នាវាផ្ទុកយន្តហោះបារាំងនឹងចេញបេសកកម្មនៅតំបន់ឈូងសមុទ្ទពែក្សនិងមហាសមុទ្ទឥណ្ឌា
Charles de Gaulle នាវាផ្ទុកយន្តហោះបារាំងបានបញ្ឆេះម៉ាស៊ីន ដើម្បីត្រៀមបើកចេញពីកំពង់ផែបារាំង ភាគខាងត្បូង នៅថ្ងៃអង្គារទី ១៣មករា២០១៥ ដើម្បីឆ្ពោះទៅតំបន់ឈូងសមុទ្ទពែក្ស និងមហាសមុទ្ទឥណ្ឌា ដើម្បីត្រៀមខ្លួន ចូលបំពេញបេសកកម្ម ប្រយុទ្ធប្រឆាំងនឹងពួកជីហាតរដ្ឋអ៊ីស្លាមនៅអ៊ីរ៉ាក់ ប្រសិនបើស្ថានការណ៍តម្រូវ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការបញ្ជូននាវាផ្ទុកយន្តហោះCharles de Gaulle ដ៏ទំនើប ទៅកាន់តំបន់ជាយុទ្ធសាស្ត្រ ភាគខាងជើងមហាសមុទ្ទឥណ្ឌា ក្នុងលក្ខណៈត្រៀមចេញធ្វើប្រតិបត្តិ ត្រូវបានគ្រោងទុកជាយូរខែមកហើយ មិនមែនដោយសារហេតុផលភេរវកម្មនៅក្រុងប៉ារីសទេ។
បារាំងពុំទាន់បានសម្រេចចូលធ្វើយុទ្ធនាការនៅអ៊ីរ៉ាក់ទេ ប៉ុន្តែCharles De Gaulle មិនច្រានចោលទាំងស្រុងការចូលរួមចំណែកវាយប្រហារផ្លូវអាកាស ដែលសម្ព័ន្ធអន្តរជាតិជាង៣០ប្រទេសដឹកនាំដោយសហរដ្ឋអាមេរិក កំពុងធ្វើប្រឆាំងនឹងពួកជីហាតអង្គការរដ្ឋអ៊ីស្លាមទេ។ នេះបើតាមសេចក្តីថ្លែងការណ៍របស់សេនាធិការដ្ឋានបារាំង។
ជាមួយនាវា Charles de Gaulle ឧបករណ៍យោធាប្រកបដោយយុទ្ធសាស្ត្រ គេអាចសម្របប្តូរផ្លាស់វិធានការ និងកម្មវិធី ទៅតាមការវិវឌ្ឍន៍នៃវិបត្តិ ទៅតាមសេចក្តីការរបស់សម្ព័ន្ធមិត្ត បានយ៉ាងឆាប់រហ័សឱ្យតែមានការសម្រេចពីថា្នក់ដឹកនាំនយោបាយ។ នាវាCharles de Gaulle មានផ្ទុកយន្តហោះចម្បាំង១២គ្រឿង យន្តហោះប្រដេញ៩គ្រឿង យន្តហោះចុះលើទឹកមួយគ្រឿង និងឧទ្ធម្ភាគចក្របួនគ្រឿង ព្រមទាំងភ្ជាប់ដោយនាវាចម្បាំងធុនមធ្យមមួយគ្រឿង នាវាមុជទឹកនុយក្លេអ៊ែរមួយគ្រឿង នាវាចាក់ប្រេងមួយគ្រឿង។
លោកប្រធានាធិបតីបារាំង ហ្វ្រង់ស័រ ហូឡង់ ត្រូវលម្អិតអំពីបេសកកម្មរបស់Charles de Gaulle នៅរសៀលថ្ងៃពុធ នាឱកាសថ្លែងសារជូនពរប្រចាំឆ្នាំដល់កងទ័ព។
បារាំងដែលបានចេញធ្វើប្រតិបត្តិការតែផ្លូវអាកាសប្រឆាំងនឹងអង្គការរដ្ឋអ៊ីស្លាមនៅអ៊ីរ៉ាក់ មានបញ្ឈរយន្តហោះ Rafale ៩គ្រឿងនៅប្រទេសអារ៉ាប់រួម យន្តហោះប្រដេញនិងទម្លាក់គ្រាប់បែក៦គ្រឿងនៅហ្ស័កដានី ដោយមិនរាប់យន្តហោះចាក់សាំង យន្តហោះចុះលើទឹកដែលកំពុងធ្វើការជាមួយអាមេរិកផង។
នាវា នឹងទៅធ្វើសមយុទ្ធយោធាលើផ្ទៃសមុទ្ទ ក្បែរឆ្នេរឥណ្ឌា ដែលជាអតិថិជនដ៏មានសក្តានុពល កំពុងចរចាយូរមកហើយចង់ទិញយន្តហោះប្រដេញ Rafale ពីបារាំងចំនួនប្រមាណ១២៦គ្រឿង។ បេសកកម្មលើកនេះមាននាវិកចូលរួមចំនួន២៦០០នាក់ ក្នុងនោះ២០០០នាក់ លើនាវាផ្ទុកយន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ