អាមេរិកនិងកាណាដាថ្កោលទោសការវាយប្រហារលើទស្សនាវដ្តី Charlie Hebdo នៅទីក្រុងប៉ារីស
ភ្លាមៗប៉ុន្មានម៉ោងក្រោយការវាយប្រហារលើទីស្នាក់ការទស្សនាវដ្តី Charlie Hebdo នៅក្រុងប៉ារីស លោក បារ៉ាក់ អូបាម៉ាប្រធានាធិបតីសហរដ្ឋអាមេរិចនិងលោកស្ទីវិន ហាភឺ នាយករដ្ឋមន្ត្រីនៃប្រទេសកាណាដា បានថ្លែងសាររំលឹកទុក្ខនិងថ្កោលទោសលើទង្វើភេវរកម្មដ៏គួឲ្យរន្ធត់និងដ៏សាហាវយង់ឃ្នងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
លោកប្រធានធិបតីអូបាម៉ាបានថ្លែងរំលែកទុក្ខលើហេតុការណ៍ដ៏គួរឲ្យរន្ធត់នេះថា ៖
« យើងខ្ញុំសូមថ្លែងរំលែកទុកជូនចំពោះជនរងគ្រោះនៃការវាយប្រហារភេវរកម្មនិងជូនចំពោះប្រជាជនបារាំងទាំងអស់ក្នុងកាលៈទេសៈដ៏សែនសោកសង្រែងនេះ »។
លោកបានថ្លែងថ្កោលទោសថា ៖ “ ខ្ញុំសូមថ្កោលទោសយ៉ាងខ្លាំងលើការបាញ់ប្រហារដ៏រន្ធត់នៅឯការិយាល័យរបស់ទស្សនាវដ្តី Charlie Hebdo នៅក្នុងទីក្រុងប៉ារីសដែលបានសម្លាប់មនុស្ស១២នាក់»។ លោកបន្ថែមថា៖ « ប្រទេសបារាំងជាសម្ព័ន្ធមិត្តចាស់បំផុតរបស់សហរដ្ឋអាមេរិកនិងបាននៅជាមួយសហរដ្ឋអាមេរិកក្នុងការប្រយុទ្ធប្រឆាំងនឹងភេរវករដែលបានគំរាមកំហែងសន្តិសុខរួមនិងពិភពលោករបស់យើង »។
« ម្តងហើយម្តងទៀត ប្រជាជនបារាំងបានក្រោកឈរឡើងដើម្បីការពារគុណតម្លៃជាសកល ដែលមនុស្សគ្រប់ជំនាន់បានការពារ»។ « ប្រទេសបារាំងនិងទីក្រុងប៉ារីសដ៏អស្ចារ្យជាកន្លែងដែលទង្វើដ៏គួរឱ្យរន្ធត់នេះ បានកើតឡើងនឹងផ្តល់ជូនពិភពលោកនូវគំរូជានិរន្តរដែលនឹងអាចយកជ័យជំនះលើចក្ខុវិស័យស្អប់ខ្ពើមរបស់ឃាតករទាំងនេះ »។
ចំណែកនាយករដ្ឋមន្ត្រីស្ទីវិហាភឺបានមានប្រសាន៍ថា ៖ « ជាមួយនឹងកំហឹងលាយឡំនឹងទុក្ខព្រួយនៅពេលដែលខ្ញុំបានដឹងពីការវាយប្រហារភេរវកម្មមួយបាន កើតឡើងនៅការិយាល័យនៃកាសែត Charlie Hebdo នៅទីក្រុងប៉ារីស »។
« ក្នុងនាមពលរដ្ឋកាណាដា ទាំងអស់ខ្ញុំសូមរំលែកទុក្ខយ៉ាងជ្រាលជ្រៅជូនទៅដល់ក្រុមគ្រួសារនិងមិត្តភ័ក្រជនរងគ្រោះនៃឧក្រិដ្ឋកម្មដ៏សាហាវយង់ឃ្នងនេះ ហើយខ្ញុំសូមជូនពរឲ្យបារាំងជាសះស្បើយឡើងវិញពីរបួសនេះ ក្នុងពេលឆាប់ៗ។
ហើយជនល្មើសនៃការវាយប្រហារនេះត្រូវតែចាប់ខ្លួននិងនាំយកទៅកាត់ទោស»។ « ទង្វើព្រៃផ្សៃនេះ រួមបញ្ចូលជាមួយនឹងការវាយប្រហារនៅទីក្រុងស៊ីដនីនៅSaint- Jean-sur-Richelieu និងនៅរាជធានី អូតាវ៉ា ជាការដាស់ស្មារតីឲ្យយើងដឹងថា គ្មានប្រទេសណាមួយអាចគេចផុតពីការប៉ុនប៉ងវាយប្រហារ ភេរវកម្មទេលើពិភពលោកនេះ »។ « តែប្រទេសកាណាដានិងសម្ព័ន្ធមិត្តរបស់ខ្លួនមិនចុះញ៉មចំពោះ ការបំភិតបំភ័យនេះទេ ហើយយើងនឹងបន្តក្រោកឈររួបរួមគ្នាប្រឆាំងនឹងភេរវករ ដែលគំរាមកំហែង ដល់សន្តិភាព សេរីភាព និងលទ្ធិប្រជាធិបតេយ្យរបស់ប្រទេសយើងទាំងអស់គ្នា។ »
លោកស្ទីវិហាភឺថ្លែងបញ្ចប់ដោយពោលថា៖ ពលរដ្ឋកាណាដាសូមថ្លែងនូវសាមគ្គីភាពចំពោះបារាំងនៅថ្ងៃដ៏សែនអន្ធិកានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ