អង្គការសហប្រជាជាតិបរិហារពីផលវិបាកសង្គមកើតចេញពីនយោបាយត្បិតត្បៀតនៅក្រិក
នៅក្នុងប្រទេសក្រិក អង្គការសហប្រជាជាតិបានបើកការស៊ើបអង្កេតមួយក្នុងសប្តាហ៍នេះដើម្បីចង់ដឹងថា តើវិបត្តិសេដ្ឋកិច្ច និងការអនុវត្តន៍នយោបាយត្បិតត្បៀតរបស់រដ្ឋាភិបាលនំាឲ្យមានផលប៉ះពាល់ដល់ជីវភាពរស់នៅរបស់ប្រជាជនដែរ ឬទេ។ នៅថ្ងៃសៅរ៍ ទី២៧ មេសានេះ លទ្ធផលនៃការស៊ើបអង្កេតបានទាញសញ្ញាអាសន្នថា នយោបាយត្បិតត្បៀតរបស់រដ្ឋាភិបាលបានជះឥទ្ធិពលយ៉ាងអាក្រក់ដល់សង្គម ពិសេសបានធ្វើឲ្យបាត់បង់សិទ្ធិមួយចំនួនរបស់ប្រជាជនដែលធ្លាប់ទទួលមានពីពេលមុន។ យោងតាម ONU រដ្ឋាភិបាលទីក្រុងអាថែនគួរតែគិតគូរ ពិចារណាឡើងវិញអំពីបញ្ហានេះ។
ចុះផ្សាយនៅថ្ងៃ៖
ស្តាប់ - ០១:៥៤
ច្បាប់ទទួលបានជំនួយផ្នែកលំនៅដ្ឋាន ផ្នែកការងារ ឬមួយផ្នែកធានារ៉ាប់រងសុខភាព ទំាងនេះ សុទ្ធសឹងជាច្បាប់ដែលត្រូវបានរដ្ឋាភិបាលកាត់បន្ថយ ឬលុបចោលទំាងស្រុងតែម្តងនៅក្នុងនយោបាយត្បិតត្បៀតរបស់ខ្លួន នេះជាសេចក្តីសន្និដ្ឋាន ក្រោយបេសកកម្មស៊ើបអង្កេតរបស់អង្គការសហប្រជាជាតិនៅក្នុងប្រទេសក្រិក។ សេចក្តីសន្និដ្ឋានដដែលបានបង្ហាញថា ក្រិក គឺជាប្រទេសតែមួយគត់នៅក្នុងតំបន់ចាយប្រាក់អឺរ៉ូដែលនៅខ្វះខាតរចនាសម្ព័ន្ធផ្នែកជំនួយសង្គម និងផ្នែកធានារ៉ាប់រងសុខភាព។ ម្យ៉ាងទៀត ច្បាប់ទទួលបានប្រាក់ជំនួយសម្រាប់អ្នកអត់ការងារធ្វើក៏ត្រូវបានរដ្ឋាភិបាលកាត់បន្ថយមកនៅត្រឹមតែ ១២ខែប៉ុណ្ណោះ។ មួយវិញទៀត នៅពេលដែលអ្នកអត់ការងារធ្វើបានបាត់បង់សិទ្ធិក្នុងការទទួលប្រាក់ជំនួយហើយ រូបគេក៏បានបាត់បង់សិទ្ធិផ្នែកធានារ៉ាប់រងសុខភាពដែរ។
ក្រៅពីការកាត់បន្ថយ និងការបាត់បង់សិទ្ធិមួយចំនួនរបស់ប្រជាជន លទ្ធផលនៃការស៊ើបអង្កេតរបស់អង្គការសហប្រជាជាតិក៏បានបង្ហាញឲ្យឃើញពីផលប៉ះពាល់លើគោលការណ៍ស្មើភាពគ្នារវាងបុរស និងស្ត្រីដែរ ពិសេសគឺអំពើហិង្សាប្រកាន់ពូជសាសន៍ចំពោះជនអន្តោប្រវេស្តន៍ និងការអនុវត្តន៍វប្បធម៌និទណ្ឌភាព។ អ្នកឯកទេសអង្គការសហប្រជាជាតិបានឲ្យដឹងថា គោលដៅនៃការអនុវត្តន៍នយោបាយសន្សំសំចៃ គឺដើម្បីកាត់បន្ថយឱនភាពថវិកាជាតិ និងជួយផ្តល់សន្ទុះសេដ្ឋកិច្ចឲ្យមានការប្រកួតប្រជែង តែផ្ទុយទៅវិញ សេដ្ឋកិច្ចក្រិកនៅតែមានដំណើរថយក្រោយ ព្រមទំាងបានជះផលវិបាកលើសង្គមយ៉ាងខ្លំាងក្លាទៅវិញ។
ទន្ទឹមគ្នានេះ សេចក្តីសន្និដ្ឋានរបស់អង្គការសហប្រជាជាតិក៏បានសម្តែងក្តីបារម្ភចំពោះគោលនយោបាយរបស់រដ្ឋាភិបាលក្នុងការបន្តដាក់សេវ៉ារបស់រដ្ឋទៅឲ្យឯកជនកាន់កាប់ រួមមាន រដ្ឋាករទឹក ឬមួយអគ្គិសនី។ យ៉ាងណាក៏ដោយ អង្គការសហប្រជាជាតិបានដាក់អនុសាសន៍មួយចំនួនទៅឲ្យរដ្ឋាភិបាលក្រិក និងដៃគូអឺរ៉ុបរបស់ប្រទេសក្រិក។ តែគេនៅអាចដឹងថា តើអនុសាសន៍ទំាងនោះនឹងត្រូវគេយកទៅអនុវត្ត ឬអត់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ