អាល្លឺម៉ង់ ៖ ក្រិកអាចដើរចេញពីតំបន់ចាយប្រាក់អឺរ៉ូ បើមិនចេះត្បិតត្បៀត
រដ្ឋាភិបាលអាល្លឺម៉ង់បានអះអាងនៅថ្ងៃអាទិត្យទី ៤ មករា នេះថា ក្រិកនឹងគោរពពាក្យសន្យា និងលក្ខខណ្ឌដាក់ដោយសហភាពអឺរ៉ុប និងអង្គការមូលនិធិរូបិយវត្ថុអន្តរជាតិ ជាថ្នូរនឹងផែនការជំនួយហិរញ្ញវត្ថុជួយសង្គ្រោះប្រទេសក្រិក បើទោះជាបីជាក្រិកនឹងមានរដ្ឋាភិបាលប្រសូតចេញពីបក្សណាក៏ដោយ។ ជាមួយនឹងសេចក្តីសង្ឃឹមនេះ អាល្លឺម៉ង់ តាមរយៈទំព័រទស្សនាវដ្តីDer Spiegel បានព្រលយពាក្យអំពីលទ្ធភាពរុញច្រានក្រិកចេញពីតំបន់ចាយប្រាក់អឺរ៉ូតែម្តងផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
អ្នកនាំពាក្យរបស់លោកស្រីប្រមុខរដ្ឋាភិបាលអាល្លឺម៉ង់អង់ហ្គឺឡា មែរកិល បានអះអាងនៅថ្ងៃអាទិត្យនេះ ថា "ក្រិកធ្លាប់ប្រកាន់ពាក្យសន្យាក្នុងអតីតកាល ដូច្នេះទៅថ្ងៃមុខ ក្រិកក៏គង់តែនឹងបំពេញកាតព្វកិច្ច គោរពតាមសម្តីដែលបានសន្យាជាមួយមូលនិធិរូបិយវត្ថុអន្តរជាតិនិងសហភាពអឺរ៉ុបជាប្រាកដ បើទោះបីលទ្ធផលឆ្នោតសភាត្រូវធ្លាក់លើកណ្តាប់ដៃបក្សណាក៏ដោយ។
ក៏ប៉ុន្តែ អ្នកនាំពាក្យរដ្ឋាភិបាលអាល្លឺម៉ង់បានបដិសេធមិនធ្វើអត្ថាធិប្បាយអ្វីទាំងអស់ ទាក់ទងនឹងប្រសាសន៍របស់លោកស្រី មែរកិល ដែលចង់រុញច្រានក្រិកចេញពីតំបន់ចាយប្រាក់អឺរ៉ូតែម្តង បើក្រិកមិនគោរពតាមលក្ខខណ្ឌតម្រូវដោយអឺរ៉ុប។ កាលពីថ្ងៃសៅរ៍នៅទស្សនាវដ្តីអាល្លឺម៉ង់ លោកស្រីប្រមុខរដ្ឋាភិបាលអាល្លឺម៉ង់ បានពន្យល់ថា ប្រសិនបើរដ្ឋាភិបាលក្រិកថ្មី (ឆ្វេងនិយមជ្រុល) បោះបង់ផែនការរិតត្បិត នោះក្រិកត្រូវចេញពីតំបន់ចាយប្រាក់អឺរ៉ូ ដោយមិនអាចតវ៉ាបានឡើយ ! អឺរ៉ុបបាន បានត្រៀម និងមានលទ្ធភាពគ្រប់គ្រាន់សម្រាប់ប្រឈមនឹងវិបត្តិក្រិកដើរចេញពីអឺរ៉ូ ! គ្មានទៀតឡើយការឆ្លងដួលពីប្រទេសមួយទៅប្រទេសនៃតំបន់អឺរ៉ូ។
នេះមិនមែនជាលើកទីមួយទេ ដែលសេណារីយោក្រិកចេញពីតំបន់អឺរ៉ូត្រូវបានលើកឡើង តែពេលមុន អឺរ៉ុបមិនទាន់ធ្វើកំណែទម្រង់ អឺរ៉ុបតែងអបក្រិក ចាត់វិធានការស្រោចស្រង់ក្រិកម្តងជាពីរដង ដើម្បីការពារតំបន់អឺរ៉ូទាំងមូល តែពេលនេះជំនួយហិរញ្ញវត្ថុដល់ក្រិកលែងជាការចាំបាច់ទៀតហើយ។ ក្រិកអាចដើរចេញបាន។
បើតាមទស្សនាវដ្តី រដ្ឋាភិបាលអាល្លឺម៉ង់ ទាំងប្រមុខរដ្ឋាភិបាល ទាំងរដ្ឋមន្ត្រីក្រសួងហិរញ្ញវត្ថុ សុទ្ធតែមើលឃើញផ្លូវក្រិកដើរចេញពីតំបន់ចាយប្រាក់អឺរ៉ូទាំងអស់ បើគណបក្សស៊ីរីហ្សា ឈ្នះឆ្នោតនៅថ្ងៃទី ២៥មករា។ ប្រធានគណបក្សឆ្វេងនិយមជ្រុល ស៊ីរីហ្សា Syriza ដែលបានសន្យាសើរើផែនការសង្គ្រោះក្រិកឡើងវិញ កំពុងតែមានប្រជាប្រិយភាពនិងនាំមុខខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ