស្ស៊ី លោកប្រធានាធិបតីពូទីនបានរំឭកថា រុស្ស៊ីមានចុះកិច្ចសន្យាលក់ប្រព័ន្ធមីស៊ីលធុន S-300 ទៅឲ្យស៊ីរី ហើយមានផ្នែកខ្លះនៃប្រព័ន្ធមីស៊ីលនេះ ត្រូវបានបញ្ជូនទៅឲ្យស៊ីរីរួចទៅហើយ ក៏ប៉ុន្តែ រុស្ស៊ីបានសម្រេចផ្អាកការបញ្ជូនផ្នែកផ្សេងទៀតជាបណ្តោះអាសន្នសិន។ លោកពូទីនមិនបានបញ្ជាក់ប្រាប់ អំពីហេតុផលនៃការផ្អាកការបញ្ជូនប្រព័ន្ធមីស៊ីលទៅឲ្យស៊ីរីនេះទេ។
គួរបញ្ជាក់ថា ប្រព័ន្ធមីស៊ីល ធុន S-300 គឺជាប្រព័ន្ធការពារដែនអាកាសធុនទំនើបបំផុតរបស់រុស្ស៊ី ដែលអាចបាញ់ទម្លាក់យន្តហោះចម្បាំងផង និងអាចបាញ់ស្កាត់ចាប់មីស៊ីលប្រភេទខ្លះបានផងដែរ។
រុស្ស៊ីបានអះអាងថា កិច្ចសន្យាលក់ប្រព័ន្ធមីស៊ីលនេះត្រូវបានចុះជាមួយស៊ីរី តាំងពីមុនផ្ទុះសង្រ្គាមស៊ីវិលម៉្លេះ។ ក៏ប៉ុន្តែ ប្រទេសលោកខាងលិចតែងតែបានរិះគន់រុស្ស៊ី ដែលបានចុះកិច្ចសន្យាលក់ប្រព័ន្ធមីស៊ីលការពារដែនអាកាសទៅឲ្យស៊ីរីនេះ។
ប្រសិនបើស៊ីរីមានប្រព័ន្ធមីស៊ីលនេះ វានឹងជាឧបសគ្គដ៏ធំមួយ ដល់គម្រោងប្រតិបត្តិការយោធារបស់អាមេរិក និងសម្ព័ន្ធមិត្ត ក្នុងការវាយប្រហារតាមអាកាស ឬបង្កើតតំបន់គ្មានការហោះហើរនៅស៊ីរី។
ក៏ប៉ុន្តែ មន្រ្តីជាន់ខ្ពស់រុស្ស៊ី ដែលសុំមិនបញ្ចេញឈ្មោះបានអះអាងថា ផ្នែកខ្លះនៃប្រព័ន្ធមីស៊ីល S-300 ដែលរុស្ស៊ីបានបញ្ជូនទៅឲ្យស៊ីរីរួចហើយនោះ មិនគ្រប់គ្រាន់អាចដាក់ឲ្យដំណើរការប្រព័ន្ធមីស៊ីលនេះបានទេ។ ចំណែកឯអ្នកជំនាញខាងសព្វាវុធរុស្ស៊ីក៏បានអះអាងផងដែរថា យ៉ាងហោចណាស់ក៏គេត្រូវរង់ចាំរហូតដល់ចុងឆ្នាំ២០១៤ ឬដើមឆ្នាំ២០១៥ដែរ ទើបស៊ីរីអាចដាក់ឲ្យដំណើរការប្រព័ន្ធមីស៊ីល S-300 ដោយពេញលេញបាន។
ការប្រកាសរបស់លោកពូទីន អំពីការផ្អាកការបញ្ជូនប្រព័ន្ធមីស៊ីលទំនើបទៅឲ្យស៊ីរី កាលពីម្សិលមិញនេះ ទំនងជាធ្វើឡើង ក្នុងគោលដៅរំងាប់ក្តីបារម្ភរបស់ប្រទេសលោកខាងលិច ក្នុងពេលដែលរុស្ស៊ីត្រូវធ្វើជាម្ចាស់ផ្ទះនៃជំនួបកំពូលក្រុមប្រទេស G20 ដែលត្រូវបើកធ្វើនៅថ្ងៃព្រហស្បតិ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ