បារាំង ៖ ក្រោយការឧទ្ទិស តើអ្វីជាការប្រយុទ្ធប្រឆាំងភេរវកម្មជីហាត ?
ចុះផ្សាយនៅថ្ងៃ៖
ស្តាប់ - ០៦:១១
ការប្រមូលផ្តុំ ការរួបរួមជាតិ ឆន្ទៈការពារគោលការណ៍សេរីភាព បានរស់ឡើងវិញជាថ្មីនៅថ្ងៃអាទិត្យម្សិលមិញ តាមរយៈការប្រមូលផ្តុំធ្វើបាតុកម្ម បដិសេធអំពើភេរវកម្មដែលមានពលរដ្ឋជិតបួនលាននាក់ចូលរួម និង ប្រមុខរដ្ឋ ប្រមុខរដ្ឋាភិបាល មកពី ជិត៥០ប្រទេស ដៃក្នុងដៃ ដង្ហែក្បួនក្នុងផ្លូវប៉ារីស។ ប៉ុន្តែទន្ទឹមនឹងក្តីរន្ធត់ ឧទ្ទិសដល់ដល់ជនរងគ្រោះ១៧នាក់ស្លាប់ព្រោះគ្រាប់កាំភ្លើងភេរវជន ដល់វេលាដែលត្រូវបញ្ចេញសកម្មភាព និងរកដំណោះស្រាយ។ ប្រធានាធិបតីបានបើកប្រជុំជាបន្ទាន់សាជាថ្មី ផ្តោតលើសន្តិសុខផ្ទៃក្នុង និងប្រកាសរក្សាកម្រិតអាសន្នភេរវកម្មខ្ពស់ជាអតិបរិមាដដែល។
វីដេអូ ប្រវែង ៧នាទី ត្រូវបានផ្សព្វផ្សាយនៅព្រឹកថ្ងៃអាទិត្យទី ១១មករា លើអ៊ីនធ័រនែត មុននឹងត្រូវបានលុបដកចេញទៅវិញ។ គេមិនដឹងថាតើវីដេអូនេះ ត្រូវបានបង្ហោះផ្សាយចេញពីបារាំង ឬពីប្រទេសផ្សេងទេ។ អ្នកអង្កេតកំពុងវិភាគដើម្បីបញ្ជាក់អំពីភាពពិត អំពីប្រភព និងអំពីអ្នកផុសវីដេអូ ដែលទំនងជាថតក្រោយភេរវកម្មប្រឆាំងនឹងទស្សនាវដ្តីCharlie-Hebdo និងភេរវកម្មបាញ់សម្លាប់ប៉ូលិសនៅភាគខាងត្បូងប៉ារីសមួយថ្ងៃបន្ទាប់។
នៅក្នុងវីដេអូនោះ គេឃើញ ភេរវជនគូលីបាលី រៀបរាប់អំពីមូលហេតុនិងសកម្មភាពភេរវកម្ម ប្រកាសខ្លួនជាក្រុមអង្គការរដ្ឋអ៊ីស្លាម មានពាក់ខោអាវជាយុទ្ធជន ជួតក្បាល នៅមុខទង់រដ្ឋអ៊ីស្លាម។ ភេរវជនគូលីបាលី ថាអះអាងសហការជាមួយភេរវជនពីរនាក់បងប្អូនគូហ្ស៊ី ដោយបំបែកជាពីរក្រុម ធ្វើការរួមគ្នាខ្លះ ដាច់ពីគ្នាខ្លះ ម្ខាងទៅសម្លាប់អ្នកកាសែត Charlie-Hebdo ម្នាក់ទៅវាយប្រហារប៉ូលិស ធ្វើយ៉ាងណាបង្កគ្រោះថ្នាក់ឱ្យបានធំបំផុត និងសាកល្បងតម្រូវម៉ោងបញ្ចេញសកម្មភាពឱ្យស៊ីពេលគ្នា។
ជាវីដេអូដែលមានជាវគ្គៗ បញ្ជាក់យ៉ាងលម្អិតពីសកម្មភាពធ្វើភេរវកម្ម។ ហើយក្រៅអំពីមានប្លង់បង្ហាញរូបភេរវជនគូលីបាលីខុសគ្នា អ្វីដែលគួរឱ្យចាប់អារម្មណ៍កាន់តែខ្លាំងនោះ គឺសំឡេងខ្សាវៗលើផ្ទៃខ្មៅ ជាស្នូរផ្ទុះ ជាសូរសៀងអ្នកកាសែតរបស់វិទ្យុឬទូរទស្សន៍និយាយរៀបរាប់ព្រឹត្តិការណ៍ចាប់ចំណាប់ខ្មាំងនៅប៉ារីសកាលពីថ្ងៃសុក្រ មានសំណួរ និង សេចក្តី អត្ថាធិប្បាយសរសរដែលជាចម្លើយរបស់គូលីបាលី។ នេះមានន័យថា មានអ្នកសមគំនិត យ៉ាងហោចណាស់ក៏ម្នាក់កំពុងលាក់ខ្លួននៅទីណាមួយ ជួយកាត់ត ដំឡើងរូបភាព បញ្ជូលសំឡេងមុននឹងបង្ហោះផ្សាយលើអ៊ីនធ័រនែត ក្រោយការស្លាប់របស់ភេរវជនគូលីបាលី និងជាអ្វីដែលប៉ូលិសបារាំងកំពុងចង់ដឹងខ្លាំង។
សាក្សីជាចំណាប់ខ្មាំង ម្នាក់ បានរៀបរាប់ថា នៅពេលចូលវាយប្រហារហាងទំនិញ ភេរវជនគូលីបាលី មានម៉ាស៊ីនថតវីដេអូ Go-pro និងកុំព្យូទ័រមួយ។ ភេរវជនរូបនោះបានបើប្រើកុំព្យូទ័រម្តង ប៉ុន្តែគេមិនដឹងថាវីដេអូនោះនិងវីដេអូផ្សាយលើអ៊ីនធ័រនែតជារូបតែមួយឬយ៉ាងណាទេ។ អ្នកអង្កេតកំពុងវិភាគ។
វិធានការរក្សាសន្តិសុខផ្ទៃក្នុង
គំរាមកំហែងភេរវកម្មនៅប្រទេសបារាំងមិនមែនចប់ត្រឹមសម្លាប់ភេរវជនបីនាក់នេះទេ។ នាយករដ្ឋមន្ត្រី បានអះអាងជាច្រើនលើកច្រើនសា ថាបារាំងនៅតែប្រឈមខ្ពស់បំផុតនឹងការគំរាមកំហែងភេរវកម្ម។ ហេតុដូច្នេះហើយបានជារដ្ឋាភិបាលបារាំងសម្រេចរក្សាកម្រិតអាសន្នភេរវកម្មខ្ពស់ជាអតិបរិមាដដែល ដើម្បីរក្សាសន្តិសុខជាតិ និងពង្រឹងការប្រយុទ្ធប្រឆាំងភេរវកម្ម ដោយបង្កើនចំនួនទាហាន។ នាយករដ្ឋមន្ត្រី រដ្ឋមន្ត្រីក្រសួងមហាផ្ទៃ យុត្តិធម៌ និងភ្នាក់ងារសន្តិសុខ បានជួបប្រជុំជាថ្មីនៅព្រឹកថ្ងៃចន្ទទី ១២នេះ ក្រោមការដឹកនាំរបស់លោកហ្វ្រង់ស័រហូឡង់ ដោយចេញនូវវិធានការមួយចំនួន។
ទាហានមួយម៉ឺននាក់នឹងត្រូវដាក់ពង្រាយនៅពេលផ្ទៃប្រទេស ត្រង់ចំណុច ទីតាំង មណ្ឌល ឬស្ថាប័នសំខាន់ៗ រសើបៗ។ ប៉ូលិសនិងនគរបាលជាង៤៧០០នាក់ នឹងត្រូវប្រមូលផ្តុំចាប់ពីថ្ងៃនេះតែម្តងទៅការពារវិហារ សាលារៀនជ្វីហ្វ។ តួនាទីមេប៉ូលិសទទួលបន្ទុកសហប្រតិបត្តិការសន្តិសុខសហគមន៍ជ្វីហ្វទើបត្រូវបានតែងតាំង។
ពេលនេះ ជាងពេលណាៗ ទាំងអស់ ដែលអំណាចប្រតិបត្តិត្រូវសើរើត្រួតពិនិត្យនិងធ្វើតុល្យការការងារ ថាពិតជាមានប្រហែសប្រហោងក្នុងចំណាត់ការតាមដានពួកភេរវជនជ្រុលនិយមដូចយ៉ាង ភេរវជនបងប្អូនគូហ្ស៊ី ឬគូលីបាលីមែនយ៉ាងណា។ ព្រោះសូមបញ្ជាក់ថា គូលីបាលី ថ្វីបើមានប្រវត្តិគួរឱ្យសង្ស័យខ្លាំង ធ្លាប់ត្រូវបានតុលាការកាត់ទោស ធា្លប់ជាប់ពាក់ព័ន្ធនឹងការពង្រត់អ្នកទោសភេរវកម្ម បានផ្តាច់ខ្លួនធ្វើជាជនជ្រុលនិយម ជាមួយភេរវជនស្ហេរី គួហ្ស៊ី ប៉ុន្តែបែរជាត្រូវរំលងពីភ្នែកភ្នាក់ងារប្រឆាំងភេរវកម្មទៅវិញ។ ក្នុងន័យនេះ នាយករដ្ឋមន្ត្រីចង់ធ្វើឱ្យប្រសើរឡើងប្រព័ន្ធលបស្តាប់ និងផ្តាច់ខ្លួនអ្នកទោសភេរវនិយមឱ្យនៅដាច់ឯកាពីគេឯង។ គណៈកម្មការអង្កេតសភាអាចនឹងត្រូវបង្កើតឡើង ដើម្បីឱ្យបក្សប្រឆាំងក៏អាចចូលសហការជាមួយដោយពេញលេញ ព្រមទាំងការត្រួតពិនិត្យលើអ៊ីនធ័រនែត។ល។ និង។ល។ ដើម្បីបញ្ចៀសការផ្សព្វផ្សាយអ៊ីស្លាមជ្រុលនិយមផង និងដើម្បីបញ្ចៀសការស្អប់ខ្ពើមអ៊ីស្លាមផង។
ចលនាប្រឆាំងអ៊ីស្លាមអាចទាញប្រយោជន៍ពីភេរវកម្មជីហាតនៅប៉ារីស
ភេរវកម្មបីថ្ងៃនៅក្រុងប៉ារីស បានបំផុសបំផុលមតិសាធារណៈឱ្យចេះរួបរួមគ្នា ឱ្យងើបឈរឡើងការពារគោលការណ៍សេរីភាព។ ការដង្ហែក្បួននៅក្រុងប៉ារីសម្សិលមិញ ដែលគ្រោងរៀបចំដំបូងឡើង ដើម្បីឧទ្ទិសដល់វិញ្ញណក្ខន្ធជនរងគ្រោះជាអ្នកកាសែត Charlie-Hebdo និងប៉ូលិស ដែលបានបាត់បង់ជីវិតព្រោះសេរីភាពនៃការមតិ បានកា្លយជាចលនា ជាសន្ទុះការពារសេរីភាពជាទូទៅ ប្រឆាំងនឹងអំពើភេរវកម្ម។ បាតុកម្មបានប្រព្រឹត្តទៅក្នុងអត្ថន័យផ្តល់សារនៃក្តីស្រលាញ់ និងរួមរស់ជាមួយគ្នាដោយគ្មានការស្អប់ខ្ពើម រើងអើង ប្រកាន់ពូជសាសន៍ ឬសាសនាអ្វីទាំងអស់។
ប៉ុន្តែគួរឱ្យសោកស្តាយ នៅអាល្លឺម៉ង់ និងនៅន័រវេសវិញ ចលនាប្រឆាំងនឹងអ៊ីស្លាម ហាក់ដូចជាកំពុងចង់យកចំណេញនយោបាយពីសោកនាដកម្មនៅប៉ារីសនេះ ដោយគ្រោងនឹងរៀបចំបាតុកម្មធំមួយនៅល្ងាចថ្ងៃចន្ទនេះ ដើម្បីឧទ្ទិសដល់វិញ្ញាណក្ខន្ធជនរងគ្រោះនៅប៉ារីស ប៉ុន្តែមិនខ្លាចនឹងបរិហារថានេះអ៊ីស្លាមមិនស៊ី ប្រជាធិបតេយ្យទេ។ សូមបញ្ជាក់ថា តាំងពី១២សប្តាហ៍មកហើយ ដែលចលនាប្រឆាំងអ៊ីស្លាមអាល្លឺម៉ង់ Pegida បានប្រមូលផ្តុំគ្នាជារៀងរាល់ថ្ងៃចន្ទ ដើម្បីប្រឆាំងនឹងអ៊ីស្លាម ប្រឆាំងនឹងអ្នកសុំសិទ្ធជ្រកកោន។ ចំនួនអ្នកចូលរួមបានកើនជាលំដាប់ តាំងពី៥០០នាក់ នៅក្នុងបាតុកម្មលើកដំបូង នៅល្ងាចនេះ អ្នករៀបចំកម្មវិធី អួតថានឹងមានមនុស្សចូលរួមដល់ទៅ២ម៉ឺននាក់។ ជាងនេះទៅទៀត ចលនានេះ ហាក់ដូចជាកំពុងក្លាយជាជំងឺឆ្លង ៖ ឆ្លងពីក្រុងមួយទៅក្រុងមួយ ឥឡូវឆ្លងទៅដល់ប្រទេសន័រវែស។ ចលនានៅទីនោះក៏ត្រៀមយកគំរូតាមចលនាប៉េហ្គីដា។ ចង់ឬមិនចង់ ភេរវកម្មនៅប៉ារីស ពិតជានឹងធ្វើឱ្យចលនាប្រឆាំងអ៊ីស្លាម មានឥទ្ធិពលខ្លាំងជាងមុន មិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ