ភេរវកម្មនៅប៉ារីស៖ តម៉្រុយនៃការពាក់ព័ន្ធរបស់អាល់កៃដានៅយេម៉ែន
ប្រតិបត្តិការតាមប្រមាញ់ភេរវជនត្រូវបញ្ចប់ ភេរវជនត្រូវប៉ូលិសបង្រ្កាប ភាពតានតឹងនៅក្នុងទីក្រុងប៉ារីសក៏ចាប់ផ្តើមធូរស្រាលមកវិញ ក៏ប៉ុន្តែ ក្រៅពីការកាន់ទុក្ខចំពោះជនរងគ្រោះ សំណួរជាច្រើនក៏បានចោទឡើងដែរ ជាពិសេស ជុំវិញដំណើរដើមហេតុ ប្រភពដើមនៃភេរវជន ព្រមទាំងខ្សែបណ្តាញ ឬការជាប់ពាក់ព័ន្ធនឹងក្រុមភេរវជនអន្តរជាតិ។ យោងតាមព័ត៌មានដែលផ្តល់ដោយរដ្ឋអាជ្ញាបារាំង គេសង្កេតឃើញមានតម៉្រុយនៃការជាប់ពាក់ព័ន្ធរបស់ក្រុមអាល់កៃដាប្រចាំប្រទេសយេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣៩
យោងតាមលទ្ធផលស៊ើបអង្កេតបឋម ដែលបង្ហាញជូនដោយរដ្ឋអាជ្ញាបារាំង ភេរវជនទាំងពីរក្រុម គឺក្រុមដែលចូលបាញ់ប្រហារនៅសារព័ត៌មាន Charlie Hebdo និងក្រុមដែលរៀបចំការបាញ់ប្រហារលើប៉ូលិស ហើយបន្ទាប់មកចូលចាប់ចំណាប់ខ្មាំងនៅហាងលក់ទំនិញជ្វីហ្វ នៅខាងភាគខាងកើតប៉ារីស មានទំនាក់ទំនងនឹងគ្នាជិតស្និទ្ធ។
Cherif Kouachi ភេរវជនម្នាក់ក្នុងចំណោមពីរនាក់ដែលវាយប្រហារលើ Charlie Hebdo និង Amedy Coulibaly ភេរវជនដែលបាញ់ប្រហារលើប៉ូលិសនិងចាប់ចំណាប់ខ្មាំងនៅហាងជ្វីហ្វ ធ្លាប់ជាប់ក្នុងសំណុំរឿងតុលាការជាមួយគ្នា ដោយត្រូវចោទប្រកាន់ពីបទប៉ុនប៉ងរំដោះមេភេរវជន ដែលកំពុងជាប់ក្នុងពន្ធនាគារបារាំង។ នៅក្នុងសំណុំរឿងនោះ Amedy Coulibaly ត្រូវតុលាការកាត់ឲ្យជាប់ទោស ចំណែក Cherif Kouachi ត្រូវដោះលែងដោយសារគ្មានភស្តុតាងគ្រប់គ្រាន់។ ប្រពន្ធរបស់ Cherif Kouachi ដែលត្រូវប៉ូលិសឃាត់ខ្លួនចាប់តាំងពីមានការវាយប្រហារលើ Charlie Hebdo ក៏បានបញ្ជាក់ប្រាប់ប៉ូលិសយ៉ាងច្បាស់ដែរថា Cherif Kouachi និង Amedy Coulibaly ស្គាល់គ្នាយ៉ាងច្បាស់។ ម្យ៉ាងទៀត ក្រុមស៊ើបអង្កេតបានរកឃើញថា ប្រពន្ធរបស់ Cherif Kouachi និងប្រពន្ធរបស់ Amedy Coulibaly ដែលបច្ចុប្បន្នប៉ូលិសកំពុងតាមរកចាប់ខ្លួន ក៏មានទំនាក់ទំនងគ្នាយ៉ាងច្រើនដែរ គឺមានការទាក់ទងគ្នាតាមទូរស័ព្ទរហូតដល់ទៅជាង ៥០០លើក នៅក្នុងឆ្នាំ២០១៤។
ទាក់ទងនឹងការរៀបគម្រោងការណ៍វាយប្រហារភេរវកម្មនៅប៉ារីសប៉ុន្មានថ្ងៃមកនេះ គេមិនទាន់ដឹងឲ្យប្រាកដនៅឡើយទេថា តើភេរវជនទាំងពីរក្រុមមានទំនាក់ទំនងគ្នាត្រឹមកម្រិតណា។ Amedy Coulibaly បានអះអាងប្រាប់ទូរទស្សន៍បារាំង BFMTV ថា ពួកគេទាំងពីរក្រុមបានគិតគូរជាមួយគ្នាជាមុន ដោយឯកភាពគ្នាថា ក្រុមបងប្អូនត្រកូល Kouachi ជាអ្នកវាយប្រហារលើ Charlie Hebdo ចំណែក Amedy Coulibaly ជាអ្នកធ្វើការបាញ់ប្រហារលើប៉ូលិស នៅភាគខាងត្បូងប៉ារីស។ ក៏ប៉ុន្តែ អ្វីដែលមិនសូវស៊ីគ្នា គឺនៅត្រង់ថា បងប្អូនត្រកូល Kouachi អះអាងថា ពួកគេធ្វើការឲ្យក្រុមអាល់កៃដានៅយេម៉ែន ចំណែកឯ Amedy Coulibaly អះអាងថាធ្វើការឲ្យក្រុមជីហាតរដ្ឋអ៊ីស្លាម ដែលជាក្រុមពីរមិនសូវត្រូវគ្នា។ គួររំឭកឡើងវិញថា ក្រុមជីហាតរដ្ឋអ៊ីស្លាមនៅអ៊ីរ៉ាក់និងស៊ីរីធ្លាប់ត្រូវបានមេដឹកនាំកំពូលអាល់កៃដាកាត់កាល់លែងរាប់រក ហើយនៅក្នុងប្រទេសស៊ីរី ក្រុមជីហាតរដ្ឋអ៊ីស្លាម និងក្រុមអាល់កៃដាថែមទាំងធ្លាប់វាយប្រយុទ្ធគ្នាថែមទៀតផងនាពេលកន្លងមក។
ទោះជាយ៉ាងណាក៏ដោយ គេឃើញថា ទាំងក្រុមជីហាតរដ្ឋអ៊ីស្លាម និងក្រុមអាល់កៃដានៅយេម៉ែន បាននាំគ្នាប្រកាសអបអរសាទរ និងកោតសរសើរចំពោះការវាយប្រហារនៅប៉ារីស ក៏ប៉ុន្តែ មានតែក្រុមអាល់កៃដានៅយេម៉ែនទេដែលចេញមុខប្រកាស កាលពីយប់ថ្ងៃសុក្រថា ពួកគេគឺជាអ្នកចាត់ចែងរៀបចំគម្រោងការណ៍វាយប្រហារនៅប៉ារីស។ មេដឹកនាំក្រុមអាល់កៃដានៅយេម៉ែននេះក៏បានព្រមានបារាំងផងដែរថា ការវាយប្រហារថ្មីៗជាច្រើនទៀតនឹងកើតមានឡើង ប្រសិនបើរដ្ឋាភិបាលបារាំងនៅតែបន្តនយោបាយការបរទេសនៅតំបន់មជ្ឈិមបូព៌ាដូចពេលបច្ចុប្បន្ននេះ។
ក្រៅពីការប្រកាសទទួលខុសត្រូវនេះ ព័ត៌មានដែលទទួលបានដោយទីភ្នាក់ងារចារកិច្ចបារាំង និងអាមេរិក បូករួមជាមួយនឹងលទ្ធផលនៃការស៊ើបអង្កេតបឋមដោយក្រុមស៊ើបអង្កេតបារាំងសុទ្ធតែបង្ហាញពីតម៉្រុយដែលនាំទៅរកក្រុមអាល់កៃដានៅយេម៉ែន។ គេដឹងថា ភេរវជនដែលវាយប្រហារលើសារព័ត៌មាន Charlie Hebdo គឺ Saïd Kouachi និង Chérif Kouachi សុទ្ធតែធ្លាប់ធ្វើដំណើរទៅកាន់ប្រទេសយេម៉ែន ហើយប្រហែលជាអាចទទួលការហ្វឹកហ្វឺន ពីក្រុមអាល់កៃដានៅយេម៉ែន។ ព័ត៌មាននេះវាស៊ីគ្នាទៅនឹងការអះអាងរបស់ Chérif Kouachi ដែលប្រាប់ទូរទស្សន៍បារាំង BFMTV ក្នុងពេលកំពុងចាប់ចំណាប់ខ្មាំងម្សិលមិញថា ក្រុមអាល់កៃដានៅយេម៉ែនគឺជាអ្នកបញ្ជូនពួកគេឲ្យមកធ្វើការវាយប្រហារលើ Charlie Hebdo ហើយក្រុមអាល់កៃដានៅយេម៉ែនដែលជាអ្នកផ្តល់លុយក្នុងការរៀបចំផែនការវាយប្រហារនេះ។
ដូច្នេះហើយបានជា កាលពីយប់ម្សិលមិញនេះ រដ្ឋអាជ្ញាបារាំងបានឲ្យដឹងថា ការស៊ើបអង្កេតនឹងផ្តោតជាអាទិភាពទៅលើខ្សែបណ្តាញអាល់កៃដានៅយេម៉ែន។
បច្ចុប្បន្ននេះ ក្តីបារម្ភនៅតែបន្តកើតមាននៅបារាំង ដោយគេមិនដឹងថា តើក្រៅពីភេរវជន៣នាក់ដែលស្លាប់ទៅហើយនេះ នៅមានខ្សែបណ្តាញភេរវជនអ៊ីស្លាមជ្រុលនិយមប៉ុន្មាននាក់ទៀត នៅក្នុងប្រទេសបារាំង ហើយតើពួកគេនៅមានគម្រោងការណ៍វាយប្រហារទៅលើទីតាំងណាខ្លះទៀត។
បើតាមការអះអាងរបស់ទីភ្នាក់ងារចារកិច្ចអង់គ្លេស (MI5) ក្រុមភេរវជនអ៊ីស្លាមជ្រុលនិយមកំពុងតែរៀបគម្រោងការណ៍វាយប្រហារទ្រង់ទ្រាយធំ នៅតាមបណ្តាប្រទេសលោកខាងលិចទាំងអស់។ រដ្ឋាភិបាលអាមេរិកវិញទើបនឹងបានចេញសេចក្តីជូនដំណឹងឲ្យពលរដ្ឋអាមេរិកទាំងអស់ ជាពិសេស អ្នកនៅបរទេសឲ្យមានការប្រុងប្រយ័ត្ន ដោយគេបារម្ភថា ពួកភេរវជនកំពុងតែមានគម្រោងការណ៍វាយប្រហារលើពលរដ្ឋអាមេរិក នៅគ្រប់ទីកន្លែង។
កាលពីយប់ថ្ងៃសុក្រ លោកប្រធានាធិបតីបារាំង ហ្វ្រង់ស័រ ហូឡង់ បានប្រកាសថា ការគំរាមកំហែងភេរវកម្មចំពោះប្រទេសបារាំងនៅមិនទាន់បញ្ចប់នៅឡើយទេ។ ដូច្នេះហើយបានជារហូតមកទល់នឹងថ្ងៃសៅរ៍នេះ រដ្ឋាភិបាលនៅតែបន្តរក្សាកម្រិតអាសន្នភេរវកម្ម នៅកម្រិតអតិបរមាដដែល។ លោកប្រធានាធិបតីបារាំងក៏បានអំពាវនាវផងដែរដល់ប្រជាជនបារាំងទាំងអស់ឲ្យមានការរួបរួមគ្នា ជាពិសេស កុំឲ្យមានការរើសអើងចំពោះអ្នកកាន់សាសនាអ៊ីស្លាម ដោយលោកលើកឡើងថា ភេរវជនជ្រុលនិយម និងល្ងង់ខ្លៅអស់ទាំងនេះ មិនមានអ្វីជាប់ពាក់ព័ន្ធនឹងអ្នកកាន់សាសនាអ៊ីស្លាមនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ