ក្បួនប្រឆាំងនឹងភេរវកម្ម នៅប៉ារីស ប្រមូលផ្តុំគ្នាបានជាងមួយលាននាក់
ប៉ារីសរដ្ឋធានីរបស់ពិភពលោកប្រឆាំងនឹងភេរវកម្ម ! ជាការប្រមូលផ្តុំជាប្រវត្តិសាស្ត្រ ! នៅរសៀលថ្ងៃអាទិត្យទី ១១ មករា នេះ ក្រុងប៉ារីស បានគ្រប់ដណ្តប់ទៅដោយហ្វូងមនុស្ស វាល់លាននាក់ ដែលបានសន្មត់មកជួបគ្នាដើរដង្ហែក្បួន បរិហារប្រឆាំងនឹងអំពើភេរវកម្ម អំពើឃោរឃៅសម្លាប់មនុស្ស និងដើម្បីការពារសេរីភាព ! ជាប្រធានាធិបតី ជាប្រមុខរដ្ឋ ជាប្រមុខរដ្ឋាភិបាល ជាអ្នកនយោបាយ អ្នកការទូត តំណាងសាសនា ជាគ្រួសារជនរងគ្រោះ ឬជាពលរដ្ឋសាមញ្ញ បានចូលរួមដង្ហែក្បួន ក្នុងស្មារតីតែមួយ សម្តែងសាមគ្គីភាពជាមួយបារាំង ជាមួយគ្រួសារជនរងគ្រោះ និងដើម្បីការពារ សេរីភាព លទ្ធិប្រជាធិបតេយ្យ។ ពលរដ្ឋខ្មែរដែលរស់នៅក្នុងប្រទេសបារាំង ក៏បានចូលរួមដើរដង្ហែក្បួនជាប្រវត្តិសាស្ត្រនេះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ត្រៀបត្រា ណែនណាំតាន់តាប់ដោយហ្វូងមនុស្ស ស្ទើរគ្មានសល់ចន្លោះដីក្រុងប៉ារីសទេ នារសៀលថ្ងៃអាទិត្យទី ១១មករា។ មនុស្សម្នាប្រមាណមួយលាននាក់កន្លះ បានឆ្លើយតបទៅនឹងការអំពាវនាវមកដើរដង្ហែក្បួនអន្តរជាតិ ដើម្បីការរួបរួមជាធ្លុងមួយ ប្រឆាំងនឹងអំពើភេរវកម្ម គ្មានឡើយការរើសអើង ជាតិសាសន៍ សាសនា ពណ៌សម្បុរ។ គ្មានទេជ័យឃោស គ្មានទេបដា មានតែការដើរដង្ហែក្បួន ដោយស្ងប់ស្ងាត់ និងយូរៗម្តងគេឮស្នូទះដៃ។ គ្រិស្តសាសនា ជ្វីហ្វ អ៊ីស្លាម ព្រះពុទ្ធសាសនា និងគ្រប់សហគមន៍ ដោយការស្ម័គ្រចិត្ត បានបង្ហាញមុខរួមគ្នា នៅទីក្រុងប៉ារីស។ ព្រះចៅអធិការវត្តចន្ទរង្សី នៅប្រទេសបារាំង ក៏មានវត្តមានក្នុងហ្វូងមហាជនដែរ។
នាំមុខដោយព្រះសង្ឃជាច្រើនអង្គ មកពីទីវត្តផ្សេងៗគ្នានៃតំបន់ប៉ារីស បណ្តាជនខ្មែរ ជាជនសាមញ្ញ ជាច្រើននាក់ ខ្លះមិនអាចទាំងរុលចូលក្នុងជួបក្បួនដង្ហែបានផង ដោយសារការកកស្ទះនិងមនុស្សច្រើនពេក ខ្លះក៏បានទៅរង់ចាំក្បួនដង្ហែសាធារណរដ្ឋ ជាមុននៅទីលានជាតិ Nation តែម្តង។
បដិសេធអំពើឃោរឃៅសម្លាប់មនុស្ស បង្ហាញឆន្ទៈ សាមគ្គីភាព និងការពារសេរីភាព ! នេះហើយជាស្មារតីរបស់ក្បួនមហាជន។ ក្នុងនាមពុទ្ធសាសនិកម្នាក់ មានដើមកំណើតខ្មែរ បានរស់សុខសាន្តលើទឹកដីបារាំង បាតុករខ្មែរមានអារម្មណ៍ថាមិនអាចមិនឈឺឆ្អាលជាមួយបារាំងមិនបានឡើយ។
ប្រមុខរដ្ឋប្រមុខរដ្ឋាភិបាលមកពីគ្រប់ជ្រុងនៃពិភពលោក ត្រូវបានបំបែកខ្លួនចេញពីក្បួនក្រោយពីដើរបានជិតមួយម៉ោង ប៉ុន្តែហ្វូងមហាជនដែលបើតាមការប៉ាន់ស្មានអាចមានចំនួនដល់ទៅជិតពីរលាននាក់ផង នៅទីក្រុងប៉ារីស បន្តស្ថិតនៅទីលានRépubliqueនិង Nationរហូតដល់យប់ជ្រៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ