៥៣ម៉ោងនៃហេតុការណ៍ភេរវកម្មដ៏រន្ធត់ និងការតាមប្រមាញ់ភេរវជននៅប៉ារីស
បច្ចុប្បន្នភាពដ៏ក្តៅគគុកនៅប្រទេសបារាំងថ្ងៃនេះ គឺការបិទបញ្ចប់សោកនាដកម្មបីថ្ងៃបង្កដោយភេរវជនអ៊ីស្លាមជ្រុលនិយម បន្ទាប់ពីប៉ូលិសបានបាញ់សម្លាប់ភេរវជនពីរនាក់បងប្អូន សេរីហ្វ និងសាអ៊ីត គូសហ្ស៊ី និង អាម៊ីដា គូលីបាលី នៅព្រលប់ថ្ងៃសុក្រទី ៩ មករា។ ជាសរុប ប្រទេសបារាំងបានធ្លាក់ក្នុងសោកនាដកម្ម និងការភ័យរន្ធត់អស់រយៈពេល ៥៣ម៉ោង ៖ ផ្តើមដោយភេរវកម្មនៅព្រឹកថ្ងៃពុធទី ៧មករា ប្រឆាំងនឹងទស្សនាវដ្តីត្លុកកំប្លែង Charlie-Hebdo ដែលមានស្លាប់១២នាក់ ជាអ្នកកាសែតនិងប៉ូលិល រហូតដល់ការចាប់ជាចំណាប់ខ្មាំងនៅរសៀលថ្ងៃសុក្រក្នុងហាងទំនិញមួយរបស់ជនជាតិជីហ្វ។ ជាតុល្យការ មនុស្ស១៧នាក់បានស្លាប់ក្នុងហេតុការណ៍វាយប្រហារភេរវកម្មពីសំណាក់ភេរវជនសញ្ជាតិបារាំងបីនាក់ ដែលបានអះអាងបានទាក់ទងគ្នាកំណត់ម៉ោងបញ្ចេញសកម្មភាពឱ្យចំពេលគ្នា។នេះជាហេតុការណ៍ភេរវកម្មដ៏រន្ធត់មិនធ្លាប់មាននៅប្រទេសបារាំង តាំងពីនាទីដំបូង រហូតដល់ម៉ោងដែលប៉ូលិសសម្រេចសម្រុកវាយប្រហារលើភេរវជនបិទបញ្ចប់វិបត្តិចំណាប់ខ្មាំងនៅប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៣
ភេរវកម្ម
ហេតុការណ៍ដ៏រន្ធត់ចាប់ផ្តើមដំបូងឡើយ នៅថ្ងៃពុធទី ៧មករា វេលាម៉ោងប្រមាណ ១១និង៣០នាទី ព្រឹក ម៉ោងនៅប្រទេសបារាំង បុរសពីរនាក់ស្លៀកពាក់ខ្មៅ បិទមុខ ប្រដាប់ដោយអាវុធស្វ័យប្រវត្តិ បានសំរុកចូលក្នុងទីស្នាក់ការទស្សនាវដ្តី Charlie Hebdo -មានទីតាំងស្ថិតនៅកណ្តាលទីក្រុងប៉ារីស (ក្នុងសង្កាត់ទី ១១) ដែលក្រុមការិយាល័យនិពន្ធកំពុងជួបប្រជុំគ្នា ដោយស្រែកថា “អាឡា កាបារ”។ នៅក្នុង និងពេលរត់ចេញពីទីស្នាក់ការកាសែត ភេរវជនទាំងពីរ បានបាញ់សម្លាប់អស់ ១២នាក់ ជាអ្នកកាសែត ជាអ្នកគូររូបថ្លុកដ៏ល្បីល្បាញ ជាប៉ូលិសពីរនាក់ និងបង្កឱ្យមានអ្នករបួស ១១នាក់ ក្នុងនោះបួននាក់របួសធ្ងន់។ នេះជាភេរវកម្មដ៏ធ្ងន់ធ្ងរដែលបារាំងមិនធ្លាប់ជួបប្រទះឡើយ តាំងពីជាងកន្លះសតវត្សរ៍មក។
បន្ទាប់មក ភេរវជនទាំងពីរ បានរត់ឡើងឡានដោយសម្រួល ដោយឈាមត្រជាក់ សំដៅទិស(ខាងជើងឆៀងខាងកើត) ឦសានក្រុងប៉ារីស។ មកដល់ក្រវ៉ាត់ក្រុង ច្រក ប៉ង់តាំង ភេរវជនបានប្តូរឡាន ដោយទៅប្លន់យកពីអ្នកបើកបរម្នាក់។ បើតាមសាក្សី ភេរវជនបានស្រែកឱ្យនាំពាក្យទៅប្រាប់ប៉ូលិស ថាជាស្នាដៃពួកភេរវនិយមអាល់កៃដាយេមែន។
ប៉ូលិសបានកំណត់អត្តសញ្ញាណភេរវជន បានភ្លាម ព្រោះក្នុងចំណោមភេរវជនទាំងពីរនាក់ មានម្នាក់បានជ្រុះអត្តសញ្ញាបណ្ណនៅក្នុងឡានដំបូងរបស់ពួកគេ។ គឺជា បងប្អូនបង្កើតភេរវជន ស្ហេរីហ្វ និងសាអ៊ីដ គូហ្ស៊ី អាយុ ៣២ និង៣៤ឆ្នាំ កើតនៅប៉ារីស មានឪពុកម្តាយជាជនជាតិអាល់ហ្សេរី។ ស្ហេរីហ្វ ជាជនជីហាត ធ្លាប់ជាប់ទោសនៅឆ្នាំ២០០៨។
ការដេញប្រមាញ់
ក្នុងពេលដែលប៉ូលិសកំពុងតាមស្វែងចាប់ភេរវជនពីរនាក់បងប្អូន ស្រាប់តែនៅព្រឹកព្រលឹម ថ្ងៃព្រហស្បតិ៍ទី ៨មករា វេលាម៉ោងប្រមាណ៨ព្រឹក ការបាញ់រះមួយបានកើតឡើង ម្តងនេះ នៅភាគខាងត្បូងក្រុងប៉ារីស លើប៉ូលិសពីរនាក់ ដែលកំពុងធ្វើអន្តរាគមន៍ក្នុងគ្រោះថ្នាក់ចរាចរណ៍ធម្មតាមួយ។ ដោយត្រូវគ្រប់ចំកណ្តាលខ្នង ធ្ងន់ពេក ប៉ូលិសស្រី បានស្លាប់។ ខ្មាន់កាំភ្លើង ដែលបើតាមសាក្សី មានស្លៀកពាក់ខ្មៅ និងអាវការពារគ្រាប់ផង កាន់កាំភ្លើងស្វ័យប្រវត្តិ រត់គេចខ្លួនបាត់។ ប៉ូលិសបានដេញតាម និងបាត់ដាន នៅមាត់ច្រកចុះរថយន្តភ្លើងក្រោមដី ចម្ងាយប្រមាណបីគីឡូម៉ែត្រពីកន្លែងកើតហេតុ។ ភេរវកម្មនៅម៉ុងរ៉ូ ភាគខាងត្បូងក្រុងប៉ារីសនេះ មិនត្រូវបានភ្ជាប់នៅភេរកម្មប្រឆាំងទស្សនាវដ្តីស្ហាលីអិបដូទេ។
ម៉ោង១២ថ្ងៃត្រង់ ថ្ងៃ៨មករាដដែល បារាំងទាំងមូល បានសម្របខ្លួន គោរពវិញ្ញាណន្ធក្ខ ដល់ជនរងគ្រោះជាអ្នកកាសែត និងប៉ូលិស មួយនាទី។
ក្នុងពេលជាមួយគ្នានេះ គេក៏បានប្រទះឃើញដានបងប្អូនភេរវជន គូហ្ស៊ី ទៅប្លន់នៅហាងសាំងមួយ ចម្ងាយប្រមាណ៨០គ.ម. ពីប៉ារីស (ប៉ែកឦសាន)។ ម្ចាស់ហាង ដែលចាំមុខភេវជនច្បាស់បានបញ្ជាក់ថានៅក្នុងឡានជនជីហាត មានអាវុធរ៉ុកកែតផង។ ការស្វែងចាប់ ដោយកម្លាំងប៉ូលិស និងនគរបាលពិសេសប្រឆាំងភេរវកម្ម មានទាំងទ័ពថ្មើរជើង ឧទ្ធម្ភាគចក្រ បានផ្តុំព័ទ្ធតំបន់នោះ តែនៅតែមិនអាចរកឃើញជនទាំងពីរទៀត។ នៅវេលាម៉ោង ប្រមាណ១០ ទៅ ១១យប់ អាជ្ញាធរបានសម្រេចបញ្ចប់ប្រតិបត្តិការនេះ។ ភាពតានតឹងបានឡើងដល់កំរិតកំពូល វិទ្យុជីហាតប្រកាសថាជនទាំងពីរជាឥស្សរជនជីហាត ហើយគេក៏កាន់តែស្គាល់អត្តសញ្ញាណបានច្រើនជាងមុន ជនជីហាតជាបងប្រុសមានឈ្មោះក្នុងបញ្ជីខ្មៅអាមេរិក និងបានទៅហាត់ទាហាននៅប្រទេសយ៉េមែន កាលពីឆ្នាំ២០១១ ជាមួយពួកអាល់កៃដា។
នៅព្រឹកថ្ងៃសុក្រ ម៉ោងប្រមាណជា៨ទៅ៩ព្រឹក ជនទាំងពីរបានចេញពីកន្លែងលាក់ខ្លួន មកប្លន់យកឡានមួយទៀត។ ប៉ូលិសក៏បានចេញចាប់ភ្លាម ដាក់រនាំងបាំងផ្លូវ ប្រទះគ្នាជាមួយភេរវជនពីរនាក់បងប្អូន បាញ់តគ្នាមួយប្រាវធំ។ បើរដ្ឋអាជ្ញា សាអ៊ីត បានត្រូវរបួសនៅក។ ហើយជនទាំងពីរក៏បានរត់ចូលទៅសំងំលាក់ខ្លួន នៅក្នុងរោងពុម្ពមួយក្បែរនោះ ក្នុងភូមិ Dammartin-en-Goële ចាប់ថៅកែរោងពុម្ពជាចំណាប់ខ្មាំង មុននឹងលែងទៅវិញ។ កងកម្លាំងប៉ូលិស នគរបាលបានឡោមព័ទ្ធរោងពុម្ព និងប្រុងប្រយ័ត្នខ្លាំង ព្រោះគិតថាមានចំណាប់ខ្មាំងម្នាក់ទៀតនៅក្នុងដៃភេរវជន។ តែតាមការពិត បុគ្គលិកម្នាក់នោះ ពេលឮសំឡេងផ្ទុះក៏បានរត់ឡើងទៅជាន់លើ និងបានរត់ទៅពួនក្នុងទូរ ក្រោមកន្លែងលាងចាន រយៈពេល៨ម៉ោង និងបានផ្តល់ព័ត៌មានហូរហែដល់ភ្នាក់ងារប៉ូលិសនៅខាងក្រៅ។
ការបិទបញ្ចប់វិបត្តិចំណាប់ខ្មាំងក្នុងថ្លុកឈាម
ក្នុងពេលនោះ ក្រុមស៊ើបអង្កេតបានរកឃើញថាភេរវជនពីរនាក់បងប្អូន និងភេរវជននៅម៉ុងរ៉ូ ធ្លាប់ស្គាល់គ្នា។ ប៉ូលិសប្រឆាំងភេរវកម្ម បានសាកល្បងផ្តើមចរចា ដោយផ្ញើសាទៅជនសង្ស័យទាំងពីរ នៅវេលាម៉ោង ប្រមាណ១១និង៤៥នាទី ប៉ុន្តែគ្មានចម្លើយ។ អាជ្ញាធរក៏ស្ងាត់គ្មានចេញសេចក្តីថ្លែងការណ៍អ្វី ស្រាប់តែនៅវេលាម៉ោងប្រហែលមួយរសៀល បុរសម្នាក់ កាន់កាំភ្លើងពីរដើម ស្ទុះចូលទៅបាញ់រះនៅក្នុងហាងទំនិញជ្វីហ្វ ភាគខាងកើតក្រុងប៉ារីស បង្កឱ្យមានមនុស្សយ៉ាងហោចណាស់បីនាក់ស្លាប់ និងអតិថិជនជាច្រើននាក់ បានធ្លាក់ខ្លួនជាចំណាប់ខ្មាំង។ ខ្មាន់កាំភ្លើង ដែលគ្មាននរណាក្រៅពីភេរវជន ដែលបានបាញ់សម្លាប់ប៉ូលិសនៅMontrougeភាគខាងត្បូងប៉ារីសពីម្សិលឡើយ។
រសៀលថ្ងៃសុក្រទី ៩មករា បារាំងត្រូវប្រឈមមុខនឹងសមរភូមិភេរវកម្ម ចំណាប់ខ្មាំងពីរកន្លែង ៖ Dammartin-en-Goële ភាគឦសានប៉ារីស និងនៅខាងកើតក្រុងច្រក Porte de Vincennes។ ម៉ោងជិត៥ល្ងាច សំឡេងផ្ទុះបានលាន់ឮនៅ Dammartin-en-Goële ភេរវជនបងប្អូនគូហ្ស៊ី បានកាន់កាំភ្លើងបាញ់សម្រុក ចេញវាយប្រហារមុន ទើបប៉ូលិសក៏បាញ់តប សម្លាប់ជនទាំងពីរនៅហ្នឹងកន្លែង។ ហើយគឺ ស្ទើរក្នុងពេលទន្ទឹមគ្នាតែម្តង ក៏មានការវាយលុកនៅ Porte de Vincennes ទ្វារហាងបានបង្ហើបបន្តិចៗម្តងៗ ប៉ូលិសសាកល្បងសម្រុកចូល គូលីបាលី បានបាញ់រះមកលើកម្លាំងប៉ូលិស ដោយគ្មានញញើត ប៉ូលិសក៏បាញ់តបវិញយ៉ាងសន្ធឹកសន្ធាប់ រហូតដល់ភេរវជនស្លាប់ ទើបនាំគ្នាចូលក្នុងហាង រំដោះចំណាប់ខ្មាំងជាច្រើននាក់ឱ្យរត់ចេញប្រញាយពីកន្លែងលាក់ខ្លួន។ ជាសំណាងអាក្រក់ នៅប៉ារីស មានចំណាប់ខ្មាំងបួននាក់បានស្លាប់ ទំនងដោយស្នាដៃភេរវជន គូលីបាលី ពេលចូលបាញ់ក្នុងហាងភ្លាម និងមានរបួសបួននាក់ ក្នុងនោះក៏មានប៉ូលិសដែរ។
ម៉ោង ៥និង១៥នាទី វិបត្តិចំណាប់ខ្មាំងនៅប៉ារីស ត្រូវបញ្ចប់ ភេរវជនទាំងបី បានត្រូវសម្លាប់ ប៉ុន្តែ បារាំងនៅតែប្រឈមនឹងគ្រោះគំរាមកំហែងភេរវកម្មដដែល នេះបើតាមប្រសាសន៍របស់លោកប្រធានាធិបតី ហ្វ្រង់ស័រហូឡង់ នៅល្ងាចមិញ។ ម្យ៉ាងវិញទៀត នៅពេលនេះ ប៉ូលិសបានសម្រេចផ្សព្វផ្សាយស្វែងរកជនសង្ស័យម្នាក់ទៀត គឺនាងអាយ៉ាត ប៊ូមេដឌីយៀន Hayat Boumeddiene អាយុ២៦ឆ្នាំជាប្រពន្ធ តាមបែបសាសនារបស់គូលីបាលី ភេរវជនបាញ់ប៉ូលិសនៅភាគខាងត្បូង និងបាញ់ហាងជ្វីហ្វនៅភាគខាងកើតក្រុងប៉ារីស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ