អ៊ីស្រាអែលត្រូវគេសង្ស័យថាជាអ្នកលួចបន្លំស៊ើបការណ៍ការចរចានុយក្លេអ៊ែរអ៊ីរ៉ង់
អាជ្ញាធរមានសមត្ថកិច្ចស្វីស និងអូទ្រីសទើបតែបានប្រកាសជាផ្លូវការ ថាប្រទេសទាំងពីរ បានបើកការស៊ើបអង្កេតរៀងៗខ្លួន លើសំណុំរឿងចោរព័ត៌មានវិទ្យា ដែលបានប្រើប្រាស់ មេរោគព័ត៌មានវិទ្យាម្យ៉ាង ដើម្បីវាយលុកប្រព័ន្ធភ្ជាប់អ៊ីនធឺនែត របស់សណ្ឋាគារធំៗ មួយចំនួន។ សណ្ឋាគារទាំងនោះ ត្រូវបានគេដឹងថា ជាសណ្ឋាគារដែលធ្លាប់ ទទួលរៀបចំ ការជួបប្រជុំពិភាក្សាគ្នា រវាងថ្នាក់ដឹកនាំប្រទេសមហាអំណាចទាំង៦ ជាមួយនឹងអ៊ីរ៉ង់ ដើម្បីស្វែងរកកិច្ចព្រមព្រៀងស្តីពីកម្មវិធីនុយក្លេអ៊ែរអ៊ីរ៉ង់។ គេកំពុងដាក់ការសង្ស័យ លើអ៊ីស្រាអែល ថាជាអ្នក នៅពីក្រោយអំពើនេះ។
ចុះផ្សាយនៅថ្ងៃ៖
ស្តាប់ - ០២:០១
យោងតាមការផ្សព្វផ្សាយរបស់ទូរទស្សន៍ស្វីស RTS បានឲ្យដឹងថា រដ្ឋអាជ្ញាស្វីស បានបើកការស៊ើបអង្កេតលើសំណុំរឿងនេះ តាំងពីដើមខែឧសភាម្លេះ។ បរិក្ខាកុំព្យូទ័រ និងសំភារៈមួយចំនួន ត្រូវបានប្រមូលទុក កាលពីថ្ងៃទី១២ឧសភា ដើម្បីធ្វើការស៊ើបអង្កេត។ យោងតាមប្រភពដដែលបានបញ្ជាក់ថា មានសណ្ឋាគាររបស់ស្វីស៣ ដែលជាប់ពាក់ពន្ធ័នឹងការស៊ើបអង្កេតនេះ។ សណ្ឋាគារទាំងបីនេះ សុទ្ធសឹងជាសណ្ឋាគារ ដែលធ្លាប់រៀបចំ បើកកិច្ចប្រជុំពិភាក្សា របស់ក្រុមប្រទេសមហាអំណាច ទាំង៦ ជាមួយអ៊ីរ៉ង់ ស្តីពីកម្មវិធីនុយក្លេអ៊ែរអ៊ីរ៉ង់។
អាជ្ញាធរស្វីសបានបញ្ជាក់ថា ប្រព័ន្ធភ្ជាប់អ៊ីធឺនែត របស់សណ្ឋាគារទាំងនោះ ត្រូវបានរងការវាយប្រហារ ដោយមេរោគព័ត៌មានវិទ្យាម្យ៉ាង។ បើតាមការស្មាន គឺ ពួកចោរ បានបង្កើតវាឡើង ដើម្បីបន្លំលួចឯកសារ និងស្តាប់ការប្រជុំ របស់ថ្នាក់ដឹកនាំធំៗ ស្តីពីនុយក្លេអ៊ែរអ៊ីរ៉ង់ នៅតាមសណ្ឋាគារទាំងនោះ អស់រយៈពេលជាច្រើនឆ្នាំមកហើយ។ ដូចគ្នាដែរ អាជ្ញាធរអូទ្រីស ក៏បានបញ្ជាក់ផងដែរថា វិមានដ៏ធំមួយ នៅទីក្រុង វីយែន ដែលធ្លាប់បានទទួលរៀបចំការប្រជុំស្តីពីកម្មវិធីនុយក្លេអ៊ែរអ៊ីរ៉ង់ ក៏រងការវាយប្រហារដោយមេរោគព័ត៌មានវិទ្យា ប្រហាក់ប្រហែលគ្នានេះ ផងដែរ។
គួររំលឹកផងដែរថា ចាប់តាំងពី ចុងឆ្នាំ២០១៣ មក ប្រទេសស្វីស និងប្រទេសអូទ្រីស បានទទួលរៀបចំកិច្ចប្រជុំជាច្រើនលើក រាប់មិនអស់ រវាងប្រមុខការទូតប្រទេសទាំង៦ រួមមាន បារាំង អង់គ្លេស អាល្លឺម៉ង់ រុស្ស៊ី ចិន និងអាមេរិក ដែលពិភាក្សាគ្នា ជាមួយអ៊ីរ៉ង់ ដើម្បីស្វែងរកកិច្ចព្រមព្រៀង ស្តីពីការគ្រប់គ្រងកម្មវិធីផលិតថាមពលនុយក្លេអ៊ែររបស់អ៊ីរ៉ង់។
តាមការសង្ស័យក្រុមចោរ បានប្រើមេរោគនេះ ដើម្បីស៊ើបការណ៍សំងាត់ រាល់ការចរចាគ្នា។ ក្រុមហ៊ុនព័ត៌មានវិទ្យាមួយ ដែលមានមូលដ្ឋាននៅរុស្ស៊ី បានចាប់បានមេរោគនេះ កាលពីឆ្នាំ២០១៤ ម្លេះ ហើយដែលគេធ្លាប់ស្មានថា ជាមេរោគដែលប្រើសំរាប់លួចស្តាប់ការចរចាគ្នា។ យ៉ាងណាមិញ សារព័ត៌មាន Wall Street Journal ធ្លាប់បានចុះផ្សាយដំបូងគេថា ពិតជាមានការបន្លំលួចស្តាប់ការចរចារ ដោយការប្រើមេរោគព័ត៌មានវិទ្យា ដូចដែរក្រុមហ៊ុនរុស្ស៊ី បានរកឃើញពិតមែន។ ដោយយោងតាមការសន្និដ្ឋានជាបឋម មេរោគនេះ អាចមានប្រភពពីអ៊ីស្រាអែល។ គិតមកត្រឹមពេលនេះ គេមិនទាន់បានទទួលប្រតិកម្ម ពីសំណាក់ អាជ្ញាធរអ៊ីស្រាអែល នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ