បារាំងប្រើនាវាផ្ទុកយន្តហោះក្នុងប្រតិបត្តិការវាយប្រហារលើក្រុមជីហាតនៅអ៊ីរ៉ាក់
ជាងមួយខែក្រោយពីទទួលរងការវាយប្រហារភេរវកម្មនៅទីក្រុងប៉ារីស បារាំងបានបង្កើនយុទ្ធនាការប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម ដោយបានចាប់ផ្តើមប្រើនាវាផ្ទុកយន្តហោះ ក្នុងប្រតិបត្តិការវាយប្រហារតាមផ្លូវអាកាស ទៅលើទីតាំងក្រុមជីហាត នៅក្នុងប្រទេសអ៊ីរ៉ាក់។ អន្តរាគមន៍នៃនាវាផ្ទុកយន្តហោះនេះបានធ្វើឲ្យបារាំងក្លាយទៅជាតួអង្គសំខាន់ទីពីរ បន្ទាប់ពីសហរដ្ឋអាមេរិក នៅក្នុងប្រតិបត្តិការវាយប្រហារលើក្រុមជីហាតរដ្ឋអ៊ីស្លាម។
ចុះផ្សាយនៅថ្ងៃ៖
ស្តាប់ - ០៤:៥២
នៅព្រឹកថ្ងៃចន្ទនេះ យន្តហោះចម្បាំងធុន Rafale ជាច្រើនគ្រឿងបានហោះចេញពីនាវាផ្ទុកយន្តហោះ Charles de Gaulle ដែលស្ថិតនៅក្នុងឈូងសមុទ្រពែក្ស សំដៅទៅវាយប្រហារលើទីតាំងរបស់ក្រុមជីហាតរដ្ឋអ៊ីស្លាម នៅក្នុងប្រទេសអ៊ីរ៉ាក់។ នេះបើយោងតាមការអះអាងរបស់មន្រ្តីក្រសួងការពារជាតិបារាំង។
បារាំងបានចូលរួមជាមួយសហរដ្ឋអាមេរិក និងប្រទេស ៣០ផ្សេងទៀត ក្នុងប្រតិបត្តិការវាយប្រហារលើក្រុមជីហាតរដ្ឋអ៊ីស្លាមនៅអ៊ីរ៉ាក់ តាំងពីខែកញ្ញាឆ្នាំ២០១៤។ បារាំងបានបញ្ជូនទាហានប្រមាណ ១០០នាក់ ឲ្យទៅអ៊ីរ៉ាក់។ ជាផ្លូវការទាហានបារាំងទាំង ១០០នាក់នេះ មានបេសកកម្មជួយហ្វឹកហ្វឺន និងផ្តល់ប្រឹក្សាដល់កងទ័ពអ៊ីរ៉ាក់។ ក៏ប៉ុន្តែ នៅក្នុងការអនុវត្តជាក់ស្តែង ប្រហែលជាមានទាហានមួយផ្នែក គឺជាកងកុម្ម៉ង់ដូ ដែលធ្វើការខាងចារកិច្ច និងកំណត់ទីតាំងរបស់ក្រុមជីហាត ដើម្បីជួយសម្រួលដល់ប្រតិបត្តិការវាយប្រហារតាមផ្លូវអាកាស។
នៅក្នុងប្រតិបត្តិការវាយប្រហារតាមផ្លូវអាកាស ពីដំបូងបារាំងប្រើយន្តហោះចម្បាំង ១៥គ្រឿង គឺយន្តហោះធុន Rafale ចំនួន ៩គ្រឿង ហោះចេញពីមូលដ្ឋានទ័ពអាកាសបារាំងក្នុងប្រទេសអារ៉ាប់រួម និងយន្តហោះចម្បាំង ធុន Mirage 2000D ៦គ្រឿង ហោះចេញពីប្រទេសហ្សកដានី។ អន្តរាគមន៍របស់នាវាផ្ទុកយន្តហោះនៅពេលនេះ បានធ្វើឲ្យកម្លាំងទ័ពបារាំងនៅក្នុងប្រតិបត្តិការប្រឆាំងនឹងក្រុមជីហាតនៅអ៊ីរ៉ាក់ត្រូវកើនឡើងមួយទ្វេជាពីរ។
នៅលើនាវាផ្ទុកយន្តហោះ Charles de Gaulle មានយន្តហោះចម្បាំងទំនើបៗ ២១គ្រឿង និងមានទាហាន២០០០នាក់ ព្រមទាំងមានហែហមអមដំណើរដោយនាវាចម្បាំងជាច្រើនគ្រឿង ដោយមានទាំងនាវាមុជទឹក និងនាវាចម្បាំងជំនាញខាងការពារការវាយប្រហារពីអាកាស។
បើគិតសរុបទាំងអស់ កម្លាំងទ័ពរបស់បារាំង ដែលចូលរួមនៅក្នុងប្រតិបត្តិការវាយប្រហារលើក្រុមជីហាតរដ្ឋអ៊ីស្លាមនៅអ៊ីរ៉ាក់ គឺមានយន្តហោះចម្បាំង ៣៦គ្រឿង និងទាហានសរុប ប្រហែលជា ៣ពាន់៥រយនាក់។
អន្តរាគមន៍នៃនាវាផ្ទុកយន្តហោះ Charles de Gaulle អាចនឹងជួយឲ្យបារាំងបង្កើនប្រសិទ្ធភាពក្នុងការវាយប្រហារលើទីតាំងរបស់ក្រុមជីហាត ពីព្រោះនាវាផ្ទុកយន្តហោះប្រៀបដូចជាមូលដ្ឋានទ័ពអាកាសចល័តដែលងាយស្រួលផ្លាស់ទី ហើយអាចចូលទៅជិតទីតាំងដែលត្រូវវាយប្រហារ។ បច្ចុប្បន្ននេះ នាវាផ្ទុកយន្តហោះ Charles de Gaulle ស្ថិតនៅក្នុងឈូងសមុទ្រពែក្ស ចម្ងាយប្រហែលជា ២០០គីឡូម៉ែត្រ ខាងជើងប្រទេសបារ៉ែន ហើយយន្តហោះដែលហោះចេញនាវាផ្ទុកយន្តហោះនេះទៅកាន់ចំណុចស៊ីបនៅអ៊ីរ៉ាក់ ត្រូវប្រើពេលតិចជាងរហូតដល់ទៅពីរដង បើធៀបនឹងយន្តហោះដែលហោះចេញពីមូលដ្ឋានទ័ព នៅប្រទេសអារ៉ាប់រួម។
ម្យ៉ាងទៀត ការបញ្ចេញនាវាផ្ទុកយន្តហោះឲ្យទៅឈូងសមុទ្រពែក្សនៅពេលនេះ គឺជាមធ្យោបាយសំខាន់មួយ ដើម្បីឲ្យបារាំងអាចបង្ហាញពីមហិទ្ធិឫទ្ធិទ័ព ក្នុងការវាយប្រហារតបតនឹងភេរវជន ដែលហ៊ានវាយប្រហារលើបារាំង។ នេះអាចជាសារមួយសម្រាប់ពួកភេរវជនថាបារាំងមានសមត្ថភាពយោធាអាចបើកការវាយប្រហារនៅគ្រប់ទីកន្លែងទាំងអស់ ចំពោះសត្រូវណាដែលហ៊ានវាយប្រហារលើបារាំង។ វាក៏ជាសារមួយសម្រាប់សាធារណមតិក្នុងប្រទេសបារាំងដែរ ដើម្បីបង្ហាញពីភាពមោះមុតរបស់រដ្ឋាភិបាល ក្នុងការឆ្លើយតបចំពោះភេរវជន ដែលបានវាយប្រហារនៅទីក្រុងប៉ារីស កាលពីខែមករាកន្លងទៅ។
អន្តរាគមន៍របស់នាវាផ្ទុកយន្តហោះ Charles de Gaulle ដែលផ្ទុកទៅដោយយន្តហោះចម្បាំងទំនើបធុន Rafale ក៏ជាឱកាសដ៏ល្អមួយដែរ ដើម្បីឲ្យបារាំងបង្ហាញឲ្យគេឃើញ អំពីសមត្ថភាពជាក់ស្តែងរបស់យន្តហោះ Rafale ដែលបារាំងកំពុងតែស្វះស្វែងរកទីផ្សារ ដើម្បីនាំចេញ។ ការបង្ហាញពីសមត្ថភាពក្នុងសមរភូមិជាក់ស្តែងរបស់យន្តហោះចម្បាំងធុន Rafale ក្នុងការបើកប្រតិបត្តិការចេញពីនាវាផ្ទុកយន្តហោះនេះ កាន់តែមានសារៈសំខាន់ទៅទៀត នៅក្នុងពេលដែលបារាំង កំពុងតែចរចាលក់យន្តហោះនេះទៅឲ្យឥណ្ឌា ពីព្រោះថា ឥណ្ឌាទើបនឹងដាក់ឲ្យដំណើរការនាវាផ្ទុកយន្តហោះមួយដែលទិញពីរុស្ស៊ី។ ដូច្នេះ សមត្ថភាពក្នុងការបើកប្រតិបត្តិការចេញពីនាវាផ្ទុកយន្តហោះ គឺជាលក្ខណៈវិនិច្ឆ័យសំខាន់មួយ ដែលបារាំងអាចយកទៅបញ្ចុះបញ្ចូលឥណ្ឌាឲ្យទិញយន្តហោះ Rafale។
គួរបញ្ជាក់ថា នៅថ្ងៃចន្ទនេះ រដ្ឋមន្រ្តីការពារជាតិបារាំងត្រូវចាប់ផ្តើមដំណើរទស្សនកិច្ចរយៈពេល២ថ្ងៃ នៅឥណ្ឌា ដើម្បីជជែកអំពីកិច្ចសន្យាលក់យន្តហោះ Rafale ហើយនៅចុងខែមេសាខាងមុខនេះ បារាំងនឹងបញ្ជូននាវាផ្ទុកយន្តហោះ Charles de Gaulle រួមជាមួយនឹងយន្តហោះចម្បាំង Rafale ឲ្យទៅកាន់ប្រទេសឥណ្ឌា ដើម្បីចូលរួមក្នុងសមយុទ្ធទ័ពជើងទឹករួមគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ