គឺរុស្ស៊ីជាអ្នកកត់ត្រាឃើញកាំជ្រួចមីស្ស៊ីលពីរដើម ហោះចេញពីសមុទ្រមេឌីទែរ៉ាណេ តម្រង់ទៅឆ្នេរប្រទេសស៊ីរី
ការបាញ់បង្ហោះនេះ ដែលមានធ្វើម្សិលមិញ បាននាំឲ្យគេផ្អើលឆោឡោ ក្នុងផ្ទៃដែលពិភពលោករង់ចាំការវាយប្រហារទៅលើស៊ីរី ដ្បិតលោកប្រធានាធិបតីអាមេរិក បារ៉ាក់ អូបាម៉ា បានប្រកាសទៅហើយ កាលពី៣ថ្ងៃមុនអំពីការសម្រេចចិត្តវាយប្រហារនេះ ដោយ សង្ឃឹមទទួលការគាំទ្រពីសំណាក់សភាសិន ដើម្បី”ប្រដៅ” រដ្ឋាភិបាល Bachar Assad ចំពោះការហ៊ានប្រើអាវុធគីមី សម្លាប់បណ្តាជនស៊ីវិល នៅស៊ីរី។
ចុះផ្សាយនៅថ្ងៃ៖
ស្តាប់ - ០២:២៧
ដំណឹងស្តីអំពីការកត់ត្រាឃើញមានកាំជ្រួចមីស្ស៊ីលពីរដើម ហោះចេញពីកណ្តាលសមុទ្រមេឌីទែរ៉ាណេ តម្រង់ទៅទិសខាងកើត ឆ្ពោះទៅឆ្នេរប្រទេសស៊ីរី ត្រូវបានលោករដ្ឋមន្ត្រីការពារជាតិរុស្ស៊ីរាយការណ៍ជាបន្ទាន់ភ្លាម ជូនលោកប្រធានាធិបតីពូទីន ដែលស្របនឹងរដ្ឋធម្មនុញ្ញជាអគ្គមេបញ្ជាការជាន់ខ្ពស់បំផុតនៃកងទ័ពរុស្ស៊ី។ រុស្ស៊ីដែលប្រឆាំងដាច់អហង្ការ ទល់នឹងអន្តរាគមន៍យោធាពីក្រៅ ទៅលើប្រទេសស៊ីរីជាសម្ព័ន្ធមិត្តខ្លួន។
គឺស្ថានីយរ៉ាដារខាងព្រមានទល់នឹងការវាយប្រហារនៃកាំជ្រួចមីស្ស៊ីល” ហៅកាត់ថា SPRN ដែលស្ថិតនៅក្រុង Armavir ចម្ងាយប្រមាណ១.៤០០គ.ម. ខាងត្បូងពីរដ្ឋធានីម៉ូស្គូ ដែល“ភ្នែក” និង “ត្រចៀក”វា អាចមើលធ្លុះ និងស្តាប់ឮដល់ចម្ងាយ៦.០០០គ.ម. នៅវេលាម៉ោង១០និង១៦នាទី បានកត់ត្រាឃើញមានបាញ់បង្ហោះមីស្ស៊ីលពីរដើម ចេញពីលើផ្ទៃទឹកសមុទ្រនោះ ហើយក៏តាមដានអំពីដំណើរហោះរបស់វា។
ជាការកត់សម្គាល់ ក្រោយពីរុស្ស៊ីផ្សព្វផ្សាយដំណឹងនេះភ្លាម នៅឯទីស្តីការបក្សសម្ព័ន្ធ OTAN នៅក្រសួងការពារជាតិបារាំង អ៊ីតាលី អាល្លឺម៉ង់ ព្រមទាំងអ៊ីស្រាអែល នៅមន្ទីរបញ្ចកោណជាក្រសួងការពារជាតិស.រ.អា. នៅសហភាពអឺរ៉ុប គេនាំគ្នាថ្លែងថា គេមិនដឹងអំពីរឿងបង្ហោះកាំជ្រួចមីស្ស៊ីលអ្វីណាទេ នៅលំហសមុទ្រមេឌីទែរ៉ាណេ លើកលែងតែអង់គ្លេសមួយប៉ុណ្ណោះ ដែលបញ្ជាក់អំពីដំណឹងរុស្ស៊ី។
លុះប៉ុន្មានម៉ោងក្រោយមក ទើបអ៊ីស្រាអែលថ្លែងថា ការបង្ហោះកាំជ្រួចមីស្ស៊ីលនោះ គឺជា ការល្បងពិសោធន៍ដែលខ្លួនធ្វើរួមជាមួយស.រ.អា។ មីស្ស៊ីលទាំង២នោះ បានដើរតួជា “ស៊ីប្ល” សម្រាប់ល្បងមើលប្រសិទ្ធិភាព នៃ“ប្រព័ន្ធមីស្ស៊ីលប្រឆាំងមីស្ស៊ីល” របស់អ៊ីស្រាអែល។ ចំណែកក្រសួងការពារជាតិអាមេរិកគូសបញ្ជាក់ថា ការល្បងពិសោធន៍នេះ ឥតមាននិស្ស័យពាក់ព័ន្ធទៅនឹងគម្រោងក្រុងវ៉ាស៊ីនតោន ឲ្យមេរៀនយោធាដល់របបលោកប្រធានាធិបតីស៊ីរី Assad ជាចម្លើយតបនឹងការប្រើអាវុធគីមីដោយរបបនេះឡើយ។
ទោះយ៉ាងណាក្តី ក៏តាមអ្នកវិភាគរុស្ស៊ីខ្លះ ការបាញ់បង្ហោះមីស្ស៊ីលនោះ អាចតាំងគោលដៅស្ទាបស្ទង់មើលជាមុនសិន ប្រតិកម្មពីខាងកងការពារដែនអាកាសស៊ីរីផ្ទាល់ និងពីខាងក្រុមកប៉ាល់ចំបាំងរបស់រុស្ស៊ី ដែលប្រចាំការនៅសមុទ្រមេឌីទែរ៉ាណេ មិនឆ្ងាយពីប្រទេសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ