ភេរវកម្មនៅប៉ារីស៖ ជនសង្ស័យទី៤ទំនងជាបានចេញពីបារាំងទៅដល់ស៊ីរី
ស្របពេលជាមួយនឹងការកាន់ទុក្ខ ការបង្ហាញពីការរួបរួម និងការមិនចុះញ៉មចំពោះមុខភេរវជនអ៊ីស្លាមជ្រុលនិយម ដំណើរការស៊ើបអង្កេតទៅលើភេរវកម្មនៅប៉ារីស នៅតែកំពុងបន្តធ្វើយ៉ាងដុតដៃដុតជើង។ អាជ្ញាធរនៅតែបន្តតាមស្វែងរកចាប់ខ្លួនជនសង្ស័យម្នាក់ទៀត ដែលជាជនសង្ស័យទី៤ ជាប់ពាក់ព័ន្ធក្នុងអំពើភេរវកម្មនេះ។ ក៏ប៉ុន្តែ យោងតាមប្រភពពីប៉ូលិស ជនសង្ស័យរូបនេះទំនងជាបានចេញពីប្រទេសបារាំងទៅដល់ទឹកដីស៊ីរីហើយនៅពេលនេះ។
ចុះផ្សាយនៅថ្ងៃ៖
ស្តាប់ - ០១:៥១
ជនសង្ស័យទី៤ ដែលប៉ូលិសបារាំងកំពុងតែស្វែងរកចាប់ខ្លួនយ៉ាងសកម្មនេះ គឺមានឈ្មោះថា Hayat Boumeddiene ត្រូវជាប្រពន្ធរបស់ Amedy Coulibaly ភេរវជនដែលបានបាញ់ប្រហារលើប៉ូលិស និងចាប់ចំណាប់ខ្មាំងនៅក្នុងហាងលក់ទំនិញជ្វីហ្វ មុននឹងត្រូវប៉ូលិសបាញ់សម្លាប់ ក្នុងប្រតិបត្តិការរំដោះចំណាប់ខ្មាំង កាលពីថ្ងៃសុក្រ។
ប្រភពពីប៉ូលិសបារាំងបានប្រាប់ទីភ្នាក់ងារព័ត៌មាន AFP ថា ស្រ្តីវ័យ ២៦ឆ្នាំរូបនេះបានធ្វើដំណើរតាមយន្តហោះចេញពីទីក្រុងម៉ាឌ្រីដ ប្រទេសអេស្ប៉ាញ ឆ្ពោះទៅកាន់ទីក្រុងអ៊ីស្តង់ប៊ុលប្រទេសតួកគី កាលពីថ្ងៃទី២មករា ពោលគឺតាំងពី៥ថ្ងៃមុនពេលមានភេរវកម្មនៅប៉ារីស។
ប្រភពពីអាជ្ញាធរតួកគីវិញបានឲ្យដឹងថា គេឃើញស្រ្តីកាន់លិខិតឆ្លងដែនឈ្មោះ Hayat Boumeddiene នេះ ធ្វើដំណើរឆ្លងកាត់ព្រំដែនគោក ចេញពីប្រទេសតួកគី ចូលទៅក្នុងទឹកដីស៊ីរី កាលពីថ្ងៃទី៨ ពោលគឺ នៅចំថ្ងៃដែល Amedy Coulibaly ធ្វើការបាញ់ប្រហារទៅលើប៉ូលិសនៅភាគខាងត្បូងប៉ារីស និងមួយថ្ងៃក្រោយការវាយប្រហារទៅលើសារព័ត៌មាន Charlie Hebdo។
អាជ្ញាធរតួកគីបានអះអាងថា គេមិនបានចាប់ខ្លួន Hayat Boumeddiene ដោយសារតែមិនបានទទួលដំណឹងជាមុនថា ស្រ្តីរូបនេះមានជាប់សង្ស័យនឹងការវាយប្រហារភេរវកម្មនៅប៉ារីស។ នៅពេលដែលបារាំងកំណត់បាននូវមុខសញ្ញាជនសង្ស័យនេះ Hayat Boumeddiene បានឆ្លងព្រំដែនចេញពីតួកគី ទៅដល់ប្រទេសស៊ីរីទៅហើយ។
ប្រសិនបើ Hayat Boumeddiene ពិតជាបានចេញពីប្រទេសបារាំងតាំងពីថ្ងៃទី២មករា ដូចការអះអាងពីប្រភពព័ត៌មានទាំងនេះមែន នេះបញ្ជាក់ថា ជនសង្ស័យរូបនេះមិនបានចូលរួមក្នុងប្រតិបត្តិការវាយប្រហារភេរវកម្មនៅក្នុងទីក្រុងប៉ារីសនោះទេ។ ក៏ប៉ុន្តែ នេះក៏មិនមែនមានន័យថា ស្រ្តីរូបនេះមិនជាប់ពាក់ព័ន្ធក្នុងការរៀបចំគម្រោងការណ៍វាយប្រហារនេះដែរ។ ហេតុដូច្នេះហើយបានជាមកទល់នឹងពេលនេះ ប៉ូលិសបារាំងនៅតែបន្តតាមរកចាប់ខ្លួន Hayat Boumeddiene៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ