ក្រោយភេរវកម្មនៅប៉ារីស វិធានការប្រយុទ្ធប្រឆាំងជីហាតមានដំណើរការដល់ណា ?
ថ្ងៃនេះ ជារយៈពេលមួយខែគត់ ដែលប៉ារីសបានរងគ្រោះភេរវកម្មជីហាត ប្រឆាំងកាសែតត្លុកCharlie Hebdo ប្រឆាំងប៉ូលិស និងសហគមន៍ជ្វីហ្វ ស្លាប់មនុស្សអស់ ១៧នាក់។ មួយខែក្រោយ Charlie Hebdo កំពុងតែចោទសួរថាតើត្រូវបន្តចេញលេខក្រោយប៉ុន្មាន និងយ៉ាងដូចម្តេច ព្រោះកាសែតដែលអ្នកនិពន្ធល្បីៗបានស្លាប់អស់ស្ទើររលីងទៅហើយ បានទទួលការគាំទ្រខ្លាំងទាំងចំនួនអ្នកអាន និងហិរញ្ញវត្ថុ។ ចំណែកការអង្កេតបានឈានដល់ការចាប់ខ្លួនជនសង្ស័យជាប់ពាក់ព័ន្ធនឹងភេរវកម្មផង និងស្រាវបណ្តាញជីហាតដ៏ប្រទាក់ក្រឡាផង។ ជាក់ស្តែងនៅថ្ងៃនេះ ប៉ូលិសបានចាប់ខ្លួនជនសង្ស័យនៃបណ្តាញជីហាត៦នាក់ទៀត នៅភាគខាងត្បូងប្រទេស។ ក្រៅពីនោះរដ្ឋាភិបាលបារាំងក៏មានចេញវិធានការជាច្រើនដើម្បីទប់ស្កាត់ចរន្តជីហាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ក្រោយភេរវកម្មជីហាតប្រឆាំងនឹងទស្សនាវដ្តីCharlie Hebdo ការប្រយុទ្ធប្រឆាំងនឹងជីហាតតាមអ៊ីនធ័រនែត ត្រូវបានគេមើលឃើញថាជាចំណែកមួយនៃការទប់ស្កាត់ចរន្តផ្តាច់ខ្លួនទៅធ្វើជីហាត។ រដ្ឋាភិបាលបារាំង ដោយគ្មានបង្អង់បានប្រកាសនូវវិធានការមួយចំនួន ដូចជា បញ្ជ្រៀបព័ត៌មាន បិទខ្ទប់វិបសៃត៍ជីហាត ... មួយខែក្រោយវិធានការដែលលេចធ្លោ និងបានអនុវត្តដោយជាក់ស្តែង គឺ វីដេអូ "បញ្ឈប់ជីហាតនិយម” ដែលជាឆាកឈុតស្រង់ឱ្យឃើញពីអំពើឃោរឃៅនៃមនោគមន៍វិជ្ជារបស់អង្គការរដ្ឋអ៊ីស្លាម។ វីដេអូនេះគ្រាន់បង្ហោះលើប្រព័ន្ធអ៊ីនធ័រនែតភ្លាម មានមនុស្សចូលមើលដល់ទៅជាងពីរលាននាក់ ពោលជាវីដេអូដែលមានអ្នកមើលច្រើនជាងគេ ក្នុងវិបសៃត៍រដ្ឋាភិបាល។
ទន្ទឹមនឹងវីដេអូនេះ មានវិបសៃត៍មួយទៀត ដែលអាជ្ញាធរបារាំងមានគម្រោងរៀបចំតាំងពីយូរមកហើយ តែហេតុការណ៍ភេរវកម្មបានមកពន្លឿនឱ្យចេញជាលទ្ធផលជាក់ស្តែងបានឆាប់មុនពេលកំណត់។ គេពុំទាន់អាចប៉ាន់ស្មានអំពីផលប្រយោជន៍នៃមធ្យោបាយទាំងពីរនេះបាននៅឡើយមែន ប៉ុន្តែប៉ូលិសអាចសន្មត់បានថាជាចម្លើយតបទៅនឹងសេចក្តីត្រូវការរបស់ពលរដ្ឋ ព្រោះមានឪពុកម្តាយជាច្រើនបានទាក់ទងប្រាប់ពីក្តីព្រួយបារម្ភខ្លាចកូនផ្តាច់ខ្លួនទៅក្នុងអ៊ីស្លាមជ្រុលនិយមជីហាត។
វិធានការមួយទៀត គឺការបិទខ្ទប់រាល់វិបសៃត៍ដែលមានលក្ខណៈឃោសនាមនោគមន៍វិជ្ជាជីហាត ចាប់អនុវត្តពីសប្តាហ៍មុនមក ដោយអាជ្ញាធរអាចមានសិទ្ធិបង្ខំឱ្យម្ចាស់ក្រុមហ៊ុនអ៊ីនធ័រនែតមួយបិទខ្ទប់វិបសៃត៍មិនល្អ ដោយមិនបាច់ឆ្លងកាត់តុលាការ។ ហើយជាចុងក្រោយ មានភ្នាក់ងារចាំទទួលព័ត៌មាន នៅពេលឃើញមានសញ្ញា ឬសារញុះញង់ឱ្យស្អប់ខ្ពើមគ្នា។ ក្នុងរយៈពេលតែមួយខែ គេកត់ត្រាបានដល់ជាងបួនម៉ឺនករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ